भांगरभूंय | प्रतिनिधी
राज्यांत तंबाकूचेर बंदी आसली तरी आयजूय रस्त्यांचेर उबे रावून तरणाटे सिगरेटी ओडटना, गुटखा खातना नजरेक पडटात. धूम्रपान, सोरो पियेवप आनी तंबाकू खावप हाचें प्रमाण दिसान दीस वाडत आसा. हें वेसन म्हणल्यार एक फॅशनूच अशें तरणाट्याक दिसपाक लागलां. थोड्यांत ती प्रतिश्ठा दिसता.
सिगार, सोरो, तंबाकू, गुटखा, मावा, चरस, गांजा हे जीनस तरणाट्यां मेरेन पावल्यात. हाचेर नियंत्रण दवरप तशें कठीणूच. कांय नट जायरातीं वरवीं ह्या जिनसांच्या वेसनाक उर्बा दितात. जायरातींचे पोस्टरुय लायिल्ले दिसतात. ताका लागून तांचें अनुकरण करपी तरणाटे वेसनाक बळी पडटात. हाताचेर तंबाकू घेवन तो चोळीत बसपी तरणाटे गोंयांतूय दिसपाक लागल्यात. तंबाकू खावप भलायकेक सामकें घातक. ताका लागून कॅन्सरुय जावं येता. तंबाकू खावपी लोक स्वता वांगडा दुसऱ्यांचें जिवीतूय पिड्ड्यार करतात. तंबाकून फुफ्फूसाचो कॅन्सर जावं येता. काळजाचो आताक, स्वासाचे विकार, दातांच्यो समस्या निर्माण जातात. रोगप्रतिकार शक्त उणी जाता. धूम्रपानाक लागून तोंड, गळो, पोट, किडनी, मुत्राशयाचो कॅन्सर जाता. रक्तवाहिन्याचो विकार जाता. काळजांत दुखता. मेंदवाचे विकार जातात. तंबाकू हो सामको वायट.
जर कोणाक तंबाकू, सिगारेटीची तल्लफ आयली जाल्यार दालचिनीचो ल्हानसो कुडको तोंडांत उडोवचो. तल्लफ उणी जाता. मन मेकळें जाता. ह्या वेसना पसून सुटपाक संत्रें, पेरां, स्ट्राॅबेरी, आपोल, लिंबू अशीं व्हिटामीन आशिल्लीं फळां खावप बरें.
तंबाकू, गुटख्याचेर पयलीं खर बंदी घालपाक जाय. ती आसा. पूण, विकपी लीपचोरयां विकतात. गुटखो खावपी सगले कडेन पिचकाऱ्यो मारून वाठार इबाडटात. तांकां दंड दिवपाक जाय. जनजागृताय करपाक जाय. तशें केल्यार हो मनस्ताप मात तरी कमी जातलो. तशें जाल्यार आमच्या लोकांची भलायकी सुदारतली.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
