भांगरभूंय | प्रतिनिधी
पणजी : बर्च बाय रोमिओ दुर्घटणे प्रकरणांत निलंबनाची कारवाय जाले उपरांत परतून सेवेंत दाखल जाल्ल्यो नागरी सेवा अधिकारी डॉ. शमिला मोंतेरो ह्यो परतून नुस्तेंमारी संचालक जाल्यो. हे विशींचो आदेश कार्मिक खात्यान परतून जारी केला. हाका लागून नुस्तेंमारी खात्याक पुराय वेळ संचालकाची नेमणूक जाल्या. ह्यान पयलीं उपसंचालक चंद्रकांत वेळीप हांचे कडेन संचालकपदाचो ताबो आशिल्लो.
बर्च बाय रोमिओ क्लबाक ६ डिसेंबर २०२५ रोजी उजो लागून २५ जाणांक मरण आयलें. ही दुर्घटणा जाली तेन्ना डॉ. शमिला मोंतेरो ह्यो गोंय प्रदुशण नियंत्रण मंडळाच्यो वांगडी सचीव आशिल्ल्यो. ह्या भिरांकूळ दुर्घटणे खातीर सरकारान तांचेर तशेंच पंचायत संचालक सिद्धी हळर्णकार ह्या दोगांचेर निलंबनाची कारवाय केली. ७ डिसेंबर २०२५ दिसा ही कारवाय जाली. बर्च बाय रोमिओ दुर्घटणे प्रकरणांत पुलिसांनी तपास पुराय करूंक म्हापशें न्यायालयांत आरोपपत्र लेगीत दाखल केलें.
हाचे उपरांत १ मार्च २०२६ दिसा दोगांचेंय निलंबन सरकारान फाटीं घेतलें. हाका लागून ह्यो दोनूय अधिकारी परतून सरकारी सेवेंत दाखल जाल्यो. निलंबनाचो आदेश फांटी घेतले उपरांत आतां २३ दिसांनी डॉ. मोंतेरो हांकां पदाचो ताबो दिला. परतून तांची नेमणूक नुस्तेंमारी संचालकपदाचेर जाल्या.
डॉ. मोंतेरो ह्यो बरींच वर्सा नुस्तेंमारी संचालक आशिल्ल्यो. कुटबण जेटीचेर कामगारांक कोलेराची लागण जाले उपरांत सप्टेंबर २०२४ त तांची नुस्तेंमारी संचालकपदावेल्यान आचकीत तांची बदली पर्यावरण खात्यांत जाली. तरी वर्सा उपरांत २०२५त परतून तांची नुस्तेंमारी संचालकपदार बदली जाली. हाचे उपरांत तांचे कडेन प्रदुशण नियंत्रण मंडळाच्या वांगडी सचीवपदाचो ताबो दिलो. ह्या वेळार बर्च दुर्घटना जाली आनी तांचेर कारवाय जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
