भांगरभूंय | प्रतिनिधी
डेंग्यूच्या दुयेंती मदीं वाड: काणकोणा डेंग्यूचे ७० दुयेंती
काणकोण, प्रतिनिधी: गांवडोंगरी पंचायत आनी काणकोणच्या हेर सुवातांचेर मेळून डेंग्यूचे ७० दुयेंती सांपडल्या. डेंग्यूच्या दुयेंती मदीं वाड जाल्ल्यान हो चिंतेचो विशय जाला.
हे विशीं काणकोणचे भलायकी निरीक्षक प्रणय नायक हांकां विचारलें तेन्ना तांणी सांगलें, काणकोण समाजीक हॉस्पिटला वतीन दिसा ३० जाणांचो पंगड तयार करुन लोकांच्या घरा लागसारचे व्हाळ, टाकयो नितळ करपाचें काम करतात. ह्या कर्मचार्यांक हेर कामां वाटून दिल्यांत. डेंग्यूचेर नियंत्रण हाडपाचे नदरेन ह्या कर्माचार्यांक सध्या हीं कामां दिल्यांत. मात थळाव्या नागरिकां कडल्यान आजूनय सहकार्य मेळना. तांच्याय सहकार्याची गरज आसा. गांवच्या नागरिकांनी सहकार्य केल्यार गांव नितळ दवरपाक आनी डेंग्यूचेर नियंत्रण दवरपाक सोपें जातलें.
काणकोण समाजीक भलायकी केंद्रांच्या वैजकी पंगडा कडल्यान काणकोणच्या विवीध भागांनी जनजागृताय करपाचें काम चालू आसा.
काणकोणां सांपडिल्ल्या ७० दुयेतीं मदले दोग दुयेंती सोडून बाकी सगळे गांवडोंगरी पंचायतीच्या विवीध वाठारांतले आशिल्ल्याची म्हायती काणकोण समाजीक भलायकी केंद्राच्या सुत्रांनी दिली. ह्या भागांत सगळे कडेन जंतुनाशकाचो फवारो मारपाचें काम चालू आसा. थळावी अंगणवाडी सेविका, मुळावे शिक्षकांची जनजागृती मोहीम सुरू आसा. कांय दुयेतींक काणकोण समाजीक भलायकी केंद्रांत दाखल केलां. जाल्यार कांय जाण घराच उपचार घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
