भांगरभूंय | प्रतिनिधी
तंबाखू हें एक वेसन. लोक संवसारांत साबार कडेन तंबाखू आनी ताचे पसून तयार जावपी उत्पादनां खातात आनी हळूहळू ताचे भकीक पडटात. तंबाखूंत ‘निकोटीन’ नांवाचो पदार्थ आसता, जो खूब हानिकारक. तंबाकू आनी ताचे जिनस खाल्ल्यान दर वर्सा सुमार 10 लाख लोकांक मरण येता. आदल्या दिसांनी 36 टक्के दादले आनी 5 टक्केच बायलो तंबाखू वा ताचीं उत्पादनां खातात, अशें दिसून आयिल्लें. पूण, आयज कॉलेजांतल्यो चलयो पसून सिगारेट ओडटना दिसतात. सिगारेट तंबाखू पसून तयार करतात. सतत सिगारेट ओडपी चेन स्मोकर आज पळोवंक मेळटात.
काळजा रोग, कॅन्सर, टीबी, फुफ्फुसाचे, यकृताचे विकार आदीं ह्या वेसनाक लागून जातात. व्यंग आशिल्लें भुरगें पसून ह्या बायलां पसून जल्माक येवपाक शकता. खूबशा शाळकरी भुरग्यांक तंबाखूचें वेसन आसा. लोक मजे खातीर सिगारेट पीतात आनी वेसनी जातात. सिगारेट ओडपी लोक सोरोय पियेतात. तांचे लागसार बसल्यार सिगारेटीचो उग्र वास येता. तो सोंसपा सारको नासता.
निकोटीन हें तंबाखूंतलें रसायन सामके विखारी. तें लाळेंतल्यान, स्वासांतल्यान रक्तांत मिसळटा. ताचो परिणाम काळीज, फुप्फुस, पोट आनी रक्तांच्या शिरांचेर जाता. नसांचेर तो जालो, जाल्या बोटां काळीं पडटात. ओंठ,जीब, पोले, स्वासनळी हांगा कॅन्सर जावं येता. काळजाच्यो शिरो दुबळ्यो जावन दुयेंसां जातात. रक्ताच्यो शिरो कडक जाल्यार प्रेशर वाडटा. स्वासाचे नळयेंत कफ जाता, त्यो ल्हान जातात. ताका लागून स्वासाचें दुयेंस कायमचें लागता. हाचो परिणाम काळजाचेरुय जाता.
तंबाखूचें हें वेसन बंद करपाचे यत्न संवसारीक पांवड्याचेर जाल्यात. 7 एप्रिल 1988 दिसा संवसारीक भलायकी संघटनेन एक थाराव संमत केलो आनी 31 मे 1988 दिसा ‘तंबाखू विरोधी दीस’ पाळप सुरू जालें. दरवर्सा तंबाखू विरोधी घोशवाक्य तयार करतात. 2023 खातीर ‘आमकां अन्न जाय… तंबाखू नाका’ हें वाक्य वेंचून काडलां.
ह्या निमतान शारिरीक बुद्दीमत्तेच्या आदारान जाहिरात मोहीम आयोजीत करून तंबाखूच्या धोक्यां विशीं लोकांक जागरुक करतात. राज्य आनी केंद्र सरकारान विंगडविंगड कायदे लागू केल्यात. तंबाखू आनी धूम्रपानाचेर बंदी, शाळेच्या 100 यार्ड वाठारांत तंबाखूचे विक्रीचेर बंदी, 18 वर्सां सकयल्या भुरग्यांक तंबाखू विकपाक बंदी अशे जायते कायदे आसात. ते केल्ले आसले तरी कितल्याशाच जाणांक तंबाखूचें वेसन लागता, हें दुर्दैव.
वेसना आड देशांत वावुरपी संस्था आसात. जायते जाण ह्या वेसनाचे दुश्परिणाम सांगतात आनी तांचे पसून तरणाट्यांक पयस करतात. जागृताय जाता. योग, ध्यान आनी प्राणायामाच्या माध्यमांतल्यान वेसना पयस जातात. आनी तांकां तंबाखू सोडात, भलायकेची कांस धरात, हे खातीर मार्गदर्शन करतात. निरोगी आनी शाश्वत जिणे खातीर वेसनमुक्ती गरजेची. वेसनाक लागून वायट परिणाम जातात. कुटूंब त्रासांत पडटा. हें सगळें टाळचें आनी तंबाखूचें वेसन बंद करून निरोगी आनी सुखी जिवीत जगचें, असो संदेश ह्या दिसा दितात.
आमची जीण ही देवान आमकां दिल्ली देणगी. तिचो उपेग आनंद आनी मजे खातीर करूया.वेसन सोडल्यार पयशांचीय बचत जातली. तो पयसो घरांत बऱ्यो वस्तू हाडपाक, भुरग्यांच्या शिक्षणा खातीर जातलो. बरो पुश्टीक आहार घेवपाक मेळटलो. म्हणटकच आपशीच भलायकी बरी उरतली. कसलेंच वेसन लागूंक ना जाल्यार बरी पिळगी जल्माक येतली आनी ती राश्ट्राची गिरेस्तकाय आसतली.
शांताराम वाघ
96234 525 53
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
