भांगरभूंय | प्रतिनिधी
पणजी : ड्युटेक उसरां हजर राविल्ल्या कर्मचार्याक कारण विचारिल्ल्यान वॉर्ड इन्चार्जाक वायट उतरां दिवन बडोवपाची घडणूक सांखळे मुळाव्या भलायकी केंद्रांत घडली. ह्या प्रकरणांत पुलिसांनी संतोष वरक (३८, रा. श्रीराम कॉलनी, सालेली, सत्तरी) हाका अटक केल्या.
हे विशीं मेळिल्ले म्हायती प्रमाण, संतोष हो भलायकी केंद्रांत मल्टीटास्कींग स्टाफ म्हणून काम करता. ताची ड्युटी २ जुलयाक सकाळीं ८ वरांचेर आशिल्ली. मात तो वट्ट देड वरां उसरां, म्हणल्यार ९.४० क केंद्रांत हजर जालो. ह्या वेळार वॉर्ड इन्चार्ज सुरेश सिनारी (५३) हांणी ताका उसरां येवपाचें कारण विचारलें. हाचो संतोष वरक हाका राग आयलो आनी ताणें सिनारी कडेन वाद घालपाक सुरवात केली. उपरांत थापट मारलें. ह्या प्रकरणांत वैजकी अधिकारी अतुल पै हांणी कागाळ केल्या, सुरेश सिनारी आपलें कर्तव्य करताले. तांकां आडावपा खातीर बळाचो वापर केल्ल्याचें कागाळींत नमूद केलां.
दुबावीत संतोष वरक हाचेर गुन्यांव नोंद केला. ह्या प्रकरणांत पुलिसांनी ताका त्याच दिसा २ तारखेर सांजेवेळार ४.४२ अटक केल्ल्याची म्हायती मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
