डेंग्यू पसून सावधान…

भांगरभूंय | प्रतिनिधी

भांगरभूंय । खबरां संस्था
दिल्ली : पावसाळ्यांत जायतीं दुयेंस पातळतात. थंडी, खोकली, जोर हे तर सामान्य आसात. हालींच सगळी कडेन आय फ्लू हें दोळ्यांचें दुयेंस पाताळ्ळां. मजगतीं, डेंग्यूचोय प्रकार सुरू जाला. डेंग्यू संसर्ग जाल्ल्या चडशा दुयेंतींत जीनोम सिक्वेन्सिंगमध्ये डी- 2 स्ट्रेन मेळ्ळा. हो डेंग्यूचो सगळ्यांत धोक्याचो प्रकार.
दोतोरांच्या म्हणण्या प्रमाण, 20 नमुन्यांतल्यान 19 नमुन्यांनी डी- 2 स्ट्रेन मेळ्ळा, म्हळ्यार सगळ्यांत धोक्याची स्ट्रेन दिल्लींत पातळ्ळ्या. फुडाराक डेंग्यू दुयेंती वाडत जाल्यार दुयेंतींक त्रास जावं येतात. कारण डी- 2 हो प्रकार जायत्या प्रकरणांनी घातक थारूंक शकता. हुस्क्याची गजाल म्हळ्यार हाचेर उपचार नात. प्लेटलेट उणे जावंक लागल्या उपरांत दुयेंतीचो जीव वाटावप खूब कठीण जाता.
सामान्य डेंग्यू संसर्ग जाल्यार जोर येता आनी कुडींत दुखता, पूण दुयेंती कांय दिसांनी बरे जातात. पूण डी- 2 हो प्रकार खूब धोक्याचो, अशें वरिश्ठ दोतोर सांगतात. हाचो संसर्ग जाल्यार जोरा वांगडा ओंकारी आनी मोडशी जाता. कुडींत उदकाचो उणाव आसता. अशे परिस्थितींत खूब त्रास जावपाक लागता.
ह्या हंगामांत जोर, ओंकारी, हागवण लागल्यार उपचारा खातीर बेगोबेग हॉस्पिटलांत वच्चें. खास करून रोगप्रतिकार शक्त दुबळी आशिल्ल्यांनी खाशेली जतनाय घेवची. डेंग्यू डी – 2 दुयेंतीक रक्तस्त्राव जाता. जोर येता. ताचो परिणाम जायत्या अवयवांचेर जाता. अशे परिस्थितींत दुयेंतीची स्थिती इबाडूंक लागता.
घरांत जळारां येवची न्हय म्हणून जनेलांक जाळी लावची. शक्यतो मच्छरदाणींत न्हिदचें. तशेंच घराच्या लागसारचो वाठार निवळ दवरचो. घराच्या लागसार उदक सांठूंक दिवचे न्हय. घरांतल्या आयदनांतले उदक वेळा वेळार बदलचें. पोरसांतलीं लातां, कट्ट्यो,सोडणांनी उदक सांठून दिवचें न्हय. लागसारच्या वाठारांत डेंग्यूची साथ आसल्यार चड जतनाय घेवची.