भांगरभूंय | प्रतिनिधी
अध्यक्ष अमीत पाटकारा कडेन जाली चर्चा
पणजी: मगोचे आदले फुडारी आनी समाजीक वावुरपी डॉ. केतन भाटीकार हे रोखडेच काँग्रेसींत प्रवेश करपाची शक्यताय आसा. डॉ. केतन भाटीकार हांणी काँग्रेसींत प्रवेस करपाची इत्सा उक्तायल्या. तांणी म्हजे कडेन चर्चा लेगीत केल्या अशी म्हायती प्रदेश काँग्रेस अध्यक्ष अमीत पाटकार हांणी दिली.
तांकां प्रवेश दिवचो काय ना, हे विशी पक्ष चर्चा करून निर्णय घेतलो. फाटले विधानसभा वेंचणुकेत डॉ. केतन भाटीकार हांणी फोंडें मतदारसंघांत मगोचे उमेदवारीचेर वेंचणूक लडयिल्ली. सर्गेस्त रवी नायक हांचे आड कांय मतांनी तांकां हार खावची पडिल्ली. रवी नायक हांकां मरण आयिल्ल्यान आतां फोंडें मतदारसंघा खातीर पोटवेंचणूक जातली. तारीख जाहीर जावंक नासली तरी राजकी पक्षांनी पोटवेंचणुकेची तयारी सुरू केल्या.
भाजपाची उमेदवारी रितेश नायक हांकां मेळपाची शक्यताय आसा. डॉ. केतन भाटीकार हे काँग्रेसीत प्रवेश करपाचे वाटेर आशिल्ल्यान तांकां उमेदवारी मेळपाची शक्यता आसा. फोंडें पोटवेंचणुके खातीर इत्सुकांनी जनसंपर्क तशेंच हेर तयारी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
