भांगरभूंय | प्रतिनिधी
गडगड नासतना आषाढ पावळेंत घोग्यांनी पावस रकता. चार दीस आदींच सुरू जाल्लो पावस थांबपाचें चिन्न ना. घोग्याच्या पावसांत बारावी मेरेनच्या विद्यार्थ्यांक सुटी मेळटा. भुरगीं घरा. आवय बापूय कचेरेंत अशेंय चित्र आसतलें. भुरग्यांक कचेरेंत घेवन येवपी थोडे पालकय नासतले अशे न्हय. तांकां घुस्पावन दवरपाक पुस्तकां, खेळ, मनरिजवणेक कला आतां घरांत, हातांतय पावल्या. थोड्यो शाळा, विद्यालयांतल्या शिक्षकांचे मजतीन सुटये दिसा घरांत बशिल्ले सुवातेर विद्यार्थ्यांक गिन्यानय दितात. चार वर्सा आदीं आयिल्ल्या कोविडांतल्यान ज्या सुविधांची निर्मणी जाल्ली ते हुवांर हाडपी पावसांत उपेगी. तंत्रगिन्यानांतल्यान फुडारांत पावसाचे तीन चार म्हयने कला, शिक्षण घरांत दिवपी सुपुल्ले स्टुडियोज, घरांची गरज आसा. गोंयच्या गांवांगांवांनी नासले तरी तालुको पांवड्यार तशी भोंवतण जल्माक येवपाक लागल्या. पावसा खातीर होरावणी घालपी घन बरसे रे, मेघा रे,आला आला वारा, पड रे पावसा वरी गीतां घरांनी तातूंतल्यान पावतात.
मागीर त्या मन भुलोवपी पणजेंतल्या कला अकादमीचो हुस्को कित्याक?
कला अकादमी हें फक्त कलेचें आंगण न्हय, थंय चकाटां मारपाक, नाटकाच्या येसायांक येवपी आशिल्ले. शिक्षक दिसा सारक्यो कार्यावळी, संमेलनांतल्यान झगडीं, झुजां, आंदोलनांय कला अकादमीन पयलीं पळयिल्लीं. पावसांतय कौशल्य विकासाची कार्यावळ सोबीत माटोव घालून जाली. स्वयंपूर्ण, स्वयंसिद्धतेक बळगें दिवपाची ती नवी वाट. राजकारणय ते वाटेर वतना जातलेंच. ताचे परस संवसारबुडी, चंद्रार पडिल्लो बुराक, खेळांगणाच्या कोनशार फुलिल्लीं अळमी, भारत म्हासत्ता जावपाचो वगत लागीं येता तें सांगपी खबरो म्हत्वाच्यो. त्या खबरांतल्यान कळटली फुडाराची दिका, जातल्यो मनीसजीण, सैम वाटावपाच्यो येवजणी. गोंया सारकें ल्हान राज्य व्हड राज्यांचे रांकेत वचून बसता, बसपाक, फुडें सरपाक जाय तितलो पयसो मेळटलो, सांबाळात पयलींची नीती, सैम, मांडवी, म्हादय. नाटकुलीं, चित्रां, गीतांतल्यान शिक्षण घरा दिवपी, पावोवपी गोंयांतलें, गोंयांत येवपी गुरू नवनिर्मणे खातीर वाट दाखयतले. ते वाटे वेल्यान वचपाची येवजण तयार आसा. दोन अडेज वर्सांत एखाद्रे भारतरत्न लता मंगेशकार अकादमी पणजेंत येतली अशी आस्त आसा.
गोंयचे शास्त्रीय संगीत, नाटक शिक्षण दिवपी कला अकादमीचें फांटे, रुपां कुडचडें, सांखळे, सांकवाळे, फोंडें, मडगांवां, दिवचले, कळंगूटे, काणकोणां पावल्यांत. बालभवनां, संगीत, नाटक, कला विद्यालयां, म्हाविद्यालयांतल्यान व्हड जाल्ले डाॅ. सुबोध केरकार, समिक्षा भोबे काकोडकार, गौरी भट, रुपेश गांवस, हेमा सरदेसाय, प्रवीण गांवकार, महेश वेंगुर्लेकार आनी हेर विद्यार्थी त्या फांट्यांनी, स्टुडियोंनी शिकयतात. तांकां आनी गोंया भायल्या, गोंया कडेन नातें आशिल्ल्या कला, संगीत, वाद्य, सिनेमा, नाटक कलाकारांक, दिग्दर्शकांक एकठांय हाडपी कला अकादमीचें साबार मंडळ जावचें. कला अकादमीचें अध्यक्षपद सांबाळपी कलाकार, मंत्री गोविंद गावडे वरिश्ठांक, उत्कृश्टतायेक ह्या मंडळार हाडटले ही अपेक्षा. गोंयचें नाटक देश पांवड्यार पावोवपी, वर्षा उसगांवकार हांचे वरी कलाकार घडोवपी रविंद्र आमोणकार, डाॅ. अजय वैद्य, डाॅ. राजेंद्र तांबा, दीपक आमोणकार, मैथीली ठाकूर, आदित्य जांभळे तांचे वांगडा आसात. पंडित जितेंद्र अभिषेकी हांचे पूत शौनक अभिषेकी हांच्या सपनांतली कला शिक्षण अकादमी नवे येवजणेंत आस्पाविल्ली आसतली. कलांगण, मडगांव संस्थेची स्थापना करपी दिग्दर्शक, निर्माते राजेंद्र तालक तांचे मार्गदर्शक आसतले. नवी कला अकादमी कलेच्या मुठी मुठींच्या निधींतल्यान उबारपाची तयारी दवरची. तातूंत तियात्रिस्तां पासून नाटक, संगीत, नाच, कला, फिल्माच्या स्टारांचो वांटो कित्याक आसचो न्हय?
