ड्रग्स वेसनाच्या विळख्यांत जग !

भांगरभूंय | प्रतिनिधी

गायक- कलाकारांचो हो सगळो जीण वगडावपी इतिहास संगीत रजनीत, रेव्ह पार्टींत, क्लबांत ड्रग अतिरेकान सोंपिल्ले दुर्दैवी तरणाटे जाणां आसतलेच. तरीयपूण थंय आडनदर करून खीण भरच्या सुखा खातीर जोखीम घेत जीव वगडायतात.

इलॉन मस्क. गेल्ल्या एकाच सप्तकांत अमेरिकेंत शेअर बाजार कोसळिल्ल्यान ताची $132 अब्ज इतली संपत्ती देंवली, तरीयपूण हें बरयतना $301 अब्ज संपत्ती सयत आयजूय तो जगांतलो सगळ्यांत गिरेस्त मनीस. ट्रंपाचो उजवो हात. अमेरिकन प्रशासनाची कार्यक्षमता तपासपी यंत्रणेचो मुखेली आनी ट्रंप सरकारच्या धोरणांचो पड्डयाफाटलो सुत्रधार आसतना ताचे जिणेंत आनी समाजांतले वागणुकेंत विचित्रता दिसता. 4 बायलो- पार्टनर आनी तांच्या 14 भुरग्यांचो बापूय हो गिरेस्त मनीस आदल्या बायल, भुरग्यांक दुडू दितना रडयता. केन्ना कितें करत हाचो नेम ना. भौशीक कार्यावळींत माचयेर तो गरज नासतना नाचतना दिसता. लोकांक त्रास दिवन, यातना दिवन, रडोवन आनंद मेळोवपी अतिक्रूरसाण ताच्या सभावांत झळकता. आपूण तीन हजार वर्सां आदीं परग्रहा वयल्यान हांगां आयिल्लो आनी आतां थंय वचपाच्या यत्नांत आसा हें ताणें हालीं केल्लें विक्षिप्त विधान. ह्या सगळ्या फाटलें कारण ताचे केटामायन ड्रग वेसन जावन आसा. ड्रग्स एका गणिती, तंत्रज्ञ, सफल उद्देजकाची मानसीक भलायकी आनी समतोल इबाडून ताच्या व्यक्तिमत्वांत असामाजिक, राक्षसी वृत्ती जागयता ताचें मस्क हें जितें उदाहरण.
अख्खें जग आयज ड्रग्सच्या जाळांत सांपडलां. जगांत सगळ्यांत चड ड्रग दुरूपेग करतल्या देशांत अमेरिका पयले सुवातेचेर आसा. फेंटानील ड्रग्स वापरिल्ल्यान अमेरिकेंत वर्साक 70,000 मायज लोकांक मरण येता. दुसरे सुवाती वयले रशियेंत वट्ट लोकसंख्येच्या 2% हॅरोइनाच्या जाळांत सांपडल्यात. तिसऱ्या नंबरावयल्या अफगाणिस्थानांत 29 लाख तर चवथे सुवातेर आशिल्ल्या इराणांत 3% वयस्क ड्रग्स घेतात. ब्राझिल आनी फिलीपिन्स अनुक्रमान पाचव्या आनी सव्या क्रमांकाचेर आसात.
भारत सद्या तरी जगांतल्या वयल्या 6 देशांत दिसना, पूण ड्रग्स दुरूपेग तरणाटे आनी वयस्क पिळगेंत दिसपट्टो वाडत आसा आनी तातूंतय आतां समाजांतल्या सुशिक्षित आनी गिरेस्तांचे प्रमाण वाडत आसा ही हुस्क्याची गजाल. 2023 वर्सा 13,000 किलो फेंटानील ड्रग्स तपास यंत्रणांनी जप्त केल्लो, जे 2021 वर्सा केल्ल्या जप्तीच्या तिनपटीन आशिल्ले. 2021 वर्सा गुजरातच्या मुंद्रा बंदरांत 2988 किलो हॅरोइन सांपडिल्लें, जाचें मोल आंतरराश्ट्रीय बाजारांत रू 21,000 कोटी जातालें.
