भांगरभूंय | प्रतिनिधी
गिरी-बार्देसांत 11.67 कोटीचो 11.672 कील गांजो केल्लो जप्त
पणजी: गोंय पुलिसांच्या गुन्यांव फांट्यान गिरी-बार्देसांत धाड घालून 11.67 कोटी रुपया मोलाचो 11.672 कील हायड्रोफॉनीक वीड हो उंचेल्या दर्जाचो गांजो जप्त केल्लो. ह्या प्रकरणांत गुन्यांव फांट्यान केरळांतले शिलना ए ह्या टोळयेंतले बायलेक अटक केल्या. ह्या प्रकरणांत आतां मेरेन तिगांक अटक केल्या.
गुन्यांव फांट्याचे निरिक्षक प्रशल नायक देसाय हांच्या फुडारपणा खाला पंगडान गिरी- बार्देसांतल्या एका भाड्याचे कुडीचेर शुक्रारा 7 मार्चाक रातीं धाड घाल्ली. त्या वेळार पंगडान बंगळुरू सावन गौतम एम. ह्या तरणाट्याक ताब्यांत घेतलो. ताचे कडल्यान 11.67 कोटी रुपया मोलाचो 11.672 कील हायड्रोफॉनीक वीड ह्या उंचेल्या दर्जाचो गांजो जप्त केलो. उपरांत पंगडान ताचे आड घुंवळे वखदां विरोधी कायद्याच्या विवीध कलमा खाला गुन्यांव दाखल करून अटक केल्ली.
ह्या प्रकरणांत ताची अदीक चवकशी करतकूच हायड्रोफॉनीक वीड ह्या उंचेल्या दर्जाचो गांजो थायलंड सावन विमानान नेपाळाक हाडिल्लो. नेपाळा सावन उपरांत हो गांजो गोंयांत हाडिल्लो. दुबावीत गौतम हाणें ह्या गांज्याचे तस्करींत डिलिव्हरी बॉयची भुमिका पार पाडिल्ल्याची म्हायती मुखार आयिल्ली. ते प्रमाण गुन्यांव फांट्यान अदीक चवकशी केली तेन्ना ताका थायलंडाक वचपा-येवपाची तशेंच ताच्या प्रवासाची बुकींग आनी हेर वेवस्था कन्नूर- केरळांतल्या श्रीजील पी. ह्या टोळयेंतल्या वांगड्यान केल्ल्याचें मुखार आयले उपरांत ताका अटक केली. तशेंच ह्या प्रकरणांत गुन्यांव फांट्यान केरळांतल्या शिलना ए. ह्या टोळयेंतले बायलेक अटक केल्या. उपरांत दुबावितांक म्हापशेंच्या पयलो वर्ग न्यायालयांत हजर करतकूच न्यायालयान पुलीस कोठी दिल्या.
मजगतीं, अटक केल्ल्या तिगांनी मेरशेच्या उत्तर गोंय जिल्हो आनी सत्र न्यायालयांत जामीन अर्ज दाखल केला. तातूंतलो दुबावीत गौतम एम हाचो जामीन अर्ज न्यायालयान भायरायला. जाल्यार हेर दोगांच्या जामीन अर्जा वेलो निकाल 1 एप्रीलाक जाहीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
