भांगरभूंय | प्रतिनिधी
सिलेब्रिटी सिगरेट ओडप, तंबाकू लिपचोरयां भरिल्ले पदार्थ हांच्यो जायराती करतात ताचो भुरगे, तरनाटे हांचेर परिणाम जाता
संवसारभर दर वर्सा 31 मे दिसा संवसारभर तंबाकू आड दीस (नो टोबेको डे) मनयतात. आमच्या गोयांत तंबाकूक चुरोय म्हणटात. तंबाकू वापरपाचे धोके, तंबाकू कंपनींचो कायद्याक छेद दिवपी प्रसार, लागोपाठच्यो वेवसायीक पद्दती, तंबाकूच्या वापरा आड झुजपा खातीर संवसारीक भलायकी संघटना (डब्ल्यूएचओ) कितें करता आनी संवसारभरांतल्या लोकांनी भलायकी आनी भलायकेन जिणेचो हक्क सांगपाक आनी फुडल्या पिळग्यांची राखण करपाक कितें करूं येता हाची म्हायती ह्या वर्सुकी निरिक्षणांत लोकांक मेळटा.
तंबाकू आनी ताच्या उत्पादनाच्या सेवनाक लागून जावपी धोको आनी ताचो कुटुंब, समाज आनी पर्यावरणाचेर जावपी वायट परिणाम हांचे विशीं जागृताय करपाक संवसारीक भलायकी संघटणेन हो दीस घडोवन हाडला. तंबाकूचो वापर आनी ताचें सेवन हें जायत्या प्रकारच्या कॅन्सराचें एक मुखेल कारण. जशें पुलमांव, स्वरयंत्राचें तोंड, अन्ननलिका, गळो, मुत्राशय, मूत्रपिंड, यकृत, पोट, स्वादुपिंड, कोलन आनी गर्भाशय ग्रीवा तशेंच तीव्र मायलोइड ल्युकेमिया. तंबाकूच्या सेवनाक लागून संसारभर दरवर्सा 1 कोटी वयर लोकांक मरण येता, असो अदमास आसा.
तंबाकूचो फकत भलायकेचेर परिणाम जायना, पूण पर्यावरणाचेरय जायत्या तरांनी वायट परिणाम जाता. पुण पयशान गडगंज असो हो उद्येग हेंच लिपोवन उडोवपाक वावुरता. देखून अंदूं, 2025 वर्सा, संवसारीक तंबाकू आड दिसाचो विशय आसा : ‘अनमास्किंग द अपील: एक्सपोजिंग इंडस्ट्री टॅक्टिक्स ऑन टोबेको अॅंड निकोटीन प्रोडक्ट्स.’ तंबाकू आनी निकोटीन उद्देगांनी आपलीं असुरक्षित उत्पादनां आकर्शक करपा खातीर वापरिल्लीं चुकीचीं तंत्रां उक्तीं करपाचेर आनी तांकां आव्हान दिवपाचेर हो विशय केंद्रीत केल्लो आसा- खास करून तरणाट्यांक. फाटल्या वर्सा संवसारीक तंबाकू आड दीसाचो 2024 विशय आसलो: तंबाकू उद्देगाच्या हस्तक्षेपा पसून भुरग्यांची राखण करप.
ह्या दिसाचें म्हत्व कितें?
संवसारभर वर्साक सुमार 35 लाख हेक्टर जमीन तंबाकूच्या शेता खातीर वापरतात. तंबाकूच्या शेताक लागून वर्सुकी रानां कापपाचो अदमास 2 लाख हेक्टर आसा. तंबाकू उत्पादनाचो पर्यावरण यंत्रणेचेर खूब चड विध्वंसक परिणाम जाता. कारण मको पिकोवप आनी पशुधन चरप अशा हेर शेतकी वेवसायांच्या तुलनेत तंबाकूच्या शेतजमनींत वाळवंटीपण (जैविक उत्पादन क्षमताय उणी जावप) चड प्रमाणांत आसता. ते भायर तंबाकू पिकोवपा खातीर रसायनीक सारें आनी कीटकनाशकांचो चड वापर करचो पडटा. ताका लागून जमनीची पिकाळसाण उणी जावंक शकता. तशें जाल्यार हेर अन्न पिकांचें उत्पादन उणें जावंक शकता.
तंबाकू वेपारी पीक म्हणून पिकयल्यार गरीब आनी मध्यम उत्पन्न आशिल्ल्या देशांतल्या टिकावू अन्न उत्पादनाक धोको निर्माण जावंक शकता. तंबाकू पिकोवपी व्हड प्रदेशांतले भोवतेक (90%) उण्या आनी मध्यम उत्पन्नाचे देश आसून, चार देश उण्या उत्पन्नाच्या अन्न उणावाच्या राश्ट्रांच्या वर्गांत आसात.
वयले परिस्थितीच्या संदर्भात तंबाकूची लागवड आडावपा खातीर आनी शेतकारांक हेर अन्न पिकांचे लागवडींत संक्रमण करपाक मदत करपा खातीर कायदेशीर कारवाय करपाची बेगोबेग गरज आसा. संवसारीक तंबाकू आड दीस वर्सुकी विशय आशिल्ली मोहीम चलोवन वयल्यान सांगिल्लीं उद्दिश्टां साध्य करपाक वावुरता.
दिसाचो इतिहास
संवसारभरांतल्या भौशीक भलायकेचेर तंबाकू वापराचो विध्वंसक परिणाम (मरण आनी रोग) विशीं जागृताय करपाक १९८७ वर्सा संवसारीक भलायकी संघटनेच्या राज्य वांगड्यांनी “संवसारीक तंबाकू आड दीस” स्थापन केलो. सुरवेक संवसारीक भलायकी सभेन १९८७ वर्सा ७ एप्रिल १९८८ हो ‘संवसारीक धूम्रपाना आड दीस’ जाहीर केलो. १९८८ वर्सा ३१ मे दिसा संवसारीक तंबाकू आड दीस म्हूण थारायलो.
तरनाट्यांक आनी भुरग्यांक तंबाकूचे व्यसन वायट संगत, डिप्रेशन सारक्या गजालींतल्यान लागूं येता. सिलेब्रिटी सिगरेट ओडप, तंबाकू लिपचोरयां भरिल्ले पदार्थ हांच्यो जायराती करतात ताचो भुरगे, तरनाटे हांचेर परिणाम जाता, हें जायते सिलेब्रिटी पयशां मुखार विसरतात हेंच आमचें एक व्हड दुर्दैव!
– प्रकाश वा. कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