पोरूं फेब्रुवारींत गुजरात लागींच्या दर्यांत व्हड्यांतल्यान 3300 किलो ड्रग्स धरिल्लें, जाचें मोल रू. 2000 कोटी जावन आशिल्लें. तातूंत हॅरोइन, हशीश आनी मेथामेफेटामायन (क्रीश्चल मेथा) आशिल्लें. हो माल डिसेंबर- जानेरांत संगीत रजनींत वापरपा खातीर खास करून मागयिल्लो अशें कळटा. ऑक्टोबरांत दिल्ली आनी गुजरात संयुक्त पुलीस पंगडान अंकलेश्वरांत 1289 किलो कोकेन आनी 40 किलो मारूवाना धरिल्लो जाचें मोल रू. 13,000 कोटी आशिल्लें. नोव्हेंबरांत नार्कोटीक कंट्रोल ब्युरो (एन.सी.बी) आनी आतंकवाद विरोधी पंगडान संयुक्तपणान 700 किलो मेथामेफेटामायन ड्रग्स जप्त केल्लो. ह्याच म्हयन्यांत तटरक्षक दळान अंदमाना लागींच्या दर्यांत ट्रॉलरांतल्यान 5500 किलो मेथामेफेटामायन जप्त केल्लो.
सरकारी यंत्रणा जीं ड्रग्सां जप्त करतात तो हिमनगाचो उदका वयर दिसपी भाग म्हणूं येता. ताच्या कितलेशेच पटीन ड्रग्सांचो वेव्हार देशांत चलता तो तपास यंत्रणांचे नजरेक पडना.
हालींच्या वर्सांनी उत्तर प्रदेश, महाराष्ट्र, पंजाब राज्यांत दर वर्सा सरासरी 15,000 ड्रग्स वापर संबदी एफ.आय.आर दाखल जायत आसतात. देशांत सगळ्यांत चड ड्रग्स वापर दिल्ली शारांत जाता. लदाख सारकिल्ल्या ल्हान पर्यटन क्षेत्रांनीय ड्रग्स विक्री हालींच्या वर्सांनी वाडत आसा.
कसिनो, क्लब संस्कृती आनी नायट लायफ हीं गोयांत ड्रग्साचो वाडटो वापर आनी वाडट्या वेव्हारा खातीर कारणां थारतात. ड्रग्स विक्रेत्यांक धरिल्ल्याच्यो बातम्यो आतां दिसपट्ट्यो दिसाळ्यांनी दिसपाक लागल्यात. ड्रग्स विकप्यां कडल्यान माल ग्रॅमानी आनी दुडू हजारांनी जप्त जातालो हो इतिहास. आतां माल किलांनी आनी दुडू लाखांनी न्हय, तर कोट्यांनी जप्त जाल्लो दिसता. 2024 वर्सभरांत 274 किलो ड्रग्स जप्त केल्ले ताचें मोल रू 10 कोटीच्या आसपास बसतालें. पूण ह्याच म्हयन्यांत गोंयांत एका तरणाट्या कडल्यान रू. 11.60 कोटी मोलाचो गांजो धरिल्लो. गोंयांत एका दिसा एकाच विक्रेत्या कडल्यान जप्तीचो तो उच्चांक आशिल्लो, अशें पुलिसांनी अभिमानान सांगलें. गोंय पुलिसांनी ह्या वर्सा दोन म्हयन्यांत 18 जाणांक अटक करून रू. 40 लाखांचो माल जप्त केलो आनी दर दुसऱ्या दिसा पुलीस एका ड्रग्स विक्रेत्यांक धरतात अशी शाबासकी घेत सांगतात, तेन्ना दर वर्सा हजारांच्या संख्येन विक्रेते कायद्याच्या कचाट्यांत सांपडनासतना हजारांनी कोटींची ड्रग्स विक्री करतात आसतले हातूंत दुबाव ना. जर ड्रग्स वेव्हारांत मालाचें प्रमाण आनी उलाढाल वर्सान वर्स वाडत आसा जाल्यार ती आडावपाक तपास यंत्रणा नाकामी थारल्या असो ताचो अर्थ जाता.
