भांगरभूंय | प्रतिनिधी
नवी दिल्ली, खबरां संस्था: भारतीय तटरक्षक दळान भारत-पाकिस्तान दर्या शिमे लागसारा पाकिस्तान सागरी सुरक्षा एजन्सीन धरिल्ल्या ७ भारतीय नुस्तेकारांची सुटका केल्या. भारतीय तटरक्षक दळाचे बोटीन पाकिस्तानी बोटीक आडायली आनी नुस्तेंकारांची सुटका केली. मात ताचे पयलीं सुमार दोन वरां तांचो फाटलाव केलो.
ह्या सात नुस्तेकारांक पाकिस्तान दर्या सुरक्षा एजन्सीन धरिल्ले. तांकां धरून व्हरता हें तटरक्षक दळाक समजतांच फाटलाव करून तांकां वाटायले. खंयचेच परिस्थितींत भारतीय नुस्तेंकारांक व्हरपाक मेळचें ना अशी शिटकावणीय पाकिस्तानी अधिकाऱ्यांक दिली.
मजगतीं, तटरक्षक दळाच्या म्हणण्या प्रमाण, पाकिस्तानी दर्या सुरक्षा एजन्सी भारतीय नुस्तेंमार्यांक ताब्यांत घेताली, तेन्ना आमी तांकां सोडयले. १७ नोव्हेंबराक भारतीय तटरक्षकाचे बोटीक नुस्तेंकारांचो बोटी वयल्यान फोन आयिल्लो. ७ भारतीय नुस्तेकारांक दनपरां सुमार साडेतीन वरांचेर धरिल्ल्याची म्हायती संदेशांत आशिल्ली. ही म्हायती मेळटांच दळान धांव घेवन पाकिस्तानी बोटीक आडायली आनी सगल्यांची सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
