भांगरभूंय | प्रतिनिधी
चार इमारती मोडपाचो जाला निर्णय
पणजी : भौशीक बांदकाम खात्यान तपासणी वा पळोवणी केल्ल्या १३० सरकारी शिक्षण संस्थांच्या इमारतीं मदल्या ९ शिक्षण संस्थांच्यो इमारती असुरक्षीत आसा. हाचे मदल्यो ४ इमारती मोडून नव्यो इमारती बांंदपाचो निर्णय घेतला. भौशीक बांधकाम खात्याचे मंत्री ह्या नात्यान मुख्यमंत्री डॉ. प्रमोद सावंत हांणी जाप दिल्या. दिवचलचे आमदार डॉ. चंद्रकांत शेट्ये हांच्या तारांकीत लेखी प्रस्नाक डॉ. सावंत हांणी ही लेखी जाप दिल्या.
सरकारी मुळाव्यो शाळा, सरकारी विद्यालय तशेंच आयटीआय इमारतीची तपासणी भौशीक बांधकाम खात्या वरवीं सुरू आसा. तज्ज्ञ तशेंच गोंय अभियांत्रिकी म्हाविद्यालयाच्या प्रोफेसरां वरवीं ही तपासणी सुरू आसा. तपासणे वेळार शिक्षण अधिकारी हाजीर आसतात. आतां मेरेन १३० सरकारी शिक्षण संस्थांच्या इमारतींची तपासणी जाल्या. तपासणी जाल्ल्यो चडशो इमारती सुरक्षीत आसात. शिङ्गारसी प्रमाण दुरूस्तीकाम बेगीनूच सुरू जातलें, अशें तांणी सांगलें. दुरूस्ती खातीरचो एस्टीमेट लेगीत तयार जाला.
तिसवाडी म्हालांत सरकारी मुळावी शाळा बायरो – सांताकृझ, सरकारी विद्यालय गावचेभाट मेरशी, सरकारी मुळावी शाळा मेरशी ह्यो इमारती असुरक्षीत आसात. ह्यो इमारती मोडून नव्यो इमारती बांदतले. दिवचल म्हालांत पुनर्वसन साळ हांगची मुळावी सरकारी शाळेची इमारत असुरक्षीत आसा. ही दुरूस्त करप शक्य ना, असो जीईसीचो अहवाल आसा. बार्देस म्हालांत म्हापशें आयटीआय इमारत असुरक्षीत आसा. नवी इमारत बांदपाचो प्रस्ताव आसा. साश्ट म्हालांतल्या सरकारी मल्टीपर्पज हायस्कूलची इमारत मोडपाचो प्रस्ताव आसा.
सत्तरी म्हालांत दाबे सरकारी विद्यालय इमारत असुरक्षीत आशिल्ल्याचो अहवाल आयला. फोंडें म्हालांत शिरोडा सरकारी विद्यालयाची पोरणी इमारत तशेंच मडकय सरकारी मुळावे शाळेची इमारत असुरक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
