ड्रंक अॅण्ड ड्रायव्हः आयच्यान खर कारवाय

भांगरभूंय | प्रतिनिधी

10 हजारां मेरेन दंड वा बंदखणीची ख्यास्त जावये, पुलिसांची विशेश मोहीम

भांगरभूंय I प्रतिनिधी
पणजी : सोरो पियेवन वाहन चलोवप्यां आड कारवाय करपाक आयच्यान येरादारी पुलीस विशेश मोहीम राबयतले. हातूंत दोशी अासप्यांचेर स म्हयन्याची बंदखण वा 10 हजार रुपयांचो दंड वा दोनूय ख्यास्त जावपाक शकता. पुलीस खात्या कडल्यान सोमारा हे विशींचें परिपत्रक जारी केलां.

फाटल्या सप्तकांत जुवारी पुलाचेर जाल्ल्या भिरांकूळ अपघातांत मोटार पुला वयल्यान न्हंयेंत पडून चवगांक बुडून मरण आयिल्लें. ह्या अपघाता उपरांत सोऱ्याचें घुंवळेंत वाहन चलोवप्यांचो विशय परतून चर्चेत आयला. गोंयांत रातच्या वेळार घडपी 95 टक्के अपघात सोरो पियेवन वाहन चलयिल्ल्यान घडटात, असो दावो मुख्यमंत्री डॉ. प्रमोद सावंत हांणी केल्लो. हाचेर नियंत्रण हाडपाक कायद्यांत बदल करतले अशेंय मुख्यमंत्र्यान सांगिल्लें.
आतां पुलीस खात्यान अशें प्रकार अाडावपाक बेगोबेग पावलां उखलपाचो निर्णय घेतला. हाचे मुखार घडपी रस्तो अपघात आडावपाक पुलीस खात्यान मोटार वाहन कायद्याची खरपणान अंमलबजावणी करपाचो निश्चेव केला. ते खातीर आयच्यान विशेश मोहीम राबयतले. रातच्या वेळार विवीध वाठारांनी पुलीस गस्त वाडयतले. सोरो पियेवन वाहन चलोवप्यांक 6 म्हयन्यांची बंदखण वा 10 हजार रुपया वा दोनूय ख्यास्ती जावपाक शकतात.
पुलीस तशेंच दोनूय जिल्ह्यांची पुलीस पथका हांच्या जोड पालवान ही कारवाय सुरू करतले, अशेंय पुलीस खात्यान जारी केल्ल्या प्रसिद्धी पत्रकांत नमूद केलां.

सानपिरायेचो वाहन चालक सांपडल्यार ताच्या पालकांचेर मोटार वाहन कायद्या प्रमाण गुन्यांव नोंद करतले, अशें पुलीस खात्यान म्हणलां.
सुदारीत मोटार वाहन कायद्या प्रमाण सानपिरायेच्या भुरग्यान गुन्यांव केल्यार वाहनाच्या धनयाक दोशी थारायतले आनी ताका 25 हजार रुपया दंडा वांगडाच तीन वर्सांची बंदखण जातली. ते भायर वाहनाची नोंदणी एका वर्सा खातीर रद्द करतले. तशेंच सानपिरायेचो आरोपी 25 वर्सांचो जाय मेरेन ताका वाहन परवानो दिवचे नात.

सानपिरायेचो चालक सांपडल्यार पालकांचेर कायद्या प्रमाण कारवाय

मडगांव: ड्रंक अॅण्ड ड्रायव्ह तशेंच ओव्हर स्पीड वाहन चलोवप्यांचेर फाल्यां, मंगळारा, 2 ऑगस्टा सावन पुराय गोंयांत खर कारवाय करतले अशी म्हायती दक्षीण गोंय येरादारी पुलीस उपअधिक्षक धर्मेश आंगले हांणी पत्रकार परिशदेंत दिली.
गोंयांत ‘फॅटल एक्सीडेंटांचो’ आंकडो वाडत आसा ही हुस्को करपा सारकी गजाल. ह्या वर्सा 133 फॅटल एक्सीडेंट जाल्यात. फाटल्या वर्सा परस ह्या वर्सा 31 जाणांक चड रस्तो अपघातांत मरण आयलां. सोरो पियेवन गाडी चलोवपी 185 जाणांक दंड दिला. फाटल्या दिसांनी जे अपघात जाल्यात तातूंत कांय जाणांक एकेच फावटीं चार जाणांक मरण आयलां. ते खातीर पुलीस येरादारी खातें चड सादूर जालां. पुराय गोंयच्या नाक्यांचेर राती आनी दिसा येरादारी पुलीस आसतले आनी ते ड्रंक अॅण्ड ड्रायव्ह तशेंच ओव्हर स्पीड वाहन चलोवप्यांचेर कारवाय करतले. ओव्हर स्पीड वाहन चलोवप्यां मदीं तरणाट्यांचो आंकडो चड आसा. हाचे मुखार अश्यो केशी सांपडल्यार भुरग्यांच्या पालकांक आपोवन हाडून अपघात जाल्यार तांकां तितलेच जापसालदार धरतले अशें आंगले हांणी सांगलें.

दंड थारायतलें न्यायालय
येरादारी नेम मोडल्यार परवानो निलंबीत जावप ही नियमीत प्रक्रिया. मात आतां सोरो पियेवन वाहन चलयल्यार तांचेर एफआयआर नोंद करून न्यायालयांत चार्टशीट दाखल करतले. ह्या प्रकरणांतल्या दंडाची रक्कम न्यायालय थारायतले, अशी म्हायती उपअधिक्षक धर्मेंद्र आंगले हांणी दिली.