भांगरभूंय | प्रतिनिधी
10 आपमजत गटांक ड्रोन
सारें, वखदां मारपाचें प्रशिक्षण
ग्रामीण उदरगत खात्याची म्हायती
भांगरभूंय । प्रतिनिधी
पणजी : गोंयांत बायलांचें फुडारपण करपी 10 आपमजत गट ड्रोनाचो वापर करून शेतकी मळार क्रांती घडयतात. केंद्राचे नमो ड्रोन दीदी येवजणे खाला हे आपमजत गटांक अनुदानाचेर ड्रोन मेळल्यात आनी ते चलोवपाचें प्रशिक्षण लेगीत दिलां.
नमो ड्रोन दीदी हे केंद्रीय येवजणेची अंमलबजावणी शेतकी मंत्रालया वरवीं जाता. बायलांच्या आपमजत गटांच्या वांगड्याक ड्रोन तंत्रज्ञानाचें प्रशिक्षण दिवन शेतकी मळार सारें आनी वखदां मारपां खातीर ते ड्रोन भाड्यार दिवपाक शकतात. ह्या उपक्रमांक लागून आपमजत गटांचे वर्सुकी येणावळींत अतिरिक्त एका लाखाची भर घालून तांचें अर्थीक सक्षमीकरण आनी शाश्वत उपजिविके खातीर योगदान दिता, अशी म्हायती ग्रामीण उदरगत खात्यान दिली.
हे येवजणे खाला आपमजत गटांक ड्रोन विकते घेवपाक 8 लाखां मेरेन 80 टक्के अनुदान दिता. ते भायर उरिल्ले 20 टक्के ड्रोन खर्चाचेर 3 टक्के जुराचेर रीण मेळटा. ते भायर ड्रोन पायलट प्रशिक्षण लेगीत हे येवजणे खाला मेळटा. शेतांनी ड्रोना वरवीं सारें आनी वखदां मारून आपमजत गटांक अतिरिक्त एका लाखा मेरेनची येणावळ मेळटा.
2024-25 त 10 आपमजत गटांनी ड्रोन दीदी येवजणेचो लाव घेवन केंद्र सरकारान तांकां सारें आनी वखदां मारपी ड्रोन दिल्यात. ते भायर केंद्रीय शेतकी मंत्रालय राष्ट्रीय केमिकल अॅण्ड फर्टीलायझर्स कारखान्यांतल्यान सारें आनी वखदांची पुरवण करता. 10 आपमजत गटांतल्या एके बायल वांगड्याक 15 दिसांचें प्रशिक्षण दिलां. तातूंत पांच दीस ड्रोन पायलट ट्रेनींग आनी 10 दीस ड्रोना वरवीं शेतांनी सारें आनी वखदां मारपाच्या प्रशिक्षणाचो आस्पाव आसा. जाल्यार दुसरे बायल वांगच्याक ड्रोनाच्या इलेक्ट्रिकल उपकरणांची दुरुस्ती, ड्रोनाचें फिटींग आनी हेर तांत्रिकी कामां खातीर तिका तंत्रज्ञ वा सहाय्यक म्हूण प्रशिक्षीत केल्या. ड्रोन दिताच तांचें प्रशिक्षण सुरू जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
