भांगरभूंय | प्रतिनिधी
फाल्यां 14 एप्रिल. भारतरत्न डॉ. भीमराव आंबेडकर हांची 136 वी जयंती. सगल्यांत पयलीं तांकां काळजा सावन नमन करतां.
व्हड सन्मानान तांकां बाबासाहेब म्हणटात. तांच्या कार्या विशीं बरोवपाक उतरां बसून उणीं पडटात. आपल्या हुशारकायेन तांणी अनेक विशयांत प्राविण्य मिळयलें. लागीं लागीं सगल्या क्षेत्रांत तांच्या कामाची नोंद जाल्ली आसा. भारतीय संविधानाचे ते शिल्पकार, लोकशाहीचे पुरस्कर्ते, व्हड तत्वज्ञानी, स्वयंविचारी, प्रतिभाशाली, क्रांतीकारी विचारवंत, प्रज्ञावंत, विवेकनिश्ठ, मानवतावादी, अशी तेंगशे वयली प्रतिभा आशिल्ले ते म्हान समाज सुदारक आशिल्ले. तांच्या खर यत्नांक लागून आमच्या देशाक लोकशाय, स्वतंत्रताय, समता, भावपण, सर्व- समावेशकताय अश्या मुल्यांचेर आदारीत संविधान मेळ्ळें. ते खातीर तांकां प्रतिगामी विरोधा कडेन खर युक्तिवाद करचे पडले. ते काम तांचे सारके विद्वानूच करूंक शकताले. पिडीत, दुबळ्या आनी वंचीत लोकांक वयर काडपाक तांणी जे यत्न केले ताचेर इतिहासाचो एक नवो विशय जाता.
भारतीय संविधानाचे ते शिल्पकार. संविधान ही फकत नेमांची मांडावळ न्हय. तर समाजीक जिविताचे तत्वज्ञान आसा. एक समाज, एक न्याय, विविधतेतल्यान एकता अशी सगलीं नैतीक मुल्यां तातूंत आसात. समाजीक आनी अर्थीक विशमता मोडून काडपाक बाबासाहेबान आपली सगली बुदवंतकाय पणाक लायिल्ली आसा. महिलांक दादल्यां बरोबर सगले अधिकार मेळचे म्हणून बाबासाहेबान हिंदू कोड बील हाडलें. पूण सरकारी पक्षांतल्या पोरण्या आनी परंपरीक विचारांच्या वांगड्यांनी खर विरोध केलो. निशेध म्हणून बाबासाहेबान मंत्रिपदाचो राजिनामो दिलो. नारी सशक्तीकरणा खातीर त्याग करपी बाबासाहेब पयले म्हापुरूश आसुंये. आयच्यो महिला ज्या मान सन्मानान जगतात. संविधानान दिल्ले सगले राजकी आनी समाजीक अधिकार भोगतात. तांकां बाबासाहेबांच्या ह्या त्यागा विशीं कितली जाणविकाय आसा? इतलेंच न्हय तांच्या कार्या विशीं समजून घेवपाची कितली उत्सुकताय आसा?
पुरातन काळांत चलत आयिल्ल्या रुढी प्रमाण भारतीय महिलांची परिस्थिती चातुर्वर्ण्य वेवस्थेंत जशी पिडीत जातीची आशिल्ली ताच्या परस वेगळी म्हणपा सारकी नाशिल्ली. मनुस्मृतींत बायलां विशीं जे विचार मांडल्यात आनी जे तरेन तांकां कशी वागणूक दिवची तें सांगलां. विधवा बायलां विशीं जे कितें सांगलां. ते खंयच्याय नैतीक मुल्यांक धरून नाशिल्लें. त्या तेंपार तर बालविवाह पद्दत आशिल्ली. जाण्ट्या दादल्या वांगडा लग्न करतगर विधवा जावपाची शक्यताय चड आसताली. क्रुरपणाचें हें भयानक रूप आशिल्लें. डॉ. बाबासाहेब आंबेडकरान जेन्ना मनुस्मृतीचें जाहीर दहन केलें. तेन्ना दलीत वर्गा बरोबर महिला वर्गाच्या चिड्डून दवरिल्ल्या आक्रोशाक वाट करून दिली. हालींच एका नामनेच्या मराठी अभिनेत्यान मनुस्मृतीच्या समर्थनांत वादाचे विधान केले. पूण लोकांचो विरोध पळोवन ताणें मागीर माफी मागली. तरी अश्या विधाना वयल्यान प्रतिगामी विचार हळूच वयर हाडपाचे हे कुटील डाव आसात. लोकांनी सादूर रावपाची गरज आसा.
दुसरी गजाल म्हणल्यार, आरक्षणा विशीं समाजामदीं चुकीचे समज पसरावपाचे नेटान यत्न जातात. पूण आरक्षण दवरपाची गरज कित्याक पडली? हें पयलीं समजून घेवपाक जाय.
