भांगरभूंय | प्रतिनिधी
बुझू, खबरां संस्था : भाग्य जायत्यां कडेन आसता अशें म्हण्टात, पूण तें लक्षांत येना. हें कळटकच संवसार तांकां वेगळ्याच पांवड्यार पळयता. अशीच एक काणी हालींच्या काळांत चर्चेक आयिल्ली, जंय एक बायल दशकां सावन लिपिल्लो खजिनो वापरताली, पूण खरें कळटकच तिच्या पांयांच्या सकयल्यान जमीन हाल्ली.
ही घडणूक रोमानिया देशांतली. जंय एका ल्हान गांवांत रावपी एके जाण्टे बायलेन ‘अंबर नॅगेटा’चो वापर एक दारा खातीर करताली. वर्सांचीं वर्सां तिका ही एक सामान्य गजाल दिसताली, पूण तिचे नदरेन जो फातर आशिल्लो ताचें मोल णव कोटी रुपया (भारतीय चलनांत) आशिल्लें. थळाव्या माध्यमांनी उजवाडाक आयिल्ले खबरे प्रमाण बुझूच्या प्रांतीय संग्रहालयाचे संचालक डॅनियल कोस्ताच हांणी ते बायलेक ह्या नॅगेटाचें खरें मोल सांगलें. उपरांत ताची पुष्टी करपा खातीर पोलंडांतल्या क्राको शारांततो फांतर धाडलो. जंय तज्ञांनी तो 3.85 ते 7 कोटी वर्सां आदले अशें सांगलें.
प्रसार माध्यमां कडेन उलयतना ते जाण्टे बायलेन सांगलें की तिका तो फांतर थळाव्या मनशा कडल्यान मेळिल्लो आनी तिका दिवपी ती बायल 1991 वर्सा मेल्या. ह्या फातरा विशीं डॅनियल कोस्ताच हांणी सांगलें, ताचो सोद शास्त्रीय आनी संग्रहालय पातळेचेर खूब म्हत्वाचो. ते बायलेन म्हणलें, आतां म्हजे कडेन इतलो मोलादीक खजिनो आसा म्हूण म्हाका खूब खोस जाल्या, कारण कांय दिसां आदीं म्हाका लुटिल्ली, पूण हें रत्न चोरांचे नदरेंत आयलें ना.
एका अहवाला प्रमाण, रोमानियांत अंबराचे कांय गिरेस्त सांठे आसात, तांकां थंय ‘न्हंयेंचीं रत्नां’ अशें म्हण्टात. भूविज्ञानिक ऑस्कर हेल्म हाणें ह्या सांठ्यांक रुमानिट वा बुझौ अंबर अशें नांव दिलां. ह्या सैम राखीव वाठारांत मोलादीक अंबर मेळ्ळें. एकदां खूब मोलादीक आशिल्ली पोरनी स्ट्रॅम्बा अंबर खण मागणी आनी दर उणे जाल्ल्यान सरकारान बंद केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
