भांगरभूंय | प्रतिनिधी
दिवचल: ‘डामॅटीक ड्रीम’ ह्या सात दिसांच्या अभिनय कार्यशाळेक बरो प्रतिसाद मेळ्ळो. ही कार्यशाळा मारिटा डिसोझा हांणी दिवचल बोर्डे हांगा श्रीरवळनाथ सभामंडपांत आयोजीत केल्ली. वट्ट 18 विद्यार्थ्यांनी हे कार्यशाळेंत वांटो घेतलो.
रंगमाचयेर कशें रावप, आत्मविस्वास कसो वाडोवप, तोंडा वेले भाव, शारिरीक अभिनय, दोळ्यांचे हावभाव आनी अभिनया विशीं आनी खूबशा गजालींचें मार्गदर्शन ह्या वेळार मारीटा डिसाेझा हांणी कार्यशाळेंत वांटेकार जाल्ल्या विद्यार्थ्यांक केलें.
ह्या वेळार विद्यार्थ्यांनी आपले कार्यशाळेंतले अणभव सांगलें. कार्यशाळेक पालकांचोय वांटो आशिल्लो. कार्यशाळेंतल्या विद्यार्थ्यां खातीर अल्पोपहाराची वेवस्था जितेंद्र आनी जय हांणी केली. कार्यशाळा येसस्वी जावची हे खातीर सिद्धांत सूत्र, प्रज्योत पळ, पुंडलीक पळ आनी सुनील पळ हांणी खासा कश्ट घेतले.
समारोपाच्या सुवाळ्याक माचयेर मुखेल सोयरे म्हूण सुनील पळ आनी जय खरबे हाजीर आशिल्ले. ह्या वेळार तांणी आपले विचार उक्तायले. सगल्या वांटेकार जाल्ल्या विद्यार्थ्यांक ह्यावेळार प्रमाणपत्र भेटयलें. अमेय किंजवडेकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