पणजेंतल्या आत्माराम बोरकार मार्गार अर्थीक आजच्या विकास म्हामंडळाचे सुवातींतल्यान कला अकादमी दयानंद बांदोडकार मार्गार आयली. आसा तेच सुवातींत नवे कला अकादमीचे बांदावळीक रोखडोच आरंभय जायत, तरणाट्या अणभवी आर्किटेक्ट, इंजिनियरां कडेन भासाभास करून. कला अकादमीची सरभोंवतण बदल्ल्या, पाचवोताल्ल वाठार वाडटा, नवीं बांदकामांय जाल्यांत कला अकादमीतय. अणभवी इंजिनियर्स, आर्किटेक्टर्सांचे नदरेंतल्यान आसा ती सुवात नवे कला अकादमीक फावो तशी नासल्यार लागसार मेळटलीच. चार्लस कुर्रैया फावंडेशनाचें आर्किटेक्चर अज्रंवर उरतले, पूण उपरांत अभ्यासक्रमांत बदल जावंक ना? कले खातीर ओंपिल्ले आर्किटेक्चर आयलां ? संवसारभर गोंयकार आर्किटेक्ट, इंजिनियर आसतले, तांच्या विचारांतल्यान कला, साहित्य अकादेमी बांदपाक येता. भौशीक बांदकाम खात्यांत भांगरा पदक मेळिल्ले इंजिनीयर आसात. मुख्यमंत्र्यांच्या कार्यालयांत, सचिवालयांतय आसतले. आर्किटेक्चर म्हाविद्यालयाक सेवा दिवपी गुणेस्तांक कितें दिसता? ते तशेंच संगीत म्हाविद्यालयाचे पयलींचे, आतांचे प्राचार्य शौनक अभिषेकी वांगडा आसतलेच.
कला अकादमीचें मूळ कला आनी संगीत शिक्षणाचें. कला, संगिता बराबर फुटबाॅल, क्रिकेट, बॅडमिंटन, टेबल टेनीस खेळां खातें सांबाळटना कला आनी संस्कृती मंत्र्यांक उठाबशी काडच्यो पडटल्यो. मात्शे फाटी फुडें जालें तरी कला अकादमी विशीं अंदूं अचूक जाप तांचे कडल्यान मेळटली? कला अकादमी आमची चाफेकळी अशे तें सांगतलेच, नाटकां परस तियात्रां चड जालीं ताचो हिशोब मेळटलोच. फुडारांतली कला, साहित्य अकादमी स्मार्ट सिटींतली, स्मार्ट आसतली हें उतर तांणी दिवचें. अभ्यासाच्या वज्या खाला भुरगीं आसतात तेन्ना संगीत, कलेचें शिक्षण घेवचें असो रकाद पावोवपी गुरू गोंयांत आसात. गोंय विधानसभेचे सभापती रमेशबाब तवडकार हांचे बराबरीन गोविंदबाब बंदखणींत कित्याक गेल्ले? सभापती, कला आनी संस्कृती मंत्र्यांनी दोन उतरां विधानसभेंत सांगचीं. तांणी कोणाचे हात, पांय कापूंक ना, ते शहाजहान न्हय. ते भारतीय इंजिनियर, शिक्षक, भूंयपूत.
कलेचीं कितलिंशींच घरां गोंयांत जातात तेन्ना कला अकादमीक मात्सो विसव दिवचो. कला अकादमी लागींच पणजे जिमखान्यांत बरें सभाघर, खेळांगणय आसा. कलाकार, सरकार ताचोय उपेग करूंक शकतात. कांपाल परेड मैदाना वयलें नवें खेळांगण स्मार्ट सिटी खाला बांदलां, अंदूं 19 डिसेंबराक परेड, कला त्या मैदानार येतली? महाकाल, रावण, राकेस, वाग, शिंव, वागा वरी सुण्यां परस सवण्या पिलां, दुदी, दसणी, केळी, आमरायेंतलो सैम सांगात बरो, तालवाद्यां वरीं.
गोंयांत 2004 वर्सा आयिल्लो इफ्फी (भारताचो आंतरराष्ट्रीय सिनेमा उत्सव) 55 वें वर्स अंदूं मनयता. इफ्फीच्या गोंयांतल्या 20 वर्सांत, कला अकादमीच न्हय गोंयची कलाय सान प्रमाणांत उंचायेर पावल्या. गोंय मनरिजवण सोसायटीच्या दारांतय आर्ट गॅलरी आसा, पणजे झी प्लेक्स, वेंगुर्लेकार आर्ट गॅलरी आसा. अळमी, मळब, भांगराच्या खणीचीं गुपितां सांगपी वैज्ञानीक डाॅ. नंदकुमार कामत हांणी नवहिंद टायम्स दिसाळ्यांतल्या दोन लेखांनी कला अकादमीच्या फुडाराची दिका दाखयल्या. ते वैज्ञानिक, कला शास्त्राचे जाणकार. येणावळीचीं गणितां पांवड्या पांवड्यार समजावन सांगपी आदले मुख्यमंत्री आमदार दिगंबरबाब कामत सरकारा बरोबर आसात. कला, साहित्य अकादमीची बांदावळ करपाचे येवजणीचें मुळावण तांणीं घाल्लें आसतलेंच. पावसांत भिजपी कला अकादमी उंचेल्या तंत्रगिन्यानांतल्यान घरांनी पावोवपाक ते मार्गदर्शक जातले. कला अकादमीचे जतनायेचो हुस्को तांकांय आसा, कला केंद्रांचो मार्ग तांचोय.
सुहासिनी प्रभुगावकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
