भांगरभूंय | प्रतिनिधी
न्यूयाॅर्क, खबरां संस्था : अमेरिकेचे वेंचून आयिल्ले अध्यक्ष डोनाल्ड ट्रम्प हांच्यो आडखळी वाडपाच्यो आसात. अमेरिकेच्या फेडरल कोर्टान तांचे आड लैंगीक शोशण प्रकरणांत कनिश्ठ न्यायालयान दिल्ल्या ५० लाख डॉलर्स भरपाय प्रकरणांतलो निकाल कायम दवरला. हाका लागून ट्रम्प म्हयन्या भरांत अध्यक्षपदार बसले उपरांतूय तांचे आड चलपी हो खटलो चालूच उरतलो, अशी म्हायती एका दिसाळ्यांत आयल्या.
नेमकें प्रकरण कितें?
ट्रम्प हांणी १९९० च्या दसकांत न्यूयॉर्कच्या एका स्टोअरांत ड्रेसिंग रूमांत मॅगेझिन पत्रकार ई जीन कॅरोल हिचें लैंगीक शोशण केल्ल्याचो आरोप तांचेर आसा. हे विशीं डोनाल्ड ट्रम्प हांचे आड कनिश्ठ न्यायालयांत चलिल्ल्या खटल्यांत तांकां दोशी मानून ५० लाख अमेरिकन डॉलर्सचो दंड दिला. हाचे आड ट्रम्प हांणी मॅनहॅटनच्या सर्कीट कोर्ट ऑफ अपीलांत नव्यान सुनावणी घेवपा खातीर याचिका दाखल केल्ली. मात, ह्या प्रकरणांत सादर केल्ले पुरावे हे ट्रम्प दोशी आशिल्ल्याचें स्पश्ट करतात, अशें नमूद करून न्यायालयान आदीं दिल्लो निकाल कायम दवरलो.
मजगतीं, अमेरिकेच्या सर्वोच्च न्यायालयान १९९७ वर्सा दिल्ल्या एका निकाला प्रमाण, खंयच्याय मनशाक तो राष्ट्राध्यक्षपदार आसा म्हणून गुन्यांवांच्या खटल्यां पसून संरक्षण मेळचें ना. देखून, २० जानेवारी २०२५ सावन डोनाल्ड ट्रम्प अध्यक्ष म्हूण कदेलार बसले उपरांतूय हो खटलो चलतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
