भांगरभूंय | प्रतिनिधी
पणजी ः गोंय विद्यापिठाचे कुलसचीव म्हणून डॉ. सुंदर नारायण धुरी हांची नेमणूक केल्या. ह्या पदाची पुराय प्रक्रिया जाले उपरांत राज्यपाल पी. एस. श्रीधरन पिल्लई हांणीय डॉ. धुरीच्या नांवाक पसंती दिल्ली. आयज ताची अधिकृतपणान घोशणा केल्या. डॉ. धुरी हे सत्तरीचे पूत जावन आसा.
कुलसचीव पदावेल्यान आपणाक मुक्त करचे अशी मागणी प्रा. व्ही. एस नाडकर्णी हांणी गोंय विद्यापिठां कडेन केल्ली. पूण नव्या कुलसचीवाची नेमणूक जाय मेरेन तांकांच तें पद सांबाळपाक सांगलें. ह्या पदाची जायरात विद्यापिठान 15 नोव्हेंबर 2024 दिसा दिल्ली. 16 डिसेंबर 2024 मेरेन अर्ज मागयल्ले. जायत्या जाणांनी अर्ज केल्ले. छाननी प्रक्रियेंतल्यान आयिल्ल्या नांवांतल्यान डॉ. धुरी हांची निमाणी निवड केली. कुलगुरू हरिलाल मेनन हांच्या फुडारपणा खाला आशिल्ले समितीन ही निवड केल्या. कुलपती ह्या नात्यान राज्यपालानय ताका मान्यताय दिली. ह्या पदाची मुजत सुरवेक 5 वर्सां खातीर आसता, तातूंत वाड जावपाची शक्यताय आसता.
डॉ. सुंदर धुरी गोंय विद्यापिठाच्या रसायनशास्त्र विभागांत इन ऑर्गेनिक केमिस्ट्रीचे (अकार्बनिक रसायनशास्त्र) प्राध्यापक आसात. तांणी गोंय विद्यापिठांतल्यान डॉक्टरेट पदवी पुराय केल्या. सध्या ते रसायनशास्त्र विभागांत डेप्युटी डीन म्हणून काम करता. तांणी आतां मेरेन को-ऑर्डिनेशन केमिस्ट्री, सिंथेटिक इन ऑर्गेनिक केमिस्ट्री आनी इन्स्पायर्ड कॅटालायटिक केमिस्ट्री ह्या मळार म्हत्वाचें योगदान दिलां. ह्या विशयांचेर तांणी बरयल्ले संशोधन निबंद 65 परस चड प्रकाशनांनी उजवाडाक आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