जेन्ना एकाच समाजांतले, एकाच देशांतले, एकाच धर्मातले लोक जल्मा वयल्यान शूद्र म्हणून शिक्को मारून तांकां सगल्या सैमीक गरजां सावन पयस दवरतात. तशेंच सगल्या तरेच्या सुविधां सावन वंचीत दवरतात. खरें म्हणल्यार जो दुसर्यांक शूद्र वा उणाक लेखता, ताचें मन आनी विचार तितलेच शूद्र आसतात. सभावीक तांची वागणूक क्रूर, कपटी आनी कारस्थानी जाता. स्वताक उच्च वर्णीय समजुपी हो समाज संस्कारी म्हणपाच्या लायकीचो थारना.
जेन्ना दुबळ्या शोशितांची कात हजारांनी वर्सां गुलामगिरीच्या चाबकांचे फटके सोशून भेरावन गेल्ली, मानसिकता दाबून दवरून जल्मांतच ‘व्यंग’ जाल्ली. अश्या मानवताशून्य सवर्ण लोकां कडल्यान शोशितांचे सैमीक अधिकार सोंपेपणी मेळपाची आस्त नाशिल्ली.
सगल्यांत पयलीं ह्या दलीत, पिडीत लोकांक तांच्या अस्मितायेची जाणविकाय करून राश्ट्रीयत्वा कडेन तांचे भावनीक नातें जोडून दिवचें पडटलें. ते खातीर तांचो समाजीक दर्जो वाडोवप हें पयलें पावल आशिल्लें. शिक्षण, नोकरी आनी वेवसाय दिवन तांकां समाजीक उंचाय दिवपाची गरज आशिल्ली. पूण पयलींच वयर बशिल्ल्या लोकां कडेन सर्त करप सोंपे नाशिल्ले. हें वळखून डॉ. बाबासाहेबान आरक्षणाची तजवीज केली. आरक्षणांतल्यान वंचीत समाजाची अर्थीक परिस्थिती वाडोवन, तांचो समाजीक दर्जो वाडोवचो हो मूळ हेत आशिल्लो.
देश स्वतंत्र जावन 80 वर्सां जायत आयलीं. आजूनय अपेक्षित येस पदरांत पडिल्ले दिसना. दिसपट्टे दलितांचेर हत्याचार चालूच आसात. आरक्षणां फाटलो मूळ उद्देश समजून घेनास्तना दलीत लोकां विशीं परत घृणा निर्माण करपाक सवर्णांक येस आयलां. ते खातीर अविवेकी, अ-मानवी युक्तिवाद फुडें हाडून श्रमीक वर्गाक हिणसावपाचे यत्न जातात.
तशें पळोवंक गेल्यार आमच्या देशांत आरक्षण वेवस्था नविदाद म्हणपाक जायना. सवर्ण वर्ग अदृश्य अवस्थेंत आपोआप संघटीत जाल्लो आसता. देशाचे चडांत चड अर्थीक वेवसाय, जमनी, समाजीक संघटना, सर्वणांनी शिक्षणाच्या बळार आपल्या हातांत घेतल्यात. व्हड वेवसाय सवर्ण वर्गा कडेन आशिल्ल्यान तांच्याच जातीच्या लोकांक प्राध्यान मेळटा, सुरूवेच्या तेंपार सरकारी खात्यांतल्या वयल्या सुवातीचीं सगलीं पदां तांच्याच हातांत आशिल्लीं. हाचेर थोडो विचार जावंचो.
तशेंच आरक्षणाक जो विरोध जाता हो तत्वीक स्वरूपाचो न्हय. हेर तरेन तरेकवार सवलतीच्या रुपान आमी आरक्षण मागतात. लघु-उद्देग आनी कुटीर उद्देग व्हड व्हड उद्देगीक साम्राज्या कडेन सर्त करूंक शकना. तांकां प्रोत्साहन दिवपाक सरकार तरेकवार सवलती दिता. हेंय एके तरेचे आरक्षण म्हणपाक जाय.
तशें पळोवंक गेल्यार आरक्षण धोरण लागीं लागीं सगल्या देशांत लागू आसा. दक्षीण आफ्रिकेंत स्वातंत्र्या उपरांत थंयच्या थळाव्या नागरिकां खातीर आरक्षण वेवस्था राबवल्या. पारतंत्र्यात आसतना ह्याच लोकांचे भयंकर शोशण जाल्लें.
जे मेरेन देशांत समता आनी भावपण निर्माण जायना. ते मेरेन ‘आपलो देश’ ही भावना निर्माण जावप कठीण आसा. हें वळखून बाबासाहेबांनी समानतेचेर आधारीत संविधान निर्माण केलें. बाबासाहेबान सदांच ‘राष्ट्रहित सर्वोपरि’ मानलें. डॉ. बाबासाहेब आंबेडकर खरे देश भक्त आशिल्ले. जय संविधान! जय भीम!
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
