भांगरभूंय | प्रतिनिधी
भावंडांनो,
काल देशभरांत तंबाकू सेवना आड जागृताय घडोवन हाडपा खातीर विंगड विंगड कार्यावळी जाल्यो. जागतीक तंबाकू विरोधी दीस पाळ्ळो. ते निमतान भलायकी केंद्रांनी, समाजीक संस्थांनी, संघटनांनी तंबाकू आड जागृताय मोहिमो राबयल्यो. गांवागांवांत तंबाकू सेवनाचे वायट परिणाम सांगपी कार्यावळी घडोवन हाडल्यो.
भावंडांनो, तुमी म्हणटलीं आमी तंबाकू खायनात. मागीर भाई आमकां कित्याक ह्यो गजाली सांगता? तशें ना, भावंडांनो. तुमी तुमच्या शाळेच्या वा खंयच्याय कार्यालयाच्या आंवाठांत तंबाकू वा सिगार विडी आड जायतात पळयल्या? वा फलक लायिल्लो पळयला? शाळेच्या आवाठांत कोणूय सिगार, विडी वा तंबाकूचो आसपाव आशिल्लो जिनस खातना दिश्टी पडल्या ते विशीं शाळेच्या मुखेल्यांक कळोवंक शिटकावणी दिल्या. भावंडांनो, हे फलक काल वा पयर लायिल्ले न्हय. ते बरेच आदीं तुमच्या शाळांनी लायिल्ले. पुणून तुमची नजर ताचेर पडूंक ना. पडल्या आसत पुणून तुमी ते गंभीरतायेन घेवंक ना. ते शाळांच्या आंवाठांत कित्याक लायतात जाणांत तुमी? सांगतां
भावंडांनो, दर वर्सा देशभरांत लाखांनी तरणाटे ह्या तंबाकू सेवनाचे बळी थारतात. सांगपाक लेगीत भंय दिसता पुणून स्पश्टपणान सांगतां. तंबाकुचे सेवन करतल्यांक कांक्राचें दुयेंस जाता. तांकां तें वेसन लागलें म्हणटकच तातूंतल्यान ते बरे जायनात आनी तांच्या जिवाक धोको उप्रासता. तुमी पळयलां? शाळे भोंवतणी, बांदकामां चलतात, थंयचे कामगार तंबाकू खातना दिश्टी पडटात. तंबाकू खाले बगर काम करपाक तांकां उमेद येना, नेट येना, अशे ते म्हणटात पुणून तांकां ताचो व्हड परिणाम भोगचो पडटा. तांचे कडेन तुमचो संपर्क आयल्यार तांच्या उतरांनी तुमचेर परिणाम जालो जाल्यार तुमी वायट वेसनाक बळी पडचे न्हय. देखुनूच तुमकां सांगतां. दुसरी म्हत्वाची गजाल म्हणल्यार जर घरांत वा शेजरा कोणूय तंबाकुचें, सिगाराचें वा विडीचें सेवन करता आसत जाल्यार तुमी तांकां शिटकायात. ताचे परिणाम सांगात. जिवीत सुरक्षीत उरतलें जाल्यार तंबाकूचें सेवन करचें न्हय म्हूण तांकां सांगात.
थोडे भितर सांगपाचें म्हणल्यार भावंडांनो, ह्या तंबाकुच्या जिनसांनी निकोटीन आसता. तें मनशाच्या जिवाक खूब घातक आसता. ताच्या सेवनान काळजाचे ठेके वाडटात, रक्तदाब वाडटा, कुडींतल्या रगताच्यो शिरो आवळून येतात, रगत सारकें घोळना, अशे खूब तरेचे त्रास आनी परिणाम आमचे भलायकेचेर जातात. हाचे पासून जावपी रोग, दुयेंस मागीर वखदांनी सारकें जायना. अखेरेक हें वेसन मनशाची जीण सोंपयता. ताका लागून आमी सगळ्यांनी जबाबदारेन वागप गरजेचें. जो कोण वायट वागता, वा तंबाकूचें सेवन करता ताका ताचे वायट परिणाम सांगपाचें आमचें कर्तव्य आसा. ते दिशेन आमी वावरुया आनी तंबाकू विरोधी दिसाच न्हय तर हेर दिसांनीय ह्या वेसनाक विरोध करुया.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
