भांगरभूंय | प्रतिनिधी
नवनिर्मणेचो ध्यास, तंत्रज्ञानाची आवड, मार्केटिंगांतली कुशळटाय, सतत मुखार वचपाच्या आनी येसस्वी जावपाच्या गुणांक लागून स्टीव्ह जॉब्स हो संवसारीक किर्तीचो तज्ञ थारलो.
आयच्या टेक्नोसॅव्ही युगांत मोबायल, आयफोन, टॅब्लेट, कॉम्प्युटर, लॅपटॉप हीं उपकरणां वापरपी खंयच्याय व्यक्तीक स्टीव्ह जॉब्स हें नांव खबर ना जाल्यार अजाप कशें. स्टीव्ह जॉब्स, जांणी ॲपल ही कंपनी सुरू केली आनी ती आयज जगांतली सगळ्यांत येसस्वी कंपनी जाल्या, त्याच ॲपल कंपनीचो संस्थापक, तंत्रज्ञानाचो बादशहा स्टीव्ह जॉब्स हांची पुण्यतीथ फाटल्या आयतारा जाली.
स्टीव्ह जॉब्स हांचो अमेरिकेंतल्या ग्रीन बे गांवांत जालो. सिरियाचो मुस्लिम विद्यार्थी अब्दुल फतेह आनी जोहान शिबिल हांणी लग्ना आदीं जल्मल्लें भुरगें पॉल- क्लारा जॉब्स ह्या आर्मेनियन कुटुंबाक दत्तक दिल्लें. दत्तक घेतना ह्या कुटुंबान ह्या भुरग्याक पदवी मेरेनचें शिक्षण दिवचें अशी तांकां अट घाल्ली.
स्वता गरीब आसून लेगीत, खर कश्ट काडून जॉब्स दांपत्यान दिल्लें वचन पूर्ण केलें. ल्हान आसतना स्टीव्ह एकमुळो आशिल्लो. हायस्कूलांत आसताना स्टीव्हाक ह्युलेट पॅकर्ड या कारखान्यांत काम करपाची संद मेळ्ळी. थंय ताची वळख व्होजनिया वांगडा जाली. तेन्ना तो 16 वर्सां पिरायेचो आशिल्लो आनी स्टीव्ह व्होजनियाक 21 वर्सां आशिल्लीं. दोगांकय तंत्रगिन्यानाची आवड आशिल्ल्यान दोगूय एकामेकाचे बरे इश्ट जाले. व्होजनियाकान व्हिडिओ गेमीचो टेलिटायप आनी मायक्रोप्रोसेसर तयार केलो. स्टीव्ह जॉब्साक ताचेर खूब विस्वास आशिल्लो. 1970 उपरांत कंप्युटर मळार नवे नवे बदल आनी प्रयोग जायत आशिल्ले. नवनिर्मितीचो ध्यास आशिल्ल्या स्टीव्ह जॉब्स हाणें 1976 वर्सा व्होजनियाकाचेर कंप्युटर निर्मितीची जबाबदारी दिली आनी आपणें स्वता मार्केटीगांचेर लक्ष घालें. कंप्युटर तयार जातकच तांची कंपनीय जाली. तांकां 50 कंप्युटरांची ऑर्डरय मेळ्ळी. तांचे कडेन तंत्रज्ञानाची पदवी नाशिल्ली, पूण कल्पना आशिल्ल्यो आनी वेवस्थापनाची कुशळटाय आशिल्ली. ताणें तंत्रज्ञानांत हुशार आशिल्ले व्यक्ती निवडले.
लोकांक कितें जाय आसता हाचो सोद घेवन तांणी बाजारांत तशीं उपकरणां हाडलीं. तांणी बाजारांत हाडिल्ल्या ॲपल 1 पीसी ह्या पर्सनल कॉम्प्युटराक खूब मागणी आशिल्ली. कंपनी चलयतना स्टीव्हान खूब बरे निर्णय घेतले. पूण हें करतना ताणें कितलेशेच जाणांचीं मनां दुखयलीं. अखेरेक ताणें आपणेंच स्थापन केल्ली ॲपल कंपनी सोडली. 1886 वर्सा ताणें चित्रपट दिग्दर्शक जॉर्ज लुकासा वांगडा भागीदारी करून एक कंपनी स्थापन केली. त्या कंपनीचें नांव पिक्सार अशें आशिल्लें. हे कंपनीन ॲनिमेशन सिनेमा तयार केले. ते खूब गाजले. हे कंपनीन वॉल्ट डिस्ने वांगडा कबलात करून खूब पयशे कमयले. हांगां स्टीव्ह जॉब्स सोडून गेल्ल्या सावन ॲपल कंपनी मात लुकसाणांत आयली.
मागीर 1997 वर्सा स्टीव्ह जॉब्स परत ॲपल कंपनींत परतलो. आपल्या कल्पक बुद्धीन ताणें ॲपल कंपनीक परत पयल्या नंबराचेर हाडली. आयबीएम, मायक्रोसॉफ्ट ह्या कंपन्यांनी कॉम्प्युटर मळार मक्तेदारी सिद्ध केल्ल्यान कितें तरी नवें करपाची उमेद स्टीव्हाक आयली आनी तातूंतल्यान आयफोन, आयपॉड, आयपॅड बाजारांत आयले. लोकांनी ते उखलून धरले. 2001 त ॲपलान 5 गिगाबायट तांकीचो आयपॉड तयार केलो. हो सगळ्यांत ल्हान म्युजिक प्लेयर आशिल्लो. तातूंत एक हजार पदां स्टोअर जातालीं. हो आयपॉड रोखडोच लोकप्रिय जालो. ह्या आयपॉडान वॉकमनाक सामकोच काबार केलो. 2007 त ॲपलान टचस्क्रीन मोबायल मार्केटांत हाडलो. टचस्क्रीन आनी सामक्या सोंप्या इंटरफेसाक लागून तो खूब लोकप्रिय जालो. थ्रीजी मोबायल लेगीत ॲपलानूच सगल्यांत पयलीं मार्केटांत हाडलो. 2010 वर्सा आयिल्ल्या पयल्या टॅबलेट पीसीन जगभरांतल्या गॅजेट मोग्यांक आकर्शीत केले. सतत नवीन कितेंतरी करून तंत्रज्ञानांत आपलें वर्चस्व निर्माण करपी स्टीव्ह जॉब्स हांकां भारता विशीं खूब प्रेम आशिल्लें. ते खूब फावट भारतांत येवन गेले. भारतांतलें अध्यात्म आनी बौद्ध धर्मा विशीं तांकां खूब कुतूहल आशिल्लें.
नवनिर्मणेचो ध्यास, तंत्रज्ञानाची आवड, मार्केटिंगांतली कुशळटाय, सतत मुखार वचपाच्या आनी येसस्वी जावपाच्या गुणांक लागून स्टीव्ह जॉब्स हो संवसारीक किर्तीचो तज्ञ थारलो. ताचो प्रतिस्पर्धी मायक्रोसॉफ्ट कंपनीचो मालक बिल गेट लेगीत ताच्या ह्या गुणांची कदर करतालो. बिल गेटान ताका आधुनिक युगाचो एडिसन अशी पदवी दिल्ली.
5 ऑक्टोबर 2011 दिसा पिरायेच्या 56 व्या वर्सा तंत्रज्ञानाचो हो बादशहा संवसार सोडून गेलो.
श्याम ठाणेदार
99222 546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
