भांगरभूंय | प्रतिनिधी
फक्त लिव्हींग सर्टिफिकेट घेवन खासगी उमेदवार नोंद जावप गरजेचें
पणजी: यत्ता णववेंत नापास जाल्ल्या विद्यार्थ्यांक णववी पास जायनासतना धावेची परिक्षा दिवपा सयत आयटीआय वा एखादो अभ्यासक्रम पुराय करपाची संदूय आतां फावो जाल्या. हे खातीर संबंदीत विद्यार्थ्यान विद्यालया कडल्यान शाळा सोडिल्ल्याचो दाखलो (लिव्हींग सर्टिफिकेट) घेवपा सयत शालांत मंडळा कडेन परिक्षे खातीर खाजगी उमेदवार म्हूण नोंदणी करपाची गरज आसा.
गोंयांत अंदूं सावन (2025-26) धावे खातीर राष्ट्रीय शिक्षण धोरणाची (एनईपी) कार्यवाही जातली. एखादो विद्यार्थी णववेंत पांच वा स शिक्षणीक विशयांत नापास जालो तरी लेगीत धावेंत वचपाची संद ताका मेळटली. हे खातीर ताका धावेंत आसतना पुरवणी परिक्षेच्या आदाराचेर णववेंत नापास जाल्ल्या विशयांत पास जावचें पडटलें. विद्यार्थ्याक धावेची परिक्षा दिवंक मेळटली. फक्त णववेंत पास जाले बगर ताचो धावेचो निकाल जाहीर करचे नात. णववेंत नापास वा अनुत्तिर्ण विद्यार्थ्यांचे वर्स फुकट वच्चें न्हय म्हूण ही तरतूद राष्ट्रीय शिक्षण धोरणांत केल्या.
तशेंच राष्ट्रीय शिक्षण धोरणांत (एनईपी) णववेंत नापास जावप्यांक णववेंत पास जायनासतनाय धावेंत पास जावपाची संद उपलब्ध आसा. हे खातीर विद्यार्थ्यान विद्यालयांतल्यान शाळा सोडिल्ल्याचो दाखलो दिवन धावेंत खाजगी उमेदवार म्हूण नोंदणी करप गरजेची आसा.
हे विशीं अदीक म्हायती दितना शालांत मंडळाचे अध्यक्ष भगीरथ शेटये हांणी म्हणलें, णववेंत नापास जाल्ल्यान खूबशा विद्यार्थ्यांची दोन, दोन वर्सां फुकट गेल्यात. आतां लेगीत णववेंत नापास जाल्ल्या विद्यार्थ्यांक धावेंत वचपा सयत परिक्षेक बसपाची संद मेळटली तरी णववेंत नापास जाल्ल्या विशयांत तांकां पास जावचें पडटलें. णववीच्या विशयांत जो मेरेन ते पास जायनात तो मेरेन धावेचो तांचो निकाल जाहीर करचे नात. खाजगी उमेदवार म्हूण नोंदणी करीत जाल्यार णववेंतल्या नापास विशयांत पुरवणी परिक्षेच्या आदाराचेर पास जावपाची गरज ना. थेट धावीचे परिक्षेक बसपाची संद मेळटली. प्रात्यक्षीक परिक्षा णववेचे शिक्षण घेतिल्ल्या विद्यालयांत दिवची पडटली. हे येवजणेच्या आदारान णववी पास जायनासतनाय धावी पास जावप विद्यार्थ्यांक शक्य जातलें.
वर्सभरांत एखादो अभ्यासक्रम पुराय करपाचीय संद
धावे खातीर खाजगी उमेदवार म्हूण नोंदणी जाल्ल्या विद्यार्थ्याक धावेच्या वर्गांत बसपाची सक्ती ना. हाका लागून आयटीआय वा हेर संस्थेंतल्यान एखादो अभ्यासक्रम पुराय करपाची संद तांकां मेळटली. आठवी पास जाले उपरांतूय आयटीआयंत कांय अभ्यासक्रम आसात. तशेंच हेर खाजगी संस्थांनीय संगणक प्रशिक्षणा सयत हेर अभ्यासक्रम उपलब्ध आसात. ते करप ह्या विद्यार्थ्यांक शक्य जातलें.
खाजगी उमेदवार म्हूण नोंद जाल्ल्या विद्यार्थ्यांकूय धावेच्या वर्गांत हाजेरी लावपाची संद मेळटली. हे खातीर मात संबंदीत विद्यालयान परवानगी दिवापाची गरज आसा. ह्या विद्यार्थ्यांचो धावेचो निकाल हेर विद्यार्थ्यां सयत जाहीर करतले. पूण संबंदीत विद्यालयाची नोंद निकालांत जावची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
