भांगरभूंय | प्रतिनिधी
गोंया सयत पुराय देशांत सात दिसांचो दुखवटो
भांगरभूंय । प्रतिनिधी
पणजीः शेनवारा 28 डिसेंबराक सकाळीं 9.30 वरांचेर दिल्लींतल्या एआयसीसी (ऑल इंडिया काँग्रेस कमिटी) मुख्यालयांतल्यान आदले प्रधानमंत्री डॉ. मनमोहन सिंग हांची निमाणी यात्रा सुरू जातली. ही म्हायती काँग्रेसीचे सरचिटणीस के. सी. वेणुगोपाल हांणी दिली. 27 डिसेंबराक ते संवसाराक अंतरिल्ले.
डॉ. सिंग हांची कूड शेनवारा सकाळीं 8 वरांचेर तांच्या घरांतल्यान एआयसीसी मुख्यालयांत हाडटले. थंय लोक आनी काँग्रेस कार्यकर्ते सकाळीं 8.30 ते 9.30 वरां मजगतीं तांकां आर्गां ओंपपाक शकतले, अशेंय वेणुगोपाल हांणी सांगलें.
प्रधानमंत्री नरेंद्र मोदी आनी गृहमंत्री अमीत शाह हांणी आदले प्रधानमंत्री डॉ. मनमोहन सिंग हांच्या घरा वचून तांकां आर्गां ओंपलीं. केंद्रीय मंत्रीमंडळाचे बसकेंत डॉ. सिंग हांकां आर्गां ओंपलीं आनी शोक थाराव मंजूर केलो.
केंद्र सरकारान पुराय देशांत सात दिसांचो दुखवटो जाहीर केला. तशेंच गोंय सरकारान लेगीत सात दिसांचो दुखवटो जाहीर केला. हे संबंदांत गोंय सरकारान आदेश जारी केला. 26 डिसेंबर 2024 ते 1 जानेवारी 2025 मेरेन गोंयांत दुखवटो आसतलो. 26 डिसेंबर 2024 ते 1 जानेवारी 2025 ह्या काळांत विधानसभा तशेंच सरकारी इमारतींचेर राष्ट्रध्वज अर्द्याचेर देंवयतले. सरकारी पांवड्यार मनरिजवण कार्यावळ जावची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
