भांगरभूंय | प्रतिनिधी
बूल ट्रोलर आनी एलईडी नुस्तेमारी आड नियंत्रण हाडपा खातीर ड्रोनाचो कसो वापर करतले ह्या प्रस्ना वेल्यान विरोधक तशेंच सत्ताधाऱ्यांनी नुस्तेमारी मंत्री नीळकंठ हळर्णकार हांकां पेंचांत हाडलो. ड्रोन आयल्यार कशे पद्दतीन बेकायदेशीर नुस्तेमारी बंद जातली हाची जाप मंत्र्या कडेन नाशिल्ली देखून मुख्यमंत्र्यांनी हातूंत हस्तक्षेप करून बेकायदो नुस्तेमारी सोदून काडपा खातीरचें फुडारांतलें तंत्रगिन्यान आसा अशें रझांव दिलें.
बूल ट्रोलर आनी एलईडी नुस्तेमारीक लागून नुस्त्यां भितर उणाव जाला. ह्या बेकायदो नुस्तेमारीचेर नदर आनी पाळत दवरपा खातीर नुस्तेमार संचालनालयान कसली पावलां उबारल्यांत असो प्रस्न कुडटरीचे आमदार आलेक्स रेजिनाल्ड लोरेन्स हांणी विचारिल्लो.
हाचेर जाप दितना मंत्री नीळकंठ हर्णकार हांणी सांगलें की आतां दर्यांत प्रत्यक्ष वचून नदर दवरपाचे सोडून आतां ड्रोना वरवीं दर्यांत पाळत दवरतले.
तीन म्हयने जाले ह्या ड्रोनांची चांचणी चल्ल्या. महाराष्ट्रान ही पद्दत आपणायल्या आनी तेच पद्दतीचो प्रयोग आतां गोंयांत करतले. ह्या ड्रोनाची तांक 20 किलोमिटर मेरेन खोल दर्यात वचपा इतली आसा. जे बेकायदो नुस्तेमारी करतात तांचेर ऑफिसांत बसून देखरेख दवरपाक आमकां मजत जातली.
पूण जापेक समाधानी नाशिल्ले रेजिनाल्ड हांणी ड्रोन ह्यो बोटी कश्यो जप्त करतलें. त्यो जप्त करपाची प्रक्रिया कशी आसतली, तांका कितलो दंड आसतलो अशे प्रस्न विचारले.
नुस्तेमारी खातें आनी बूल ट्रोलर हांचे मदीं मिलीभगत आसता देखून हांचेर कसलीच कारवाय जायना. जर हें ड्रोन आयल्यार हांचेर कसली कारवाय जातली हे स्पश्ट ना. ड्रोना वरवीं बेकायदो नुस्तेमारी करपी ट्रोलर कशे धरतले असो प्रस्न रेजिनाल्ड हांणी केलो.
ह्या ड्रोनांच्या खर्चाचें विश्लेशण जालां काय. हे ड्रोन दर्यांत वचून बेकायदो नुस्तेमारी करपी बोटींक उखलून हाडटले काय असो प्रस्न विरोधी पक्ष फुडारी युरी आलेमांव हांणी विचारून ह्या ड्रोनांक लागून बेकायदो नुस्तेमारी कशी बंद जातली हाचेर कांयच स्पश्टीकरण ना देखून कांय काळा भितर हे ड्रोनय गायब जातले असो आरोप आलेमांव हांणी केलो.
पूण नुस्तेमारी मंत्र्यान दिल्ले जापेचेर तांचे समाधान जांवक ना, देखून मुख्यमंत्री प्रमोद सावंत हांणी हो विशय समजावन सांगलो.
पयलीं आमी प्रत्यक्षांत दर्यांत वचून मनीसबळाचो वापर करून बेकायदो नुस्तेमारी करप्यांक सोदताले. आतां आमी फुडारांतल्या तंत्रगिन्यानाचो आस्पाव केला. हें ड्रोन दर्यांत वचून पाळत दवरतलें. बेकायदो नुस्तेमारी नदरेक आयल्यार नुस्तेमारी खात्याच्यो बोटी, कोस्ट गार्ड आनी कोस्टल पुलिसांक ते कळीत करतले. उपरांत थंय वचून तांचेर ते कारवाय करतले अशी म्हायती मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
