ड्रग डिलर अटलाक परतून अटक

भांगरभूंय | प्रतिनिधी

एएनसी केलो 8.70 लाखांचो कोकेन आनी चरस जप्त

भांगरभूंय । प्रतिनिधी

म्हापशें : नांवाडगो ड्रग्स डिलर अटाला उर्फ यानिव्ह बेनाहीम (50. रा. शिवोली) ह्या दुबावीत इझ्रायली नागरिकाक गोंय पुलिशेच्या घुंवळे वखदां विरोधी पंगडान अटक केली. दुबाविता कडेन 8.70 लाख रुपयांचो कोकेन आनी चरस हो ड्रग्स जप्त केलो. हे आदीं गोंय पुलिसांनी  अटालाक ड्रग्स आनी जीवघेणो हल्लो तशेंच उत्तराखंड पुलिसांनी अवैध्य राबितो प्रकरणांत अटक केल्ली.

ही कारवाय एएनसीच्या पंगडान शुक्रारा 4 एप्रीलाची मध्यानरात ते शेनवारा 5 एप्रीलाची फांतोड हे मजगतीं केली. पुलिसांनी दुबावीत ड्रग्स पॅडलर अटाला हो रावतालो त्या फ्लॅटाचेर ड्रग्स आशिल्ल्याची म्हायती मेळिल्ली. ते प्रमाण पुलिसांनी शिवोलेच्या दुबाविताच्या फ्लॅटाचेर धाड घातली. झडटे वेळार दुबाविता कडेन 7.50 लाखांचो 50 ग्राम कोकेन आनी 1.20 लाखांचो 120 ग्राम चरस असो वट्ट 8 लाख 70 हजारांचो ड्रग्स सांपडलो. पुलिसांनी तो ड्रग्स जप्त करून ताचे आड घुंवळी वखदां प्रतिबंधक कायद्या खाला गुन्यांव नोंद करून रितलर अटक केली. पुलीस अधिक्षक टिकम सिंग आनी उपअधिक्षक नेर्लन अल्बुकर्क हांच्या मार्गदर्शना खाला पुलीस निरिक्षक सजीथ पिल्लई, उपनिरिक्षक दिनदयाळ रेडकार, हवालदार उमेश देसाय, इयूस्ताकीओ फर्नांडीस, कॉन्सटेबल गोदीश गोलतेकार, सुमीत मुटकेकार, साईराज नायक, राहुल गांवस, विशाल शितोळे, कुंदन पटेकार, स्नेहा साळवी, सीमा आरपरकार ह्या पंगडान ही कामगिरी केली.

2010 त पयले खेपे अटक

दुबावीत अटाला हाका मार्च 2010 त गोंय पुलिशेच्या एएनसी विभागान पयले खेपे ड्रग्स प्रकरणांत अटक केल्ली. त्या वेळा ह्या ड्रग्स प्रकरणा कडेन कांय पुलिसांचे संबंद दिसून आयिल्ले. पयलीं गुन्यांव फांट्यान आनी उपरांत सीबीआय वरवीं ह्या प्रकरणाची तपासणी केली. ताका लागून कांय पुलीस अधिकारी आनी कर्मचाऱ्यांचेर निलंबनाची कारवाय केल्ली. ते उपरांत त्या पुलिसांक सेवेंत परतून आस्पावन घेतिल्ले.

भारतांत बेकायदो राबितो

2019 त अटाला उर्फ यानिव्ह बेनाहीम हाका झारखंडांतल्या शीम सुरक्षा दळ पुलिसांनी भारत-नेपाळ शिमेर अटक केल्ली. ताचे आड हणजुणें पुलीस स्टेशनार खुनी हल्ल्याचो गुन्यांव नोंद जाल्लो. तशेंच उत्तराखंड पुलिसांनी अटालाक भारतांत बेकायदो राबितो केल्ल्याच्या आरोपा खाला अटक केल्ली. सध्या तो जामिनाचेर सुटिल्लो.