भांगरभूंय | प्रतिनिधी
गोंयांत भायल्यान घुंवळे वखदां येतात, हातूंत दुबावूच ना. पूण फाटल्या कांय वर्सांनी हांगाच तांचें उत्पादन जावंक लागलां. दर्यादेगे वयल्या वाठारांतूच न्हय, तर मुखेल शारांनी, उपनगरांनीय तीं तयार जातात. एके कडेन गांजाच्या रोपांचें पोरसूंय मेळिल्लें. आतां बड्ड्यां- मडगांवां एका घरांत ड्रग्सांचो वेव्हार चलतना पुलिसांनी सवाय लाखांचो ड्रग्स, एक लाख रुपया रोख, जोखपाचें यंत्र आनी एक एअर गन असो म्हाल जप्त केला. दुबावीत टेरन्स फर्नांडीस पळून गेल्ल्याचें पुलिसांनी सांगलें. कांय म्हयन्यां फाटीं ह्याच स्तंभांत पुलीस सामकेच सदळ रावले जाल्यार कांय लोक भाजी विकतात तशे, ‘ड्रग्स जाय गे, ताजें ताजें ड्रग्स’ आड्डत दारांनी भोंवतले, अशें म्हणिल्लें. दारांनी अजून भोंवनात, पूण घरांनी विकप सुरू जालां. पसऱ्यार घासलेट विकचें तशें!! गंभीर गजाल. पूण परिस्थिती पळयल्यार ताचेर नियंत्रण हाडपाची इत्साशक्त, धाडस कोणाकूच ना, असो निरशेवणो सूर लावचो पडटा.
मडगांवां घरांत ड्रग्साचो पसरो घाल्लो मनीस स्वता तें विकतालो काय मानाय म्हूण काम करतालो, हाचे फाटलो सुत्रधार कोण, कोणाक हप्ते पावताले, हें ड्रग्स खंयच्यान येतालें वा कोण ताका ते हाडून दिताले, तें विकत घेवपाक कोण कोण येताले ह्या प्रस्नांच्यो जापो सोदच्यो. तपासा उपरांत दोशींक खर ख्यास्त जावंक जाय. मागीर तो कितलोय पेझाद मनीस आसूं. कारण हो ट्रॅण्ड एकदां सुरू जालो जाल्यार रानांनी वा आडवाटेर ड्रग्सांचे गाडे सुरू जावं येतात. मटक्याचे गाडे आसात तशें! बार्देसांत, पेडणें म्हालांत हाचे आदी घरांनी ड्रग्स तयार करपाचे ‘लघुउद्देग’ दिशिल्ले. विशेश म्हणल्यार बिराडांतल्या ह्या उद्देगा विशीं घरधनयाक कांयच खबर नाशिल्लें. तांणी घरांत, बिराडांत कितें चल्लां, थंय कोण येतात, कितें करतात, ताचेर लक्ष दवरूंक नाका? काय फक्त म्हयन्याक भाडें मेळटा, ताचीच आशा बाळगप?
स्मार्ट सिटींत फाटीं गांजाचीं रोपां मेळिल्लीं. कामगारांनी गांजो हाडिल्लो, तो पडून तीं किल्लून आयलीं, असो युक्तिवाद कांय जाणांनी केल्लो. मात सुक्या चुऱ्या पसून रोपां जावप तशें शक्य ना. कोणें तरी ताच्यो बियो वा रोपांच हाडून लावपाची शक्यताय चड. दर्यादेगांचेर पोरसांत गांजो लायिल्लो मेळ्ळा. एका फ्लॅटांतूय ताची लागवड केल्ली. भरपूर दुडू मेळटात, म्हणटकच कांय लोक हो गुन्यांव करपाचें धाडस करतात. तांकां दंड, बंदखण जावपाचो भंय दिसना काय? काय आमचे मनीस आमकां कांयच जावपाक दिवचे नात, हाची खात्री आसता?
जंय ड्रग्सांचो वेव्हार जाता, थंय सीसीटीव्ही कॅमेरे आसतलेच. पूण ते चलतात काय बंद आसात, तें कळपाक मार्ग ना. सीसीटीव्हींचेर कालूच न्यायालयान हुस्को उक्तायला. कॅमेरे चलतले, अशीं पावलां उखलचीं, अशेंय तांणी म्हणलां. खुद्द पुलीस स्टेशनांतले सीसीटीव्ही चलनांत खंय. गोंयांत ड्रग्सांचो वेव्हार नेमको खंय जाता, तातूंत कोण घुस्पल्यात, हें कळत जाल्यार ताचेर नियंत्रण येवं येता. दुबावीत घरां वा हेर कडेन नेमान छापे घालूंक जाय. रातच्या वेळार कांय कडेन बेकायदेशीर वेव्हार चलतात, थंय पुलिसांची गस्त जाय. समाज, स्वराज्य संस्थांनीय फुडाकार घेवचो. सुरक्षा सप्ता आसता, तसो दर म्हयन्याक ‘ड्रग्स मुक्त गोंय’ मोहीम चालीक लावंक जाय. शिमांचेरूय श्वान पंगड, स्कॅनर बसोवन खर तपासणी करपाचीय गरज आसा. विमानतळार जाता तशी. नाक्या वयले कर्मचारीय दर सप्तकांत बदलपाक जाय. ड्रग्सांच्या वायट परिणामा विशीं सातवे- आठवे यत्ते सावनूच शिक्षण दिल्यार बरें. पर्यटन मळाचेर देखरेख, शिक्षणीक संस्थांनी देखरेख, समाजजागृताय, कडक कायदे अशीं कांय पावलां उखल्ल्यार ड्रग्साचे हे पसरे बंद जावं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
