तंबाकू पसून पयसूच रावया

भांगरभूंय | प्रतिनिधी

सिगार, विडी, पान, भलायकेचे दुस्मान, हें वेगळें सांगपाची गरज ना. सगल्यांक खबर आसा. तंबाकुचो कसलोय जिनस खावप म्हणल्यार दुयेंसाक, मरणाक आमंत्रण. ह्या शेनवारा 31 मेक नो टाॅबेको दीस पुराय संवसारान पाळ्ळो. 1988 सावन दरवर्सा तो जाता. हरशीय म्हूण वर्सांत तंबाकू आड 2 – 3 तरी कार्यावळी सगले कडेन आसताच, वेसनी दुयेंत जातात, मरतात. मात खावप्यांचेर कांयच परिणाम जायना. उरफाटे दर म्हयन्याक नवे- नवे खावपी तयार जातात खंय. ज्युस्त सोऱ्या भशेन हें वेसन पातळत आसा. भौशीक भलायकेचेर हाचो खूब व्हड प्रमाणांत परिणाम जाला, जाता आनी आमी वेळारुच जागे जावंक नात, जाल्यार फुडाराकूय जातलो. पयरुच कर्नाटक सरकारान तंबाकू आड नवो कायदो केला. पूण ताचो कितें फायदो जातलो काय एक- दोन म्हयन्यांनी सगलें आशिल्लें तशें जातलें, हें पळोवपाचें. हो कायदो कडकपणान चालीक लावप आतां सरकारी यंत्रणांचेर अवलंबून आसा. आनी समाजाचेरुय!!
कर्नाटक सरकाराच्या नव्या कायद्या प्रमाण, तंबाकू उत्पादनां विकत घेवपाची पिराय 18 वयल्यान 21 वर्सां केल्या. हुक्का पार्लरांचेर बंदी घाल्या. भौशीक जाग्यांचेर, रस्त्यांचेर गुटखो वा तंबाकू खावन थुकप्याक 1 हजार रुपयांचो दंड दिवपाचें थारायलां. 30 वा ताचे परस चड कुडी आशिल्लीं हाॅटेलां, व्हडलीं रेस्टाॅरंटां, विमानतळांचेर निश्चित केल्ले जागे सोडल्यार हेर कडेन तंबाकू आड खर निर्बंध आसतले. तंबाकूचें कसलेंय उत्पादन 21 वर्सां पिराये सकयल्या तरणाट्याक विकतना सांपडल्यार दुकानदाराक 1 हजारांचो दंड दितले. शिक्षणीक, धर्मीक थळांच्या 100 मिटर अंतराचेर तंबाकूची विक्री पुरायेन बंद केल्या. हुक्का बार बंद केल्यात. कायदो मोडल्यार तांकां लाखभर रुपयां मेरेन दंड जातलो, तशेंच एक ते तीन वर्सां मेरेन बंदखण. खरें म्हणल्यार तंबाकूक लागून जावपी मरणां पळयत जाल्यार सगल्या राज्यांनी अशीच बंदी घालूंक जाय. तशी ती आसा. मात लिपचोरयां सगलें विकप जाता. गोंयांत गुटखा, मावा पाकिटां विकपाक बंदी आसा. पूण सगल्या गाड्यांचेर तीं मेळटात. कांय कडेन चाॅकलेटी, बिस्किटीच्यो 7- 8 बरण्यो दवरून मटको घेतात, गुटखो विकतात. पुलीस कारवाय करीनात. घडये गोेंय हें पर्यटन राज्य म्हूण हांगा सगल्यांक सगलें मेळपाक जाय, अशें बी कोणें थारायलां आसतलें.
गोंयांत गुटखो, तंबाकू खावन ताच्यो पिचकाऱ्यो मारपी चित्रकारांक धरपाक भौशीक जाग्यांचेर सीसीटीव्ही कॅमेरे बसयिल्ले. पूण, कोणाचेर खर कारवाय जाल्ल्याची खबर केन्ना वाऱ्यार वचूंक ना. खंयच्याय मार्केटांत वचात, इमारतींचे कोनशे रंगयिल्ले दिसतले. थंय देवांच्यो मुर्ती दवरीत जाल्यार घडये हें रंगकाम बंद जायत! पूण तरीय कोणे पिचकारी मारलीच जाल्यार भक्तांच्यो भावना दुखावतल्यो. देखून हो उपाय चालीक लागप कठीण. म्हारगाय वाडल्या, तरीय तंबाकू खावप उणें जावंक ना. दरेकी 20 रुपयांच्यो चार सिगारेटी दिसाक ओडपी पसून शौकीन आसात. पुलिसांची गस्त आसल्यार, मार्केटांतल्या दुकानदारांनी फुडाकार घेतल्यार तंबाकू वेसनींक नितळसाणेची थोडी तरी जाण येतली. वण्टी रंगयिल्ल्यान पालिका, पंचायतींक त्यो रंगोवपाक खर्च येता. म्हणटकच तांणीय हो प्रकार गंभीरपणान घेवचो.
आमच्या देशांत सिगरेट, विडी, गुटखा, तंबाकू पान, मशेरी, मावा अशा वेगवेगळ्या जिनसांचो वापर जाता. ताका लागून वर्साक सादारण 13 लाख लोक मरतात. भितर 91 टक्के दादले आनी उरिल्ल्यो बायलो. वर्साक 14 ते 15 लाख लोकांक कॅन्सर जाता, तातूंतले 27 टक्के दुयेंतींक तंबाकूक लागून तो जाल्लो आसता. हांचेर उपचार करपाक देशाचे जीडीपीच्या एक टक्के इतली रक्कम सरकाराक खर्च करची पडटा. स्वासाचीं, काळजाचीं दुयेंसां जातात तीं वेगळींच.
तंबाकूच्या वायट परिणामां विशीं शाळांनी (चवथी ते सातवी यत्ता) जागृताय करपाक जाय. विक्रेचेर बंदी घालपाक जाय. विकत घेवप्याकूय दंड दिवंक जाय. सध्या तंबाकूचे थारावीक जिनस म्हारग जाल्यात. पूण ल्हान पाकिटांचें मोल पसून वाडपाक जाय. हीं पाकिटां, एक सिगारेट 50 रुपयां वयर गेली जाल्यार घडये तंबाकूचो खप देंवतलो. सिनेमा कलाकार, खेळगडे तंबाकू जिनसाचें नांव घेवन उदक, केशर, वेलचेच्या जिनसाची जायरात करतात. पूण, ते नेमके कोणाचे गुण गायतात, तें सगल्यांक बेसबरें खबर आसता. ह्या सिलेब्रिटींचे लाखांनी समर्थक आसात. तांचें अनुकरण ते करतात, हें आमी विसरूंक फावना. तंबाकूंत भिरांकूळ रसायनां आसतात. गुटख्याचो दाग शर्टाचेर पडल्यार तो वचना, मागीर पोटांत कितें जातलें, हाचो विचार दरेकल्यान करचो. वेसनाक लागून तो मनीस सोंपताच, पूण ताचे वांगडा ताच्या घरच्यांक मानसीक, शारिरीक त्रास जातात. समाजांतलो मान उणो जाता. जागृताय करतकच थोडे लोक सुदारतात. वेसनांचे वाटेक वचनात, मात थोड्यांक दंड, बंदखण हेच उपाय योग्य. कर्नाटकान नवो कायदो चालीक लायला, पळोवया कितें जाता तें?