भांगरभूंय | प्रतिनिधी
फोंडें: ढवळी फोंड्यां बुधवारा दनपारां 1.20 वरांच्या सुमाराक जाल्ल्या दोन दुचाकींच्या अपघातांत स्कुटरी फाटल्यान बशिल्ल्या श्रेयो कोठारकार (18, तिस्क उसगांव) हिका हॉस्पिटलांत मरण आयलें. ती फर्मागुडये वयले जीव्हीएम कॉलेजीची पयल्या वर्साची विद्यार्थिनी आशिल्ली.
ह्या अपघातांत मोटरसायकल चालक मुकेश हेक्टर (42, निलगिरी हील, ढवळी) जखमी जाला. ताचेर उपजिल्हो हॉस्पिटलांत उपचार चालू आसात.
पुलिसांनी दिल्ले म्हायती प्रमाण जीए 05 एच 2840 नंबराची दुचाकी फोंडेंच्यान निलगिरी हील वाठारांत वताली. उरफाटे दिशेन गतीन येवपी दुचाकी पळोवन मोटरसायकल चालक मुकेश हेक्टर हांणी आपली मोटरसायकल रस्त्याच्या मदींच उबी केली. त्याच वेळार मडगांवच्यान फोंडेंचे दिशेन वचपी जीए 05 व्ही 0115 नंबराचे स्कुटरीन एका वाहनाक ओव्हरटेक करतना रस्त्याचे मदींच राविल्ल्या मुकेशाचे मोटरसायकलीच आपटली. ह्या धपक्यान स्कुटरी फाटल्यान बशिल्ली श्रेया रस्त्याचेर पडली आनी रस्त्याचेर तकली आपटिल्ल्यान ती गंभीर जखमी जाली. तिका खाजगी वाहनांतल्यान उपजिल्हो हॉस्पिटलांत दाखल केली. मात उपचार सुरू करचे आदींच तिका मरण आयलें.
फोंडें पुलीस स्टेशनाचे उपनिरिक्षक आदित्य वेळीप हांणी अपघाताचो पंचनामो केलो आनी कूड पोस्टमार्टमा खातीर गोमॅकाँत धाडली. मेळिल्ले म्हायती प्रमाण श्रेया आपलो इश्ट फ्रेझर डायस (18, कुंडय) हाचे वांगडा मडगांवां गेल्ली. येतना वाटेर तिका अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
