भांगरभूंय | प्रतिनिधी
वीज सवलत घोटाळो प्रकरण
मनोहर पर्रीकार, प्रतापसिंह राणे हांची साक्ष ना
न्यायालयाची तपास प्रक्रियेचेर खर टिका
भांगरभूंय । प्रतिनिधी
पणजी : वीज सवलत प्रकरणांत मंत्री मॉवीन गुदिन्हो हांचे सयत हेर सगल्या दुबावितांची हालींच पुरावे नाशिल्ल्यान निर्दोश सुटका केल्या. उत्तर गोंय विशेश न्यायालयान दिल्ल्या आदेशांत एकंदरीत तपास प्रक्रियेचेरूच खर टिका केल्या. तपास अधिकारी संबंदितांचेर फौजदारी गुन्यांव वा भ्रश्टाचार सिद्ध करपाक पुराय अपेशी थारल्यात, अशें म्हणलां. ह्या प्रकरणांतले म्हत्वाचे साक्षीदार सर्गेस्त मुख्यमंत्री मनोहर पर्रीकार, तेन्नाचे मुख्यमंत्री प्रतापसिंह राणे हांची साक्ष तपास अधिकाऱ्यांनी नोंदूच करूंक ना. ह्या साक्षीदारांक जाणीवपूर्वक टाळून म्हत्वाचें तथ्य लिपयलां, अशें स्पश्ट दिसता. ताका लागून पुराय खटल्याची बाजू दुबळी जाली, अशें न्यायाधीश इर्शाद आगा हांणी निकालांत म्हणलां.
वीज सवलतीच्यो फायल हाताळपांत प्रक्रियात्मक चुको आनी अनियमितता जाल्ल्यो आसल्यो तरी दुबावितांनी कसलो हेतू दवरिल्लो वा तांकां अर्थीक फायदो जाल्लो, हाचे कसलेच ठोस पुरावे सादर करूंक नात. भ्रश्टाचार प्रतिबंधक कायद्या प्रमाण (कलम 13(1)(ड) पीसी अॅक्ट) गुन्यांव थारावपा खातीर गरजेचे आशिल्ले पुरावे सादर करूंक नात, अशेंय न्यायालयान म्हणलां. ह्या प्रकरणाचो फुडलो तपास अहवालपत्रा वांगडा जोडूंक ना वा न्यायालयांत सादर लेगीत करूंक ना. ताका लागून तपास हेतूपुरस्सर चुकीचे पद्दतीन केल्ल्याचें दिसता, अशें निरिक्षण नोंद करून न्यायालयान तपास प्रक्रियेचेर लेगीत टिका केली. सरकारान संबंदीत कंपनीं कडल्यान सवलतीची रकम वसूल केल्ली आसली तरी लेगीत फक्त वसुलीक लागून दुबावितांची जापसालदारकी सोंपना. मात उपलब्ध पुराव्यांतल्यान कट रचिल्लो वा अधिकाराचो गैरवापर केल्लो, अशें दिसूंक ना. ताका लागून तांचे कडल्यान चडांत चड अनियमितता जाली, अशें म्हणपाक मेळटा, पूण हो प्रकार फौजदारी स्वरुपाचो भ्रश्टाचार थारना, अशेंय निरिक्षण नोंद करून न्यायालयान दुबावितांची पुरावे नाशिल्ल्यान निर्दोश सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
