भांगरभूंय | प्रतिनिधी
वास्को: सिगारेट आनी हेर तंबाखुचीं उत्पादनां खाल्ल्यान आनी कायदो २००३( कोटपा)मोडिल्ल्यान मुरगांव तालुको अंमलबजावणी पंगडान आठ संबंधितां कडल्यान २४०० रुपया दंड वसुल केला. अजाप करपा सारकी गजाल म्हणल्यार, हो कायदो मोडपाचो प्रकार केंद्र सरकाराच्या कांय आस्थापनां कडल्यानूच जाता अशें गोवा कॅनचे समन्वयक रोलँड मार्टिन्स हांणी सांगलें.
मुरगांवचे जोड मामलेदार जेनिफर फर्नांडीस हांच्या नेतृत्वा खाला गोवा कॅनचे रोलँड मार्टिन्स, वास्को शार भलायकी केंद्राचे सॅनिटरी इन्स्पेक्टर दयानंद ठक्कर, मुरगांव म्हाल मामलेदार कार्यालयांतले सर्कल इन्स्पेक्टर हनुमंत मांद्रेंकार, तलाठी गौतम साळुंके आनी पुलीस शिपाय यासिन शिंगनगुट्टी हांचो आसपाव आशिल्ल्या पंगडान शार वाठारांत पळोवणी केली. रेल्वे स्टेशना कडेन पळोवणी केली तेन्ना, थंय सिगारेट ओडची न्हय असो तक्टो खंयच लागिल्लो दिसूंक ना. प्रवेदाराचेर, तशेंच फलाट, कावंटराचेर ‘सिगरेट पिवची न्हय’ अशे तक्टे लावपाची गरज आशिल्ली. मात हाचे कडेन आडनदर जाल्या. हे विशीं दखल घेवन रेल्वेच्या संबंदीत अधिकार्यां कडल्यान एक हजार रुपयांचो दंड वसूल केलो. अशीच गत वास्को पोस्ट ऑफिसाचीय आशिल्ली. थंयूय तखटो नाशिल्ल्यान शंबर रुपया घेतले. कोर्टाच्या कलम चारचो नेम मोडिल्ल्याचे आठ गुन्यांव दाखल केले. हातूंत दुकानां, फास्ट फूड, पोस्ट ऑफीस, रेल्वे स्टेशनाचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
