भांगरभूंय | प्रतिनिधी
रंगश्रेश्ठ पुरस्कार रामदास भट हांकां, तर अनुवादाचो पुरस्कार गीता शणै हांकां
पणजी ः मंगळुरूच्या विश्व कोंकणी केंद्राचे २०२५ वर्साचे डॉ. पी. दयानंद पै विश्व कोंकणी पुरस्कार जाहीर जाल्यात. रंगश्रेश्ठ पुरस्कारा खातीर गुळवडी रामदास दत्तात्रेय भट हांची निवड जाल्या. तर अनुवाद पुरस्कारा खातीर डॉ. गीता शणै वेंचून आयल्यात.
श्री. भट हांणी फाटलीं आठ दशकांत नाट्यकले खातीर योगदान दिलां. पौराणिक नाटकांनी (प्रचंड परशू, आत्मलिंग, संत ज्ञानेश्वर, तुलसी जालंधर… आनी हेर) तांणी रंगभूशा, उजवाड येवजण, अभिनय, दिग्दर्शन अशीं साबार कामां केल्यांत, मंगळुरू ते मुंबय मेरेन तांणी काम केलां. ते गोंयांत रावतात.
अनुवाद पुरस्कार मेळिल्ली डॉ. गीता शणै हांणी वचन साहित्य, कनकदासाचें समग्र साहित्य, कुवेंपू साहित्याचो कोंकणींत अनुवाद केला. तांणी २१ कोंकणी काणयो, कादंबरी कन्नडांत, चार कन्नड पुस्तकां कोंकणींत, १६ इंग्लीश पुस्तकां कन्नडांत अनवाद केलां. तांणी स्वता ३०० वयर लेक बरयल्यात. कोंकणी साहित्याचो परिचय कन्नडभाशकांक करून दिल्ले खातीर तांकां हो पुरस्कार भेटयला.
८ फेब्रुवारी दिसा रामदास भट आनी गीता शणै हांकां मंगळुरूच्या रमण पै सभाघरांत जावपी विश्व कोंकणी नाट्यमहोत्सवांत हे पुरस्कार भेटयतले. मानपत्र, चिन्न, श्रीफळ, शाल आनी दरेकी १ लाख रुपया अशें ह्या पुरस्कारांचें स्वरुप आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
