भांगरभूंय | प्रतिनिधी
फाटल्या आयतारा 20 ऑगश्टाक डॉ. नरेंद्र दाभोलकरांची हत्या केल्यार 10 वर्सां जाली. खूनी आजूनय सांपडना. ही सामकी लजेची गजाल. खूनी कोण? हें जरी सांपडलें नासलें तरी दाभोलकरांचो खून जातगर खंयच्या लोकांच्या तोंडार खुशी उदेली ते सगल्यांक खबर आसा. जे विचारसरणीन महात्मा गांधींचो खून केलो तीच मनोवृत्ती दाभोलकरांच्या खूना फाटल्यान आसा, हें सगल्यांक बरें तरेन खबर आसा. फुडें दाभोलकरांचो खूनी सांपडलो तर हेच लोक ताका खांद्यार घेवन नाचोवपाक फाटींफुडें पळोवचे नात.
ज्या लोकांनी संत तुकारामाचो खून केलो. सावित्रीबाईचेर शेण मारले. डॉ. बाबासाहेब आंबेडकरांचो जिवितभर छळ केलो. त्याच प्रतिगामी विचारसरणीचे डॉ. दाभोलकर बळी थारले. इतलेंच न्हय हेच विचारसरणीन गोविंद पानसरे, गौरी लंकेश, एम. कलबर्गी अश्या विवेकवादी समाजसुदारक फुडार्यांचीय हत्या केली. कोणाचोय खूनी मेळपाक शकना तेन्ना तपास यंत्रणेचेर दुबाव येता.
राजकी, समाजीक, संस्कृतीक आनी स्वातंत्र्य क्रांतीखातीर मोलादीक योगदान दिल्ल्या, पुरोगामी आनी प्रगतीशील विचारां खातीर फुडारलेल्या आधुनिक समाजाचें हें कृत्य लजेक घालपी आसा. पुरोगामी लोकांनी ताचो खर निशेध केलाच. 20 ऑगश्टाक 10 व्या स्मृती दिसा निमतान पुण्यांत मूक मोर्चा काडलो. शोकसभा जाल्यो. पूण ज्या लोकांक जागे करपाक दाभोलकरान वावर केला त्या लाभार्थी वर्गाक तांच्या विचारां सावन पयस दवरपाक प्रतिगामी विचारसरणीक येस मेळटा, हें पळोवन खंत भोगता. आपली जीण समृद्ध करपाक कितें गरजेचें आसा हाची जाणविकाय ह्या पिडीत लोकांक जायना. धर्म, देवाच्या नांवांर तांची दिकाभूल करपाक कपटी लोकांक येस मेळटा, आधुनिक भारतीय समाजाचें हेंच तर दुर्दैव जावन पडलां.
अंधश्रद्धा समाजाचें दुबळेपण आसा. समाजाक लागिल्ली वाळटी आसा. समाजाच्या प्रगतीक ती भितरल्यान पोखरून काडटा. खंयच्याय धर्मांचें तें बळगें म्हणून कोणच मान्य करपाक ना. तरी आपलें दुबळेपण लिपोवन दवरपाक दुसर्या धर्माच्या दोशां कडेन बोट दाखोवप म्हणजे आपलेच मानसिकतेचे मागासलेलेंपण उक्त्यार येता, हें बरोबर न्हय.
जेन्ना विवेकवादी लोक समाजांतल्या अंधश्रद्धाळू चाली रितींचेर बडी मारतात, तेन्ना ‘तुमकां फकत आमच्याच धर्मांच्यो अंधश्रद्धा तितल्यो दिसतात? धाडस आसल्यार हेर धर्मांच्यो अंधश्रद्धा पयलीं पयस करात.’ अशी कागाळ वा युक्तीवाद आयकूंक येता. शेजार्यान आपलें घर नितळ केलें तरच हांव म्हजें घर नितळ करपाचें काम हातांत घेतलों, अशे तरेचे हे मूर्खपणाचें वर्तन जाता.
समाजाक लागिल्ली अंधश्रद्धेची कीड मारून उडोवपाचे डॉ. दाभोलकरान यत्न केले. तांणीं अंधश्रद्धा निर्मुलन चळवळीचें फुडारपण केलें. दोतोर दुयेंतीक तपासता तेन्ना तो खंयच्या धर्मांचो वो जातीचो हें पळयना. तशेंच ताचे वखद सगल्या धर्मांचे लोकांक एकाच तरेन परिणाम करता. तेन्ना अंधश्रद्धा निर्मुलन चळवळ खंयच्याय धर्माच्या आड ना. तशेंच देवस्पणाच्या आड ना. देव आसा काय ना ह्या प्रस्नाचेर चळवळीचो कसलोच संबंद ना. पूण देवाचे मध्यस्थ म्हणून समाजाची दिकाभूल करतात आनी गरीब, पिडीत, लोकांचें शोशण करतात, तांचे आड समाजांत जागृताय करप हेंच चळवळीचें मुखेल धोरण आसा. डॉ दाभोलकरान हो मुद्दो दर खेपो जाहीरपणान मांडिल्लो आसा. पूण समाज विद्वाटे अंधश्रद्धा चळवळीच्या वावराक दुशण दिवन लोकांची दिकाभूल करतात. मुखेल करून डॉ. दाभोलकरांच्या ह्या समाज परिवर्तन वावराक लागून चातुर्वर्ण्य समाज वेवस्था राबोवपाक आडमेळी येतल्यो आनी आपले वर्चस्व उणें जातले, ह्या भयान दाभोलकरांचो बळी
घेतलो.
