ड्रग्सान जीव घेतलो?

भांगरभूंय | प्रतिनिधी

शिक्षणीक संस्थांनी ड्रग्सांची पुरवण जाता, अशें फक्त आयकूंक येतालें. मात ह्या प्रकरणान तें सिद्ध जालां.

घुंवळे वखदां हो कांय ल्हान- व्हड मनशांचो पोटाचो धंदो जाला, मात ताका लागून तरणाटी पिळगी इबाडपाक लागल्या, हें आडनदर करून उपकारचें ना. गोंयांत दिसाक एक तरी गांजो, चरस विकपी सांपडटाच. पुलिसांची नदर चुकोवप्यांचो आंकडो कितलो, ताचें कोंत आनी हिशोब मेळचो ना. पयलीं घुंवळे वखदां दर्यादेगांचेरूच मेळटालीं. मागीर तीं शारांनी मेळपाक लागलीं. उपरांत गांवांनी. मात हें सगलें दर्यादेग पट्ट्यांतूच चलतालें. मात, आतां काळ मुदार जाला. सत्तरी, सांगें, धारबांदोडें वाठारांतूय ड्रग्स पावल्यांत. बस स्टॅण्ड, बाजारांनी न्हय, तर शाळां लागसारूय. हाॅस्टेलांनी रावपी विद्यार्थी फक्त ‘थ्रील’ अणभवपाक ड्रग्स घेवपाक लागल्यात, ही चड हुस्क्याची गजाल. वास्को बिट्स पिलानी शिक्षण संस्थेच्या कॅम्पसांत फाटल्या 10 म्हयन्यांत पांच तरणाट्यांक मरण आयलां. तातूंतल्या हालींच मरण आयिल्ल्या विद्यार्थ्याच्या रक्तांत ड्रग्साचे अंश आशिल्ल्याचें पोस्ट मार्टेमा उपरांत दिसलें. हे घडणुकेक लागून ह्या प्रकरणाक वेगळेंच मोडण मेळ्ळां.
तें ड्रग्स ताका कशें आनी केन्ना मेळ्ळें, कोणे ताका तें हाडून दिलें हाचो तपास आतां पुलिसांनी सुरू केला. कांय नामनेच्या संस्था, म्हाविद्यालयांच्या हाॅस्टेलांनी हाचे पयलीं ड्रग्स सांपडपाचे प्रकार घडल्यात. ताचो तपासूय पुलिसांनी, संबंदीत संस्थांच्या वेवस्थापनांनी केला आसतलोच. सगल्या हाॅस्टेलांनी वेळाचें पत्रक आसता. मनाक येता तेन्ना भायर भोंवपाक मेळना. पूण, हे नेम गोंयांत तरी कोण पाळीनात ही गजाल वेगळी. हाॅस्टेलांत रावपी चले आनी चलयो (चड करून परप्रांतीय) एकमेकांक वेंग मारून दुचाकी वयल्यान हेडटना खूब जाणांनी पळयलां आसतलें. मध्यानरातीं ती खंयच्या ट्युशनाक वतात, ताची चवकशी हाॅस्टेलाच्या, संस्थेच्या वरिश्ठांनी केन्ना केल्या? सोरो पियेला आसतलो, ताण- तणाव आसतलो वा तकलेन सारको नासतलो, अशें म्हणून आमी जायत्या लोकां कडेन आडनदर करतात. पूण, ते घुंवळे वखदांक बळी पडिल्ले आसूं येतात. पुलिसांनी, जागृत लोकांनी तांकां वेसन मुक्ती केंद्रांचो आदार मेळटलो, हे खातीर यत्न करुंक फावो. शाळा, काॅलेजांच्या भायर कोण उबे आसतात, कित्या खातीर तें कोणें केन्ना तांकां विचारलां? आमकां कित्याक पडलां, गोंयांत तसलें कांय जायना, ही वृत्ती, भावार्थ आतां पुरो. दीस वायट आयल्यात. सगल्यांनी कायम दुबावी, न्हयकारी वृत्ती बाळगुची न्हय, तरी मेंदू, कान, दोळे उक्ते दवरून वागचें. खास करून सुरक्षा रक्षक, थंय आसपी पुलीस कर्मचाऱ्याचें बारीक लक्ष जाय. हाॅस्टेलांनी वाॅर्डन, कर्मचाऱ्यांनीय जागृत रावंक जाय. गोंयांत फाटल्या चार वर्सांत पांच ते 73 कोटी रुपयांचीं घुंवळे वखदां जप्त केल्यांत. केन्ना पांच, तर केन्ना धा कोटींचीं. अंदूं पयल्या स म्हयन्यांत देडशे किलां वयर ड्रग्स धरल्यात. मोल 73 कोटी.
रक्ताची तपासणी केली तेन्ना त्या विद्यार्थ्याच्या रक्तांत ड्रग्साचे अंश मेळ्ळे. थंय आतां सुरक्षा वेवस्था कडक केल्या अशें पुलीस सांगतात. करचीच, पूण थंयच्या विद्यार्थ्यांची चवकशी करची. कोण कितें करतालो, हाची खबर कांय विद्यार्थ्यांक आसतलीच. कारण, काॅलेजींतल्यो कांय गजाली सगल्यांक खबर आसतात. निदान वावडी उडिल्ली ती तांणी आयकल्ली आसता. ती खरी काय फट ताचो तपास जावंक जाय. शिक्षणीक संस्थांनी ड्रग्सांची पुरवण जाता, अशें फक्त आयकूंक येतालें. मात ह्या प्रकरणान तें सिद्ध जालां. बियर वचून सोरो आयलो आनी आतां ड्रग्स, अशें ह्याच स्तंभांत कांय म्हयन्यां पयलीं म्हणिल्लें, ते सत्यांत देंवता हें पळोवन वायट दिसता.
सगलें कितें सरकार, पुलिसांनीच पळोवचें, अशें म्हणप योग्य न्हय.. शिक्षणीक संस्थांच्या वेवस्थापनांनी, शिक्षक, पालकांनी हातूंत लक्ष घालूंक जाय. समाजानूय दोळ्यांक पट्टी बांदून भोंवचें न्हय!