भांगरभूंय | प्रतिनिधी
भांगरभूंय । प्रतिनिधी
वाळपय : शिक्षणीक नदरेन अर्थीक दुर्बळ आशिल्ल्या घटकांक बरें शिक्षण घेवपाक मेळचें, ह्या हेतान समाज वावुरपी डाॅ. अशोक प्रियोळकार हांणी दाबे सरकारी माध्यमीक विद्यालयाच्या 65 टक्के परस चड गुण घेतिल्ल्या धा विद्यार्थ्यांक शिश्यवृत्ती भेटयली. तशेंच धा विद्यार्थ्यांक दत्तक घेवन तांच्या शिक्षणाचो खर्च करपाची तयारी दाखयली. हे संबंदीची एक कार्यावळ हालींच विद्यालयांत जाली. ह्या वेळार मुख्याध्यापक रोशन पैंगिणकार, शिक्षक भाग्यरेखा गांवस, पालक संघाची अध्यक्ष सविता गांवस हाजीर आशिल्लीं.
गांवगिऱ्या वाठारांत अर्थीक समस्या आसता. त्या कुटुंबाच्या भुरग्यांच्या शिक्षणाचेर वायट परिणाम जाता. तांकां पयशांक लागून शिक्षण पुराय करपाक मेळना. मात समाजांतले कांय लोक तांकां मजत करतात. डाॅ. प्रियोळकार हे तातूंतलेच एक. तांणी 10 विद्यार्थ्यांक दरेकी पांच हजार रुपयांची शिश्यवृत्ती दिल्या. तशेंच धा विद्यार्थ्यांक दत्तक घेतल्यात. राज्यांतल्या हेर शाळांनीय तांणी मजत दिल्या.
डाॅ. प्रियोळकार हांणी सांगलें, भुरग्यांक अर्थीक नदरेन मजत करपाक हांव शिश्यवृत्ती दितां. नगरगांव शाळेकूय हांवें मजत केल्या. ह्या सगल्या भुरग्यांक शिक्षणीक कारकिर्दींत अडचण येवची ना, हाची जतनाय हांव घेतलों.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
