‘ड्रीम क्रशर’… आतां तरी जागे जायात

भांगरभूंय | प्रतिनिधी

अहमदाबाद विमान अपघाताची खोलायेन चवकशी जातलीच, हातूंत मातूय दुबाव ना. मात, ही चवकशी करतना नेमकें सत्य तपास अधिकाऱ्यांक, सरकाराक कळप गरजेचें आसा.

अहमदाबादांत बिरेस्तारा नागरी वस्ती मदल्या वैजकी म्हाविद्यालयाच्या हॉस्टेलाचेर ‘बोईंग 787-8 ड्रीमलायनर’ हें प्रवासी विमान कोसळून 242 जाणांक मरण आयलें. तशेंच हॉस्टेलांतल्या विद्यार्थ्यांक शिक्षकांकूय ह्या अपघाताक लागून मार बसलो. हॉस्टेलांत कितल्या जाणांक मरण आयलां हाचो आंकडो तसो स्पश्ट ना. मात, ह्या विमान अपघातान हवाई सुरक्षे विशीं व्हड प्रस्न निर्माण केला हें मात खरें.
ह्या अपघातांत कांय अख्खे कुटुंब सोंपलें. कितल्याश्याच जाणांची सपनां सोंपलीं. ड्रीमलायन विमान ड्रीमक्रशर थारलें. एखादे गजाली कडेन आडनदर केल्यार ती गजाल खंयच्या खंय पावपाक शकता, हो ताचो एक नमुनो आसा अशें म्हणूं येता.
सोशल मिडियाचेर एक व्हिडियो 2 दीस जाले खूब व्हायरल जाता. हें विमान कोसळचे पयलीं त्या विमानांत आशिल्ली परिस्थिती एक प्रवासी मांडटना दिसता. विमान म्हणल्यार अत्याधुनीक सेवा, अशें सगल्यांकूच दिसता. मात, हो व्हिडियो पळयल्यार ह्या विमानाची अवस्था कांय वर्सां पयलीं आशिल्ल्या रेल्वेची कशी दिसता. हालींच कांय बऱ्यो रेल्वे लाँच जाल्यात. मात, लोकांनी कांय दिसांतच तातूंतल्या सेवांचे तीन तेरा केले, तशीच गत ह्या विमानांतूय दिसता.
विमान प्रवास तसो म्हारग. म्हारग म्हणल्यार तशी सेवाय मेळटा. मात, ह्या विमानांतली परिस्थिती (जी व्हायरल व्हिडियोंत दाखयल्या) ती पळयल्यार बाकीच्यो गजाली, सुरक्षेच्यो गजाली, इंजीन बरोबर आसले काय? असो प्रस्न पडटाच पडटा. एसी सारकी चलना, अॅर होस्टेसाक आपोवपा खातीर बजर बटन आसता तो चलना, सिटाक आशिल्ल्या स्क्रिनीचो टचप‌ॅड चलना अश्यो गजाली ह्या व्हिडियोंत दिश्टी पडटात. हो प्रवासी दिल्ली सावन अहमदाबाद हांगा देंवलो. ताणें हो व्हिडियो सोमतोच सोशल मिडियाचेर घालो. ते वटेन विमानान उड्डाण घेताच कांय मिणटांत प्रवाशांचो जीव घेतलो. लागींच आशिल्ल्या मेघानी नगर वाठारांतल्या नागरी वस्तींतल्या वैजकी म्हाविद्यालयाच्या हॉस्टेलार विमान कोसळ्ळें.
ह्या अपघातांत एकलो अजापीत तरेन वांटावलो. एमरजन्सी एक्झीट आशिल्ले सुवातेर तो बशिल्ल्यान विमानाच्या अपघाता वेळार एक खीण ताचो जीव वाटावन गेलो. ह्या अपघातांत हॉस्टेलांतल्या कांय प्रशिक्षणार्थी दोतोरांचो, कांय नागरिकांचो जीव गेलो, पन्नासेक जाण जखमी जाले. विमाना भितर आशिल्ले गुजरातचे आदले मुख्यमंत्री विजय रुपानी हांचे सयत 170 भारतीय, 53 ब्रिटीश, 7 पुर्तगेज आनी एका कॅनडाच्या नागरिकाचो जीव गेलो. ह्या अपघातान संबंदीत विमान कंपनी त्रासांत पडलीच, तेच बरोबर हेर विमान कंपनीं कडेनूय आतां पळोवपाचो दृश्टीकोन बदलपाक लागला. हवाई सुरक्षे विशीं आतां गंभीरतायेन चर्चा जावपाची गरज आसा. प्रत्येक गजाली सारक्यो जाग्यार आसा काय ना हेंवूय पळोवपाची वेळ आयल्या.
