भांगरभूंय | प्रतिनिधी
पयलींचे येवजणेंत बदल करून आतां मुख्यमंत्री समुपदेश येवजण
150 समुपदेशक, 25 सुपरवायझरांची जातली नेमणूक
पणजी: विद्यार्थ्यांक मानसीक ताण तशेंच निरशेवणेंतल्यान भायर काडपा खातीर समुपदेशकांची नेमणूक करपी मुख्यमंत्री समुपदेशन येवजणेक शिक्षण खात्यान मान्यताय दिल्या. हे येवजणे खाला कंत्राटी पद्दतीचेर 150 समुपदेशक तशेंच 25 सुपरवाझरांची नेमणूक जातली. विद्यार्थी समुपदेशनाच्या पयलींचे येवजणेंत बदल करून ही नवी येवजण सुरू केल्या.
गुणां खातीर सर्त तशेंच कुटुंबीक समस्यांक लागून खूबशे फावटी विद्यार्थी तणावांत वतात. ते निरशेवणेंत सांपडटात. सिगार, सोरो ह्या सारक्या वेवसनांचो आपणाव करपाची लेगीत भिरांत आसता. हे स्थितींत विद्यार्थ्यांचें समुपदेशन करपा सयत तांकां मानसीक आनी भावनीक आदार दिवपा खातीर समुपदेशकांची नेमणूक हे येवजणे खाला करतले. गोंय शिक्षण विकास म्हामंडळा वतीन हे येवजणेची कार्यवाही जातली. समुपदेशक, सुपरवायझरां सयत कार्यकर्त्यांचीय नेमणूक करपाची तरतूद आसा. मुख्याध्यापक, शिक्षक, पालक आनी वेवस्थापनाच्या पालवान समुपदेशन दिवपाचो उपक्रम विद्यालयांत सुरू जातलो.
सरकारी आनी अनुदानीत शाळा तशेंच विद्यालयांतल्या विद्यार्थ्यांक हे येवजणेचो लाव जातलो. समुपदेशना खातीर पुराय गोंयांत 150 समुपदेशकांची कंत्राटी पद्दतीचेर नेमणूक जातली. ह्या समुपदेशांक म्हयन्याक 30 हजार रुपयांचें वेतन आसतलें. 11 म्हयन्यांच्या कंत्राटाचेर तांची नेमणूक जातली आनी कंत्राटाचें नुतनीकरण करपाची मेकळीक आसा. तशेंच समुपदेशकांक मार्गदर्शन करपा खातीर 25 सुपरवाझरांची कंत्राटी पद्दतीचेर नेमणूक जातली.
सुपरवायझरांक म्हयन्याक 35 हजार रुपयांचें वेतन आसतलें. तशेंच येवजणेच्या कार्यवाही खातीर दोन एलडीसीची कंत्राटी पद्दतीचेर नेमणूक करतले. हे समुपदेशक विद्यालयां, उच्च माध्यमीक विद्यालयांनी वचून विद्यार्थ्यांक मार्गदर्शन करतले. तशेंच येवजणेच्या कार्यवाही खातीर गोंय शिक्षण विकास म्हामंडळाक कार्यकर्त्यांची नेमणूक करपाची मेकळीक आसतली. ह्या कार्यकर्त्यांक कसलोच अर्थीक मोबदलो मेळचो ना. पूण स म्हयने काम केले उपरांत तांकां अणभवाचें प्रमाणपत्र मेळटलें.
विद्यार्थ्यां मदीं वेसनांचें प्रमाण वाडत आसा. परिक्षेंतल्या अपेसाक लागून विद्यार्थ्यां कडल्यान आत्महत्येचे प्रकारूय घडल्यात. वेसनां पसून पयस करपा बराबरच निरशेवणेंतल्यान आत्महत्येचे प्रमाण उणे करपाचो उद्देश हे येवजणे फाटल्यान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