‘झिरो टॉलरन्स’ निती अर्थशून्य थारता. आदीं गोंयांत अटक जाल्ले ड्रग्स विक्रेते नायजेरियन, इझ्रायली, रशियन, नेपाळ आनी भारतीयांत मूळ बिहार, झारखंड, उत्तर प्रदेशांतले आसताले. आतां अटक केल्ल्यां मदी 30% थळावे गोंयकार दिसपाक लागल्यात. फाटल्या दिसांनी गांजाचे रोंपे पणजे शारांत रस्त्याचे कुशीन सांपडपाक लागिल्ले. आतां ड्रग्सा बाबतींत गोंय ‘स्वयंपूर्ण’ जावपाचे वाटेर आसा अशें म्हणपाचें? उच्च शिक्षित तरणाटे ड्रग्सांच्या भकीक पडपाक लागल्यात, ही खूब हुस्क्याची गजाल.
99 टक्के मेळोवपा खातीर गणितांतली कठीण समीकरणां सोडोवपीं आय.टी. मळा वयले ड्रग्स व्यसनी, मनशाचे शरिरशास्त्र शाखे कडेन दुर्लक्ष करतात. आपूण घेता त्या खर ड्रग्सांची कुडींत मेंदू, पुल्मांव, मुत्रपींड ह्या अवयवांची कशी नासाडी जाता हाचेर लक्ष दिनात. आमच्या तरूणपणांतूय देशांत, गोंयांत नशा करपी आशिल्ले. पूण तातूंत चड करून कॅनाबीस, मारूजुवाना वनस्पतींचो जाचें शास्त्रीय नाव ‘कॅनाबीस इंडिका’ अशें आसा तांचो वापर जातालो. नर प्रजातींतल्यान भांग आनी मादी प्रजातींतल्या सुकिल्ल्या पानां, कळ्यांक गांजा अशें संस्कृतांत नामकरण केल्लें आसा. ह्या वनस्पतीचे कळे घासून जो काळो पदार्थ तयार जाता ताका हशीश म्हणटात. उत्तर भारतांत गांजाचीं पानां धाडावन तीं पेयांत मेळोवन होळीच्या दिसा थंडाय करतात. ती मिठायेंत मिसळून खावपाचीय प्रथा आसा. ताणें मेंदवा वेलो तणाव, संकोच, भिडेस्तपण उणावता आनी त्या धुंदींत हासत, नाचत, गायत परब साजरीकरण जाता. आतां हे वनस्पतीचीं झाडां, फळां, कळे, फुलां बाळगुवपाचेर कायद्यान बंदी घाल्या.
नशा करप हें वायट हातूंत दुबावूच ना. पूण, परब आसता त्या दिसांनी कॅनबीस- भांग वनस्पतींचो केल्लो मर्यादीत वापर तितलोसो घातक आसना. मात प्रयोगशाळांनी तांच्या फळां, फुलांतले अर्क एकठांय करून रासायनीक प्रक्रियेन तयार केल्ली समर्थशाली हॅरोईन, मेंथामफेटामायन (मेथा) आनी हेर अमायन्स कुडींतल्या इंद्रियांक घातक थारतात.
रजनींत धुंद जावन संगीताचो आस्वाद घेवपाक ड्रग्साचो वापर करपी श्रोत्यांची, चड करून तरणाट्यांची संख्या नेटान वाडत आसा. आपली सर्जनशीलताय वाडोवपा खातीर पॉप संगीत गायक, वादक कलाकारूय ड्रग्सांचो आदार घेतात. परमानंदाच्या लालसेन चडांत चड ड्रग्स घेवप सुरू जाता आनी हाता भायर गेल्लें व्यसन कूड काबार करता, जीण सोंपयता.
ड्रग्साच्या अतिरेकान जगभरांत जीव वगडायिल्ल्या गायकांचीय एक व्हड वळेरी आसा. रॉक अॅण्ड रोल सम्राट एल्विझ प्रिस्ली (पिराय 42 वर्सां) सोंपलो तेन्ना ताचे कुडींत कॉडीन, मेथाक्वेलॉन, मॉर्फीन, मेपेडीन, एथक्लॉव्हीनॉल आनी हेर बार्बीच्युरेटस धरून 14 ड्रग्सांचें मिश्रण आनी सोरो मेळिल्लो. बार्बीच्युरेट आनी सोऱ्याच्या अतिरेकान राॅक गिटारिश्ट जिमी हँड्रीक्साक (पिराय 27) सोंपयलो. ‘डोर्स’- DOORS पथकाचो प्रमुख गायक जीम मॉरिसन (27) हॅरोईन अतिरेकान सोंपलो. ‘निर्वाण’ रॉक बँडाचो मुखेल गायक कर्ट कॉहबेनान हॅरोईनाच्या नशेंत धुंद जाल्ले कडेन पिरायेच्या 27 व्या वर्सा आत्महत्या केली. गायक- कलाकारांचो हो सगळो जीण वगडावपी इतिहास संगीत रजनींत, रेव्ह पार्टींत, क्लबांत ड्रग अतिरेकान सोंपिल्ले दुर्दैवी तरणाटे जाणां आसतलेच. तरीय पूण थंय आडनदर करून खीण भरच्या सुखा खातीर जोखीम घेत जीव वगडायतात.
