तंबाकूक लागून तकली आनी मानेचो कॅन्सर
भांगरभूंय | प्रतिनिधी
भांगरभूंय । खबरां संस्था
कर्करोग हें एक धोक्याचें दुयेंस. ताका लागून मरण येवपी लोकांचो आंकडो वाडत आसा. कुडीच्या खंयच्याय भागांत कर्करोग जावंक शकता. धूम्रपान आनी तंबाकूचे सेवन हीं ताचीं मुखेल कारणां. तंबाकूचें सेवन केल्यार फकत तोंडाचो कॅन्सर जाता, असो समज आसा, पूण तंबाकूक लागून तकलेचो आनी मानेचोय कॅन्सर जावंक शकता अशें दोतोर सांगतात.
देशांतल्या वट्ट कॅन्सर दुयेंतींतले सुमार 20 टक्के कॅन्सर दुयेंती तकले आनी मानेचे आसात. ह्या दोनूय कॅन्सराचे 40 टक्के दुयेंती धूम्रपान आनी तंबाकूचे सेवन करपी आसात. लोकांक ह्या कर्करोगाची लक्षणां सहज कळनात.
एचसीजी कॅन्सर सेंटर तकली आनी मान शस्त्रक्रिया ऑन्कोलॉजीचे संचालक सांगतात की तंबाकूंत नायट्रोसामाइन्स आनी पॉलीसायक्लिक सुगंधी हायड्रोकार्बन आसतात, जे कॅन्सराची वाड करता. तंबाकू, तोंडाची भलायकी इबाडपा वांगडाच सोऱ्याच्या चड सेवनाक लागूनय ह्या कॅन्सराचो धोको वाडटा.
तकलेच्या आनी मानेच्या कर्करोगाची लक्षणां
- तोंडाचें दुबळेंपण
- मानेंत खर दुखप
- उलोवपाक आडखळ जावप
- गिळपाक त्रास जावप
- तोंडांत तांबडे दाग येवप, जे बरे जायनात
- सतत तकली दुखप
तकलेचो आनी मानेचो कॅन्सर जावचो न्हय म्हूण तंबाकूचे सेवन आनी सोरो पियेवप उणें करचें. तशेंच पिरायेच्या 30 वर्सां उपरांत नेमान कॅन्सराची तपासणी करची. कॅन्सरा कडेन संबंदीत खंयचीय लक्षणां दिसल्यार ती तपासात. वेळार चांचणी केल्यार कॅन्सराचो दुयेंस बेगीन मेळटलो आनी ताचेर फावो तो उपचार करुन फुडाराक गंभीर धोको टाळूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