विमान उड्डाण घेता आनी 9 मिणटां भितर कोसळटा, म्हणल्यार खंय कितें तरी चुकलां. नेमकें कितें जालें, तें ब्लॅक बॉक्सांतलो रिपोर्ट भायर आयल्यार कळटलेंच, मात फुडाराक असले प्रकार जावपाक जायना म्हूण उपाय येवजण्यांचेर भर दिवपाची आतां खरी गरज आसा. भारतांत अशे व्हडले रेल्वे अपघात जाल्यात. येदो व्हडलो विमान अपघात जावपाची ही पयलींच वेळ आशिल्ली.
विमानांच्या अपघातांच्यो घडणुको तश्यो उण्योच आसतात. मात, अश्या अपघातान जावपी जिवीत आनी वित्त हानी ही खूब व्हड आसता. अहमदाबादांत पडिल्लें संबंदीत विमान 11 वर्सां पयलींचे अशें म्हणटात. तेन्ना तातूंत आधुनीक गजालींचो आस्पाव आशिल्लो काय. तशेंच ते हाताळपाक क्रू मेंबर योग्य तरेन प्रशिक्षीत आशिल्ले काय, होवूय प्रस्न आसा. 5 वर्सां पयलीं केरळांत कोळीकोडांत विमान अपघात जावन 190 जाणांक मरण आयिल्लें. त्या वेळारूय अशेच प्रस्न मुखार आयिल्ले.
संवसारभर अदीं मदीं विमान अपघात जायत आसतात. तंत्रीक कारणांक लागून, पायलटांचे चुकीक लागून, हवामानाक लागून विमान उड्डाणांत आडमेळीं येतात. मात, जर विमानूच सारकें नासत जाल्यार ही खुबूच गंभीर गजाल आसा. ब्लॅक बॉक्सांत कितें लिपलां ताची उमळशीक पुराय देशाक लागल्या.
कांय रिपोर्ट्स सांगतात ते प्रमाण बिरेस्तारा विमान चलोवपी पायलट खुबूच अणभवी आशिल्लो. तशेंच हें विमान 11 वर्सां पयलींचे आशिल्लें. तशें पळोवंक वचत जाल्यार खूब पोरणेंय नाशिल्लें. मात, भितर गजाली सारक्यो आशिल्ल्यो काय? हें कुवाडें आसा. अशे तरेच्या विमानाक व्हड अपघात जाल्ल्याची नोंद ना. मात, हें विमान पडलें कशें. अॅर इंडियाच्या ताफ्यांत 27 बोईंग विमानां आसात. तांचीय तपासणी जातलीच. मजगतीं, तांचें एक विमान शुक्रारा उड्डाण केले उपरांत कांय वेळांत परत आयलें, तंत्रीक कारणांक लागून आयलें, अशें म्हणटात. म्हणल्यार आतां मात्शी चूक दिसल्यार लेगीत सादूर जातात. अपघाता उपरांत बुद्धी चलता. ताचें पयलीं ‘चलता है’ अशेंच चलता. ह्या विमाना भशेनूच खुबश्या ट्रॅव्हलरांच्यो बशी, सरकार चलयतात त्यो बशी आसात. तांचीय अशीच गत आसता. भितर टिव्ही आसा चलना, सिटां सारखी नासतात. सरकारी बशी तर वाटेर बंद पडटात. ‘चलता है’ म्हणीत ड्रायव्हर कंडक्टर ती बस चलयता. तांचेंय बोईंग जावपाक जायना जाल्यार सरकारान, ट्रॅव्हलरांनी तांच्या हातांत आशिल्ल्यो बशी जाग्यार घालच्यो.
अहमदाबाद विमान अपघाताची खोलायेन चवकशी जातलीच, हातूंत मातूय दुबाव ना. मात, ही चवकशी करतना नेमकें सत्य तपास अधिकाऱ्यांक, सरकाराक कळप गरजेचें आसा. जाका लागून फुडारांत अश्यो घडणुको जावपाक जायना म्हूण जतनाय घेवप सोंपें जातलें. विमानसेवा वाडयतना हवाई सुरक्षेचेर भर दिवप ही काळाची गरज आसा. विमानतळां लागीं आशिल्ल्या लोकवस्तींत बांदकामां खातीर आशिल्ले नेम खरपणान पाळटात काय ना, हेंवूय सरकारान पळोवंक जाय, जाल्यारूच सुरक्षेचे नदरेन आनीक घटाय येतली.

अमर पाटील
7507495151