भांगरभूंय | प्रतिनिधी
भांगरभूंय । प्रतिनिधी
दिवचलः भारतरत्न डॉ बाबासाहेब आंबेडकर हांका लागून आमच्या देशाक संवसारीक पांवड्यार व्हडलें म्हत्व मेळ्ळां. घटनेचे शिल्पकार आशिल्ल्या बाबासाहेबान चौफेर मळांत योगदान दिला. तांचो आदर्श तरणाट्यांनी घेवंन समाजा खातीर योगदान दिवचें अशें आवाहन दिवचलचे आमदार डॉ चंद्रकांत शेट्ये हांणी केलां.
दिवचल हरिजन वाड्यार राष्ट्रोळी युवा आनी सांस्कृतीक मंडळान आयोजीत केल्ले आंबेडकर हाचे 132वे जयंती कार्यावळींत ते उलयताले. ह्या वेळार दिवचलची उपनगराध्यक्ष सुखदा तेली, दुर्गादास गर्दे, सावित्रीबाई फुले मंचाची अध्यक्ष अर्चना गायकवाड, गोविंद परवार, दत्ताराम परवार, दीप्तेश परवार, दिपाली परवार हाजीर आशिल्ली.
आंबेडकर हांचे काम फकत दलित समाजा मेरेन मर्यादीस ना जाल्यार पुराय देशांक स्वतंत्रता, समता आनी बंधुभाव हे त्रिसुत्री वरवीं प्रेरणा दिवपी आसा. रामराज्याची संकल्पना प्रत्यक्षांत हाडपा खातीर आंबेडकरांच्या विचारान वाटचार करची पडटली अशें दुर्गादास गर्देन सांगलें.
सुवरेक डॉ शेट्ये, नगराध्यक्ष कुंदन फळारी, उपनगराध्यक्ष सुखदा तेली हांणी डॉ आंबेडकरांच्या पुतळ्याक फुलां हार घालून तांकां अभिवादन केलें. सुखदा तेली आनी नगरसेवक विजयकुमार नाटेकाराची भाशणा जालीं. राजू परवारान सूत्रसंचालन करून निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
