भांगरभूंय | प्रतिनिधी
मुख्यमंत्री डॉ. सावंत : प्रियोळा खातीर भाजप आक्रमक
भांगरभूंय । प्रतिनिधी
फोंडें : संवसार पाडव्याक नवें काम करपा खातीर शूभ दीस मानतात. 2027 चे विधानसभा वेंचणुकेक देड वर्स उरलां, पूण आतां सावनूच वातावरण तापपाक लागलां. मुख्यमंत्री डॉ. प्रमोद सावंत हांणी प्रियोळ मतदारसंघांतल्या भाजप कार्यकर्त्यांक मार्गदर्शन करतना सांगलें, जांकां तडजोड करपाची ना जाल्यार युती तोडूं येता. 2027 त भाजपा प्रियोळ मतदारसंघांत वेंचणूक लडयतलो. प्रियोळ मतदारसंघा खातीर तडजोड ना. हाचेर युती मान्य ना जाल्यार तांणी युतींतल्यान आतांच भायर सरचें, अशी तांणी मगोचें नांव घेनासतना शिटकावणी दिली.
मुख्यमंत्र्यांच्या ह्या विधानाक लागून खूबश्या राजकी पंडितांक अजाप जालें. हाका लागून राजकी वातावरण तापलें. दीसभर हाचेरूच चर्चा चलताली.
युती मोडपा विशीं भाजपान केल्ल्या विधाना खातीर आपूण निरशेला, अशें मगोचे युवा फुडारी डॉ. केतन भाटीकार हांणी सांगलें. आपूण सुखी ना आनी दुख्खीय ना. 1999 त भाजपान मगो कडली युती तोडली आनी ताका लागून मगोचे फुडारी सुदिन ढवळीकार हांकां वेंचून येवपाक मजत जाली, अशें तांणी सांगलें.
फुडली वेंचणूक आपूण प्रियोळ मतदारसंघांतल्या लडटलो, अशें मगोचे अध्यक्ष दीपक ढवळीकार हांणी हालींच सांगिल्लें. मजगतीं, फोंडें मतदारसंघांत उदकाची समस्या उप्रासल्या. अशे स्थितींत वेगवेगळे राजकी फुडारी एकामेकांचेर आरोप- प्रत्यारोप करतात. 2027 चे विधानसभा वेंचणुकेचेर नदर दवरून जायते प्रायोजक सर्ती, भलायकी शिबिरां आयोजीत करतात. अशे तरेन फकत प्रियोळूच न्हय जाल्यार फोंडें शार वेंचणुकेच्या वादविवादाचें मैदान जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
