भांगरभूंय | प्रतिनिधी
पणजी: गोवा चेंबर ऑफ कॉमर्स अॅण्ड इंडस्ट्री (जीसीसीआय) आनी एमआयटी डब्ल्यूपीयू गोवा हांच्या जोड पालवान नामनेचे शास्त्रज्ञ डॉ. रघुनाथ माशेलकार हांकां ‘गोमंत गौरव सन्मान’ जाहीर केलाे. हो भोवमान सुवाळो 16 एप्रील 2026 दिसा चार वरांचेर कला अकादमीत जातलो अशी म्हायती चेंबराच्यो अध्यक्ष प्रतिमा धोंड हांणी दिली. ह्या वेळार संजय आमोणकार, शशिकांत जोशी, डॉ. श्रुती निगुडकर, डॉ. विजयन करीपल हाजीर आशिल्ले.
धोंड हांणी सांगलें की, भोवमान सुवाळ्यांत मुखेल सोयरे म्हूण मुख्यमंत्री डॉ. प्रमोद सावंत हाजीर रावतले. डॉ. माशेलकार हे पद्मविभूषण पुरस्कारान सन्मानीत आसात. तांणी ‘वैज्ञानीक आनी उद्देगीक संशोधन परिशदे’चे आदले म्हासंचालक म्हणून काम पळयिल्लें. तांचो माशेल ह्या गांवा पसून सुरू जाल्लो आनी संवसारीक विचारवंत जावपा मेरेनचो प्रवास थक्क करपी आसा. तांणी कल्पकतेचेर आदारीत सर्वसमावेशक विकासाचें आदर्श कार्य जगाक दाखोवन दिलां. ह्या कारणां खातीर तांचो भोवमान करतात.
धोंड हांणी म्हणलें, गांधीयन इंजिनियरींग: मोअर फ्रॉम लेस फॉर मोअर (उण्या संसाधनांतल्यान चडांत चड लोकां खातीर चड लाव) ह्या तत्वज्ञाना खातीर वळखतल्या माशेलकारांनी नाविन्यपूर्ण संशोधनाक समाजीक परिवर्तनाची एक शक्ती म्हणून नवी वळख दिल्या. तांचे यश फुडल्या पिळग्यां खातीर मार्गदर्शक थारतलें. हो पुरस्कार सुवाळो ‘गोवा 2037’ परिशदेचो एक वांटो आसा. गोंयच्या विकासाक ‘विकसीत भारत 2047’ ह्या राष्ट्रीय संकल्पने कडेन सुसंगत करपा खातीर तयार केल्लें हें एक धोरणात्मक व्यासपीठ आसा.
संजय आमोणकार हांणी सांगलें, ‘गोवा 2037’ परिशद फुडारा खातीर सज्ज आशिल्ल्या राज्याक आकार दिवपा खातीर उबारिल्लें एक पावल. परिशदेंत रिइमॅजिनींग गोवास फ्युचर: बॅलन्सींग इंडस्ट्री अॅण्ड इकॉलॉजी’ आनी ‘गोवाज अ ग्लोबल नॉलेज हब: ब्रिजींग अकॅडेमिया अॅण्ड इंडस्ट्री’ अशे संवाद सत्र आयोजीत केल्यात. गोंयाक देशा मुखार एका आदर्श राज्य म्हणून उबे करपाच्या उद्देशान ह्या दोनूय चर्चासत्रांची आंखणी केल्ल्याचें आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
