भांगरभूंय | प्रतिनिधी
मचें गोंय पर्यटन केंद्र. हांगा सोऱ्याच्यो न्हंयो व्हांवतात. कायद्यान हांगा जाय तितलो सोरो तयार करपाक, विकपाक मेळटा. पूण बेकायदेशीर कांय करपाक मेळना. तरीय झटपट गिरेस्त जावपाक बरेच जाण कायदो खुंटयाळ्याक लावन नाका जाल्लीं कर्मां करतात. सोऱ्याचें मळूय हाका आडवाद ना. बिरेस्तारा कर्नाटक अबकारी विभागान शिवमोग्गा (शिमोगा) जिल्ह्यांत गोंयचे एके मोटारींतल्यान सोरो जप्त केला. बेतलांतल्या एकल्याक अटक केल्या. ही गाडी अबकारी निरिक्षकाची खंय. ताका लागून आतां अधिकारीच सोऱ्याची तस्करी करपाक लागल्यात काय कितें, असो दुबाव येता. शेत राखपाक बांदिल्ले वंयेंनूच पीक खावपा सारको हो प्रकार जालो. हो अधिकारी आडवाटेक आशिल्ल्या एका शेता देगेर राविल्लो. कोणाची तरी वाट पळयतालो. हाची म्हायती कर्नाटकाच्या अबकारी निरिक्षकाक मेळ्ळी आनी तांणी थंय धाड घालून गोंयच्या ह्या अधिकाऱ्याक 138 लिटर सोऱ्या सयत धरलो. घडणूक बिरेस्ताराची. सध्या ताका न्यायालयीन बंदखणी दवरला. तो खरेंच अबकारी अधिकारी आसत जाल्यार हो प्रकार भयंकरूच म्हणचो पडटलो. दुसरी घडणूक बीफ जप्त करपाचीं. बेळगांवच्यान गोंयांत येवपी रु. 2.75 लाखांचें बीफ धरलां. हो आयात- निर्यात वेवसाय फाटलीं कितलिंशींच वर्सां चलता. शिमे वयल्या तपासणी नाक्यां वयल्या अधिकाऱ्यांच्या दोळ्यांत धुल्ल मारून ही तस्करी चलता, काय तांच्या दोळ्यांचेर साय दाटिल्ली आसता? हे नाके नाकयां पडल्यात इतलें मात खरें.
गोंयच्या सोऱ्याची तस्करी हो नवो प्रकार न्हय. महाराष्ट्र, कर्नाटकांत हो सोरो वता. ते खातीर लोक वाहनांचो वापर करतातूच, पूण शिमे वयल्या गांवांनी पर्यटनाक येवन वतना सोऱ्याच्यो बाटल्यो व्हरतात. तांचो मार्ग दोंगरांतल्यो पांयवांटो. हांगाच्यानूय बरेच लोक ते वटेन वतात. ही तशी नवी, अजापीत करपी गजाल न्हय. कारण बरेच खेप ह्या तस्करांक धरल्यात. वेंचणुकांच्या दिसांनी तर सोरो, साडयो, पयशांचीय तस्करी जाल्या. फाटले लोकसभा वेंचणुके वेळार गोंयच्यान भायर वचपी गाडयो धरल्यात. चेक नाक्यार. पूण, गोंयच्या न्हय, कर्नाटकाच्या. गोंयच्या एकाय तपासणी अधिकाऱ्याक तांचो दुबाव येवंक ना, हाचे वयल्यान कितें अर्थ काडपाचो? गोंयच्यान गाडी तपासून भायर सोडली आनी मुखार कर्नाटकाच्या अधिकाऱ्यांनी ती धरली. भितर सोरो, पयशे सांपडले. हाचो अर्थ वयर म्हणलां तशें, दोळ्यां वयली साय!! सगल्याच अधिकाऱ्यांक एकाच मापांत मेजपाक मेळचें ना. तरीय शिमे वयल्या तपासणी नाक्यांचेर घाळपणा जातात, हें मान्य करचेंच पडटलें. आतां कर्नाटकांत धरला तो सोरो गोंयच्या नाक्यां वयल्यान पासार जाला आसतलोच. हवेंतल्यान वा उदकांतल्यान कांय तो व्हरूंक ना. ही गाडी गोंयच्यान केन्ना आनी कितल्यांक गेल्ली? तपास करचो. नाक्याचेर त्या वेळार कोण आशिल्ले ताची म्हायती मेळटली. बेरोजगार तरणाटे, गुन्यांवकार हें बेकायदेशीर काम करतातूच, पूण लाखांनी रुपया पगार आशिल्ले सरकारी अधिकारीच जर सोऱ्याचें अशी निर्यात करपाक लागलें, जाल्यार ताचे परस दुसरी लजेची गजाल ना…. अशें वागपी हे लोक मागीर देशा विशीं अभिमान कसो दाखयतात? आपल्या राज्याचेर, देशाचेर खरो मोग करपी मनीस केन्नाच बेकायदेशीर कामां करिनात. करतात ते देशद्रोही, वांयगणे देशभक्त.
गोंयांत बेळगांवच्यान पांचशें कील बीफ हाडपी दोन गाडयो जप्त केल्यात. बीफ 2.75 लाखांचें तर दोनूय गाडयो मेळून 18 लाखांचो म्हाल केरी तपासणी नाक्याचेर धरलो. त्या तिक्ष्ण नदरेच्या अधिकाऱ्यांक परबीं. दोनूय गाडयो गोंयच्यो. मुरगांवच्या दोगांक आनी बेळगांवच्या दोगांक अटक केल्या. केरी नाक्याचेर 15 दिसां पयलींय असोच प्रकार घडिल्लो. गोंयांत फावो सारकें बीफ आसा, अशें सरकारी यंत्रणां सांगता. मागीर हें भायलें, तेंय बी बेकायदेशीर पद्दतीन कित्याक हाडटात? मागणी आसले बगर 2- 2 लाखांचें बीफ येवप शक्यूच ना. उसगांवच्या कत्तलखान्यांतल्यान भायर सरता त्या बिफाचें प्रमाण उणें आसा तर? तशें आसल्यार सरकारी यंत्रणेन फावो तितल्या बिफाची वेवस्था करूंक जाय. कारण पर्यटन राज्य म्हणटकच तशी मागणीय आसतलीच. उणाव ना जाल्यार अशें भायल्यान मास हाडप, गोंयांत लिपचोरयां गोरवां मारप चुकीचें!
पुर्तुगेज तेंपार गोंयच्या शिमांचेर कडक बंदोबस्त आसतालो. तरीय कांय जाण तस्करी करताले. आतां आव, जाव गोंय तुम्हारा, अशी परिस्थिती जाल्या. फक्त हांगाचोच म्हाल बेकायदेशीर पद्दतीन भायर वचना, तर भायलेंय सामान गोंयांत येता. हाका आळाबंद हाडपाक खर पावलां उखलचीं पडटलीं. हें पचता म्हूण तर बेकायदेशीर कामां करप्यांक जल मेळटा. नाजाल्यार कोणाक धाडस जावपाचें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
