भांगरभूंय | प्रतिनिधी
पणजीः गोंय वैजकी म्हाविद्यालयाचे डीन डॉ. शिवानंद बांदेकार हांचो कार्यकाळ 30 जूनाक सोंपतलो. ताचे सुवातेर नामनेचे किडनी तज्ञ डॉ. जयप्रकाश पी. तिवारी हांची नवो डीन म्हूण नेमणूक जातली. गोंय वैजकी म्हाविद्यालयांतल्या सूत्रांनी मंगळारा आमच्या प्रतिनिधी कडेन उलयतना ही म्हायती दिली. तिवारी 1 जुलय सावन डीन पदाचो ताबो सांबाळटाले.
2021 वर्सा गोंय वैजकी म्हाविद्यालयाचे डीन म्हणून डॉ. शिवानंद बांदेकार हांची ह्या पदाचेर नेमणूक जाली. भलायकी मंत्री विश्वजीत राणे हांचे लागीं आशिल्ल्यान तांची थेट डीन म्हणून नेमणूक जाली अशीय उलोवपां त्या वेळार जालीं. गोंय वैजकी म्हाविद्यालयांत दर्जेदार उपचार पद्दती हाडपाचे यत्न तांणी ह्या चार वर्सांत केले. तशेंच गोमॅकॉ हांगा अवयव प्रत्यारोपणाची शस्त्रक्रिया सुरू करपाक तांचो व्हड वांटो आसा, जाचो गोंय आनी हेर राज्यांतल्या जायत्या दुयेंतींक फायदो जाला.
मजगतीं, बांदेकाराची पिराय 65 वर्सां पुराय करून 30 जून दिसा सोंपतली. ताचे सुवातेर डॉ. जयप्रकाश तिवारी हांची नवो डीन म्हूण नेमणूक जाल्या. तिवारी गोमेकाँत जायतीं वर्सां सेवा दितात आनी गोंय भौशीक सेवा आयोगाचीय मान्यताय मेळ्ळ्या अशीय सुत्रांनी म्हायती दिल्या. तशेंच तांचो कार्यकाळ एका वर्साचोच आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
