भांगरभूंय | प्रतिनिधी
लोकां मदीं भिरांत; रान खात्यान धांवडावन घालपाची मागणी
फोंडें: फोंडें शारांत सद्या गवे भोंवत आशिल्ल्यान लोकां मदीं खवदळ पडला. भर दिसा उजवाडा तशेंच रातच्या वेळर गवे रस्त्यार भोंवूंक लागिल्ल्यान सगल्यांची धांवपळ जाल्या. फाटल्या 10-12 दिसा सावन सुरू आशिल्लो प्रकार बंद करपाचो अजून यत्न जाल्ले दिसून येनात. ढवळे भर रस्त्यार दनपारच्या वेळार गवो दिश्टी पडिल्ल्यान थळाव्या लोकां मदीं भिरांत पातळ्ळ्या. शारांत धुमशेण कांडपी गव्यांक रान खात्यान रानांत धांवडावन घालपाची मागणी लोकां कडल्यान जायत आसा.
वारखंडें फोंड्यां उजो पालोवपी दळाचे कचेरे कुशीच्यान कांय दिसां पयलीं रातच्या वेळार एका गव्यान शारांत प्रेवेश केल्लो. त्या वेळार गवो शारांत भोंवत आशिल्ल्याचो व्हिडियो व्हायरल करून लोकांक जागृत करपाचो यत्न कांय लोकांनी केल्लो.
दोन तीन म्हयन्यां पयालीं बोणबाग- बेतोड्यां एके बायलेचेर गव्यान हल्लो केल्लो. जखमी जाल्ले ते बायलेक हॉस्पिटलांत उपचार सुरू आसतना दुसऱ्या दिसा मरण आयिल्लें.
उपरांत गव्यान सरळ फोंडें शारांत रातच्या वेळार धुमशेण कांडपाक सुरवात केल्ली. शारांतल्या कांय दुकानांतल्या सीसीटीव्ही कॅमेऱ्यांत रातच्या वेळार गवो कैद जाल्लो. पूण फाटल्या दोन-तीन दिसां सावन ढवळे भर रस्त्यार दनपारच्या वेळार गवो दिश्टी पडिल्ल्यान थळाव्या लोकां मदीं एकूच बोवाळ पडलो. ताका लागून गव्या संबंदी शारांतल्या लोकांक धोको निर्माण जाला.
फाटल्या कांय दिसां सावन उसगांव वाठारांत लेगीत गव्यान लोकवस्तीत प्रवे करपाक सुरवात केल्या. हातूंत स्कुटरी वेल्यान वचपी दोगां जाणांक गव्याचो धपको बसून जखमी जावपाचे प्रकार घडल्यात. तातूंत बिबट्याचोय संचार वाडिल्ल्यान वाठारांत लोकां मदीं भिरांतीचें वातावरण पातळ्ळां.
फोंडें शारांत तशेंच उसगांव वाठारांत भर दिसा उजवाडा लोकवस्तींत प्रवेश करपी गव्याक रान खात्यान धांवडावन घालपाचे मागणेक सद्या नेट धरूंक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