संगीत रजनींत, रेव्ह पार्टींत मरण आयिल्ल्यांच्या कुडींचेर पोस्टमॉर्टम करतात तेन्ना रगतांत फकत एकूच न्हय तर फेंटानील, बेंझोडीयाझेपीन, एंफेटामायन, मेथांमफेटामायन आनी हेर अमायनांचे मिश्रण सांपडटा. त्या शिवाय सोरोय पियेल्ले आसतात.
एके वाटेन ड्रग्साचे वेसनी दिसपट्टे वाडिल्ले कारणान मालाची मागणी वाडिल्ली आसता. तलफ भागोवपा खातीर वेसनी व्यक्ती मागता ते मोल दिवपाक तयार आसतात, कायद्याचो धोको पत्करपाक तयार आसतात. ह्या बेकायदेशीर धंद्यांत खूब फायदो आशिल्ल्यान ड्रग्स वेव्हांरातल्या गुन्यांवकारांनीय कायद्याचो भंय कुशीक दवरला. तशें पळयत जाल्यार आंतरराश्ट्रीय ड्रग धंद्यांत वांटेकरी आशिल्ले राज्यांच्या कायदेमंडळांत पावल्यात. चार दीस फाटीं ईडीन पंजाबांत धाड घालून आमदाराच्या घरांतल्यान 1.80 किलो हॅरोइन जप्त केलां आनी आमदारान ड्रग धंद्यांत जोडिल्लो दुडू आपल्या वेंचणूक प्रचारांत वापरला असो आरोप ताचे आड लायला. चड फायद्याक लागून ड्रग्सांचो धंदो जगभर वाडत आसा.
तशें पळयत जाल्यार खर कायदे केल्ल्या देशांतूय नियंत्रण करप शक्य जाल्लें ना. चीन देशांतल्या खर कायद्यांत एक किलो अफीम वा 50 ग्राम हॅरोइन सांपडत जाल्यार मरण खास्त दिवपाची तर वेसन करतल्याक 80 वर्सां मेरेन बंदखणीची खास्त दिवपाची तरतूद आसा, तरीय मॅथमफेटामायन आनी हेर एंफेटामायनांच्या वाडट्या वापराक लागून थंयचे तपास यंत्रणांतले अधिकारी त्रस्त जाल्ले दिसतात. चीनांत रजिस्टर्ड ड्रग वापरप्यांची संख्या 25 लाख इतली आसा.
दुसरें उदाहरण फिलिपिन्सचें. देशांत ड्रग्स वापराचे प्रमाण हिस्पाभायर जालां तें पळोवन आदले राश्ट्राध्यक्ष रॉड्रीगो दुतार्ते हांणी ड्रग्स बाळगुवप्यांक तात्काळ फारान मारपाचें फर्मान काडिल्लें. थंय पुलीस सुपारी घेवन लोकांक मारून तांच्या बोल्सांत स्वता ड्रग्साच्यो पुड्यो दवरपाक लागले आनी बाजारांत, रस्त्यार, जळामळाक मडींच मडी पडिल्ली दिसपाक लागलीं. तीन दीस फाटीं खुनां खातीर जापसालदार धरून आरोपी पूर्व राश्ट्राध्यक्ष दुतार्तेक हेगांत आंतरराश्ट्रीय न्यायालया मुखार उबो केला. सौदी अरेबियांत ड्रग्स विक्रेत्यांक मृत्युदंड दिवपाची तरतूद आसा हें जाणा आसतना स इराणी विक्रेत्यांनी धोको पत्करलो आनी फासार चडून जीव वगडायलो.

दीपक लाड
पर्वरी