भांगरभूंय | प्रतिनिधी
पळोवणे वेळार पुरातन मंत्री सुभाष फळदेसाय हांची म्हायती
भांगरभूंय । प्रतिनिधी
पणजीः तिसवाडी आगशीच्या पुरातन गोपाकापट्टनम बंदराचें केंद्रीय समिती वरवीं खोलायेन संशोधन करतले आनी हेरिटेज पॉलिसी तयार करून ह्या वाठाराचो तातूंत आस्पाव करतले. रेंवेंत ह्या बंदरा विशीं खूबशीं गुपिता लिपल्यात. तंज्ञाचे मजतीन हे विशींचो फुडलो निर्णय आमी घेतले, अशें पुरातन खात्याचे मंत्री सुभाष फळदेसाय हांणी सांगलें.
आगशे जुवारी न्हयेदेगे लागसार फक्त फातर गुणे आशिल्ल्या गोपाकपट्टनम बंदराची मंत्री सुभाष फळदेसाय हांणी पळोवणी केली. ह्या वेळार थळावे आमदार विरेश बोरकार, गोंय राष्ट्रीय दर्या विज्ञान संस्थेचे तज्ञ डॉ. एस. गौर आनी पुरातन खात्याचे हेर अधिकारी हाजीर आशिल्ले.
पळोवणे उपरांत मंत्री फळदेसाय हांणी सांगलें, 6 व्या शेंकड्यां पयलीं तेन्नाची गोंयची राजधानी गोवापुरींत हें बंदर बांदिल्लें अशें म्हणटात, पूण हाचो उल्लेख महाभारत आनी रामायणांत मेळटा. हें एक दायज थळ आसा आनी दायज धोरणांत हाचो आस्पान करून घेतले. भारतीय पुरातत्व सर्वेक्षण येसस्वी बसका घेवन हाचो अहवाल तयार करतले. पूण सध्या आमी मुळाव्या पांवड्यारूच हाची पळोवणी केल्या, अशें फळदेसाय हांणी सांगलें.
ह्या वास्तूचेर आमी लक्ष दिवपाक जाय. आमचो इतिहास आनी दायज वास्तू पोंदा गेल्या. एनआयोन देड मिटर सुवात खणिल्ली तातूंत भितर इस्काती दिश्टी पडल्यो आनीक भितर गेल्यार आनीक इस्काती दिश्टी पडटल्यो. हाचो उल्लेख महाभारतांतूय आसा आनी गोंय एक पुराणीक संस्कृताय आशिल्ल्याची ही वास्तू गवाय दिता. रेंवें पोंदा कितें गुपीत आसा हें आमकां खबर ना हाचें म्हत्व जाणून घेवपा खातीर पुरातन खातें आनी एनआयओ जोड अभ्यास करतले, अशें फळदेसाय हांणी सांगलें.
भरती- सुकती रेशेचेर खूबशीं बांदकामां आमकां पळोवपाक मेळ्ळीं. जेन्ना आमी सुवातीचो अभ्यास करपाक सुरवात केली तेन्ना भरती रेशे वटेन आनीक बांदकामां आशिल्ल्याचें आमकां कळ्ळें. ह्या सगळ्या बांदकामांची आमी नोंद केल्ली आनी ताका तेंकून आमी चर मारपाक सुरवात केली. देड मिटर खोल खणटकत आमकां भितर स इस्काती दिसल्यो, अशें एनआयओचे तज्ञ डॉ. गौर हांणी सांगलें. आमी आनीक खणपाचो यत्न केल्लो, पूण भरतेक लागून उदक भरिल्ल्यान आमकां अडचणी येतात. पूण जो सोद आमकां लागला तो अद्भूत आसा आनी हाचे संवर्धन करून फुडले पिळगेक देख दिवपाची गरज आसा. त्या वेळार इतलें अत्याधुनीक तंत्रज्ञान आसप म्हणल्यार आमचो इतिहास कितलो पर्जळीत आसलो हाची गवाय दिता. मंत्र्यान हे वास्तूंत रुची दाखयल्ल्यान आमकां बरें फळ मेळटलें हाची खात्री आसा, अशें डॉ. गौर हांणी सांगलें.
बंदराचो फक्त 10 टक्केच अभ्यासः फळदेसाय
हें बंदर 8 किलोमिटर लांबायेचें आसा. जे तरेन कोयर येवन ह्या फातरांचेर जमा जाता त्या हिशेबान 100 वर्सां उपरांत आमकां हे फातर लेगीत दिसचे नात. पर्यावरणाक लुकसाण करिनासतना आमी ही सुवात संवसारीक पर्यटनाचे नदरे मुखार हाडपा खातीर गंभीर पावलां उखलतले. गोंय मुक्ती उपरांत विरेश बोरकर हे एकलेच आमदार आसात जांणी ह्या वास्तुची दखल घेतल्या. फक्त 10 टक्के हाचो अभ्यास जाला आनी पुरिल्लो इतिहास आमकां सोदून काडपाक जाय, अशें मंत्री सुभाष फळदेसाय म्हणटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