सद्या सोशल मिडिया आनी माहिती तंत्रज्ञानान समाजीक मनाचो ताबो आपल्या हातांत घेतला. निमणें खंयचेय तंत्रज्ञान आसूं, ताचे बरे- वायट उपेग मनश्याच्याच हातांत आसात. सोशल मिडियाचेर जे संदेश प्रसारीत जातात ते पळयल्यार समाज भूतकाळाचे दिकेन वता काय? असो भंय निर्माण जाले बगर रावना. उदाहरण म्हणून एक मॅसेजीचो खासा उल्लेख करीत दिसता, ‘आमच्या भुरगेपणांत आमकां आमच्या धर्मांतल्यो बालविवाह, सती, अस्पृश्यता, चातुर्वर्ण्य अशा वायट चाली विशीं शिकयताले, पूण हेर धर्मांतल्या वायट रिती विशीं केन्नाच शिकयलें ना.’ ही मॅसेज कितल्या विद्वान लोकांनी कितले खेपो फॉर्वर्ड केल्या आसूये, हें सांगपाची गरज ना. खंत इतलीच दिसता की समाजाचें ध्रुवीकरण करून राजकी आनी समाजीक वर्चस्व गाजोवपाचो हो डाव आसा. म्हत्वाचे म्हणजे जे लोक अंधश्रद्धा चळवळीच्या विरोधांत व्हडल्यान आवाज काडतात ते असल्या अंधश्रद्धांक बळी पडनात. ढोंगीबाबांच्या तावडींत सापडटात ते गरीब लोक, लिंगीक शोशणाचे बळी थारतात गरीब लोकांच्या चल्यो आनी बायलो. गचमुड्डी, खेट जावन मरतात ते गरीब अंधश्रद्धाळू लोक. लिंगीक आरोपा खाला बंदखण भोगता, तो मागीर कोणय आसूं, ताचें समर्थन करप म्हणजे ताच्या वायट कर्तुबांक मान्यता दिल्लेवरीं जाता.
अंधश्रद्धा निर्मुलनाक विरोध करपी लोकांक एक प्रश्न विचारीन दिसता, ‘स्त्री शिक्षणा खातीर सावित्रीबाईचेर शेण शेंवटीलें, त्या काळांत समाजांत तिचे वटेन खूब उणें लोक आशिल्ले तर तिका विरोध करपी सगलो समाज एकठांय जाल्लो. तिच्या ह्या कार्याचो फायदो आयज सगल्या बायलांक मेळ्ळा. आयच्या काळांतल्या महिलांनीं शिक्षण घेवून सगल्या वाठारांत प्राविण्य मेळयलां. प्रस्न इतलोच आसा, जे लोक आयज अंधश्रद्धा निर्मुलन चळवळीक विरोध करतात ते लोक त्या तेंपार कोणाची बाजू घेतले आशिल्ले?? सगले पूर्वग्रह कुशीन दवरून प्रामाणीक पणान ह्या प्रस्नाचेर विचार करचो.
जो समाज सगल्या तरेच्या शोशण वेवस्थेंतल्यान मुक्त आसता तोच समाज प्रगतीचे वाटेन वचपाक शकता. मुळांतच आमचे चातुर्वर्ण्य वेवस्थेंतल्यान हजारांनीं वर्सां शोशण वेवस्था राबयल्ली आसा. अंधश्रद्धा ही हेच शोशण वेवस्थेची एक निर्मिती. समाज परिवर्तनाचो वावर खूब आदीं सावन चालू आसा. डॉ. नरेंद्र दाभोलकरान त्या वावराक संघटनेचे स्वरूप दिलें. अंधश्रद्धांच्या आड कार्यकर्त्यांची एक सक्रीय फौज उबी केली. त्या खातीर तांकां आपले जिवित ओपचें पडलें. समाजक्रांतीकार म्हणून तांची हत्या जाली. पूण विचार मरनात. तांच्या वावराची ज्योत पेटत उरतली. डॉ. नरेंद्र दाभोलकरांक काळजा सावन मानवंदना.
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
