भांगरभूंय | प्रतिनिधी
काशिनाथ नायक:ठाणे सरकारी विद्यालया वतीन वाळपय वाठारांत जागृताय पत्रकां वाटलीं
वाळपय: तंबाकुचे पदार्थ आनी सोरो, ड्रग्स सारकीं वेसनां तरणाट्यांची जीण वाट लावन उडयता. ही वेसनां देशाच्या विध्वंसाक कारण थारतात. हे सगळे आडावपा खातीर समाजान आतां वेसना आड एकवटान लढो उबारचो पडटलो. वेसनांतल्यान सुटका मेळोवपा खातीर सरकार खूब यत्न करता. पूण हाका लागून सरकाराक सहकार्या करप हें दरेकल्याचें अर्तव्य. तंबाकुच्या पदार्थां पसून भलायकी इबाडटा आनी शरिराक वायट अशे रोग जायत रावतात. ताका लागून दरेकल्याची जीण फुलचे खातीर हातांत हात घालून ह्या कामाक सहकार्य करपाची मागणी ठाणे सरकारी माध्यमीक विद्यालयाचे मुख्याध्यापक काशिनाथ नायक हांणी केली.
हे विशीं येस मेळोवचें आसल्यार गांवांगांवांनी जागृताय जावप गरजेचें.
तंबाकू खाल्ल्यान देशांत हजारांनी लोक मरतात. हे विशीं जागृताय जाता तरी तरणाटीं तंबाकुच्या उत्पादनांचो वापर नेटान करतात. तंबाकुच्या उत्पादनांक लागून जावपी दुयेंसांचेर उपचार करपा खातीर कोट्यानी रुपया खर्च करचे पडटात. हे पदार्थ बंद केल्यार हो खर्च व्हड प्रमाणांत वाचूंक शकता. ही रक्कम आमी कल्याणकारी येवजण्यो चालीक लावपा खातीर आनी देशांतल्या सादारण घटकांचे उदरगती खातीर खर्च करूंक शकतात. हाका लागून देशाचे उदरगतींत सगळ्यांचें योगदान खूब म्हत्वाचें. ताका लागून सगळ्यांनी आपल्या वाठारांतल्या लोकांक तंबाकुच्या वेसनान जावपी वायट परिणामां विशीं म्हायती दिवपाचो यत्न करचो अशी मागणी नायक हांणी केली.
ज्येश्ठ शिक्षक गणेश गावडे हांणी ह्या वेळार घराघारांनी वचून पत्रकां वाटपाचेर भर दिली. ज्या घरांत नागरीक तंबाकुचे पदार्थ वापरतात तांकां हे विशीं वायट परिणामांची म्हायती दिली. येवपी काळांत अशे तरेचे पदार्थ खाल्ल्यार खंयच्या समस्यांक तोंड दिवचें पडटलें हे विशीं म्हायती दिवन खुबश्या जाणांक सतर्क करपाचो यत्न केलो. ठाणे सत्तरीच्या हिरोजीराव बाबुराव देसाय सरकारी माध्यमीक विद्यालया वतीन विद्यार्थ्यांनी ठाणे हिवरें, चरावणे गांवांत वचून रस्तो नाचा वरवीं जागृताय केली. ह्या वेळार रॅली काडली. घराघरांनी वचून हे विशींचीं पत्रकां वाटलीं.
ह्या वेळार ज्येश्ठ शिक्षक गणेश गावडे
हांणी लोकांक विवीध म्हायती दिली. शिक्षीका नलिता गांवकार, भारती केरकार परेश गोवेकार, आनंद गांवकार, गोकूळदास गांवकार हांचें विशेश योगदान लाभलें.
पथनाट्याचें लेखन शिक्षक साईश नायक हांणी केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
