भांगरभूंय | प्रतिनिधी
पूण धावेचे परिक्षे पयलीं दिवची पडटली णववेंत उरिल्ल्या पेपरांचीं परिक्षा पणजीः णवेंत सगळ्या विशयांनी नापास जाल्यार लेगीत विद्यार्थ्यांक भिवपाची गरज ना. नापास जाल्ल्या भुरग्यांक णववेंत दवरिनासतना तांकां धावेंत बडटी दिवन धावेच्या अभ्यासा वांगडा उरिल्ले णवेच्या पेपरा खातीर परिक्षा दिवपाक मेळटली. तशेंच लुकसाण भरपाय येवजणे खाला नापास जाल्ले दोन विशय रद्द करून उरिल्ल्या विशयांतल्या पेपरात पास जाले उपरांत धावेची परिक्षा दिवपाक मेळटली, अशी म्हायती गोंय शालांत मंडळाचे अध्यक्ष भगिरथ शेट्ये हांणी दिली.
अंदूं शिक्षणीक वर्स एप्रील सावन सुरू जाता आनी 6 वी ते 10 वी मेरेनचे वर्ग 7 एप्रील सावन सुरू जातले. पूण जांणी णवेची परिक्षा दिल्या आनी एप्रीलाचे 29 वेर हे परिक्षेचो निकाल लागपाचो आसा त्या भुरग्यांचे कितें असो प्रस्न भगिरथ शेट्ये हांकां केलो.
हाचेर उलयतना शेट्ये हांणी सांगलें, णवेचो भुरगो जर सगळ्या विशयांत नापास जालो जाल्यार ताका णवेतच दवरचे बदला ताका एटी-केटी दिवन धावेंत थेट बडटी दितले.
धावेंत तो शिकचे वांगडा त्या विद्यार्थ्यांन त्याच वेळार णवेंत उरिल्ल्या पेपरांची परिक्षा दिवन उतीर्ण जावचे पडटले. जो मेरेन विद्यार्थी उरिल्ल्या पेपरात पास जायनात ते मेरेन ताका धावेची परिक्षा दिवपाक मेळची ना, अशें शेट्ये हांणी सांगलें.
णवेक स विशय आसात. तातूंत इंग्रजी भास सक्तीची केल्या. हेर भाशेचें विशय कोंकणी वा मराठी घेवपाक मेळटात. भुगोल आनी इतिहास विशय विलीन करून एक विशय केला आनी एक पेपर 80 गुणांचो आसतलो. शालेय विश्लेशणा खाला अतिरीक्त चार विशय आसात. एक आयडीए, दुसरो कला शिक्षण, तिसरो शारिरीक शिक्षण आनी चवथो वेवसायीक शिक्षण अशें शेट्ये हांणी म्हणलें.
ह्या चार विशयांत लुकसाण भरपाय येवजण चालीक लागतली. ह्या विशयाचे पेपर शालांत मंडळ दितले, परिक्षा आनी तपासणी शाळा करतली. जर ह्या चार विशया मदल्या दोन विशयांत तांकां 65 टक्क्या वयर गूण मेळ्ळे आनी उरिल्ल्या 2 विशयांत जर 50 टक्के गूण मेळ्ळे जाल्यार हेर 6 विशयांतल्या जर दोन विशयात ते नापास जाल्यात ते नापास जाल्ले दोन विशय रद्द जावन ते पास जातले, अशें भगिरथ हांणी म्हणलें.
————————
2026 वर्साच्यान ग्रेस गूण आसचें नात
-जर 6 मदल्या 6 विशयात विद्याथी नापास जातात आनी शालेय विश्लेषणाच्या दोन विशयांत 65 टक्के आनी दोन विशयांत 50 टक्के गूण घेतले जाल्यार तांकां 6 मदले दोन विशय रद्द करपाक मेळटले.
-देखीक, तांकां गणीत आनी भाशा हे दोन विशय रद्द करून उरिल्ल्या चार विशयांत परिक्षा दिवन पास जावन धावेच्या परिक्षे खातीर ते पात्र थारतले.
– हातूंत 2026 वर्साच्यान ग्रेस गूण आसचे नात. ते खातीर लुकसाण भरपाय येवजण आनी खेळां मेरीट गूण धोरण आसतलें, अशे शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
