भांगरभूंय | प्रतिनिधी
भांगरभूंय । प्रतिनिधी
काणकोणः श्री संस्थान गोकर्ण पर्तगाळ जीवोत्तम मठा वतीन दितात ते श्री विद्याधिराज पुरस्कार, श्री जीवोत्तम आनी पुरुषोत्तम पुरस्कार बिरेस्ताराक मठांत आयोजीत केल्ले एके विशेश कार्यावळींत मठाधीश श्रीमद् विद्याधीशतीर्थ स्वामींचे हस्तुकीं भेटयले. अंदूचो 44वो विद्याधिराज पुरस्कार म्हैसूरच्या डॉ एम जगन्नाथ शेणॉय हांका जीवोत्तम पुरस्कार अॅड प्रकाश प्रभुदेसाय आनी महेश सुंदर नायक आनी पुरुषोत्तम पुरस्कार वेदमूर्ती अनंत पुरुषोत्म भट बेरोली, वरदराज भट (कुमटा) आनी बाळकृष्ण लक्ष्मीनारायण भट (कुंदापूर) हांका भेटयले. रोख 75 हजार रुपया, मानपत्र अशें विद्याधीराज पुरस्कारांचें स्वरुप आसा. जीवोत्तम आनी पुरुषोत्तम पुरस्कार रोख 50 हजार रुपयांचे आसात. पुरस्कार भेटतना माचेर मठ समितीचो अध्यक्ष श्रीनिवास धेंपें, उपाध्यक्ष आर आर कामत आनी शिवानंद साळगांवकार आशिल्ले.
सुरवेक श्रीनिवास धेंपे हांणे सगल्यांक येवकार दिलो. कार्यावळीचें सूत्रसंचालन अनिल पै हांणे केलें. फळाची अपेक्षा बाळगिनास्तना कश्ट करीत आसतना आपले जोडीचो कांय वांटो दानधर्म करून जांकां गरज आसा तांकां मजत करपाचो सल्लो विद्याधीशतीर्थ स्वामींनी दिलो. गुरुमठाची सेवा करपा खातीर जे कोण वावुरतात तांची दखल समाज घेता अशें सांगून तांणी पन्नास वर्सांच्या गुरुपिठाच्या परंपरेचो इतिहास आपल्या आशीर्वचनपर भाशणांत सांगलो.
2025 वर्सा मठ 550व्या वर्सांत पावल दवोरतलो त्या निमतान आतां सावन उत्सवाक सुरवात जाल्या अशें मठ समितीचो अध्यक्ष श्रीनिवास धेंपें हांणी आपल्या येवकाराच्या भाशणात सांगलें. कार्यावळीक पल्लवी धेंपे, मिनाक्षी कामत, दीपा प्रदीप पै हाणी सौ शेणॉय, सौ भट हांची खणा नारळान ओटी भरली. कार्यावळीक गोंय, कर्नाटक तशेंच मुबयचे मठ अनुयाई व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
