भांगरभूंय | प्रतिनिधी
नाटकांत भुरग्यांनी ‘व्हड जावन’ भुमिकेक न्याय दिवपाचो यत्न केला. नाटकाची सुरवात मध्य आनी शेवट हाचो विचार केलो जाल्यार खंयच नाटक आडखळिल्लें दिसून येना.
अंत्रूज घुडयो ही अंत्रूज म्हालांतली एक नांवारूपाक आशिल्ली संस्था. जिणें गोंयभर कलाक्षेत्रांत खाशेली वळख करून दवरल्या. तरणाट्यांनी ही संस्था आपल्या भुजांचेर उखलून दवरल्यच, पूण ह्या संस्थेंत बालवर्गाक घडोवपाचें आनी कलेचे दिकेन व्हरपाचें स्रय, कला अकादेमी गोंय आयोजीत नाट्य सर्तींत चवथें इनाम जोडिल्ल्या डॅडी नाटकाचें दिग्दर्शन करपी कलानंद श्रीधर कामत बांबोळकार हांकां वता.
डॅडी नाटकाचे एक प्रेक्षक ह्या नात्यान अभिप्राय दितना खोस भोगता.कलानंद हाणें डॅडी नाटकाचो प्रयोग करून दिग्दर्शन कुशळटायेचें एक आव्हान पेल्लां आनी यशाक वेंग मारल्या. दत्ताराम कामत बांबोळकार लिखीत ह्या नाटकाचें पानान पान बसयतना कितल्योश्योच घडामोडी उप्रासल्या आसतल्यो, दुबाव ना. कारण ज्या भुरग्यांक माची संवकळीची ना, जांकां संवाद कशे म्हणप हाची जाणीव ना वा जांचे पिरायेचो नियाळ घेतल्यार तांकां नाटकाचें कथानक घडये पुरायेन समजलां आसचें ना, अशे समजुतीच्या भुरग्यांक घेवन सर्तीच्या नाटकांत देंवप म्हणल्यार पोरसांत आयिल्ल्या गोरवांक आमुडपा इतलें सोपें न्हय.
ह्या प्रयोगाचें खाशेलपण म्हणल्यार नाटकाक जाल्लो रासभर लोकूच न्हय तर सादरीकरण समजून ह्या नाटकांतल्यान समाजाक दिल्लो विचार लोकांक समजलो, हें. जायते फावट आमी नाटक पळयतात तेन्ना नाटकांत अचूक संवाद आनी सर्वश्रेश्ठ अभिनय हाच्या म्हालवजार नाटकाचें विश्लेशण करतात, पूण नाटकांतल्यान व्यक्त जावपी अचूक भावनांचो विचार आयज खंय तरी शेणत गेल्लो, जो ह्या नाटकांत अणभवाक आयलो. ह्या नाटकांतल्या दर पात्रान आपल्या पिराय- अभिनय- संवाद आनी नाटकांत येवपी दर वेव्हारा प्रमाण जाता तितलें विचारपुर्वक आसचें हाची बरीच काळजी घेतिल्ल्याचें दिग्दर्शनांत होलमता.
नाटकांतलें दर पात्र तोखणायेक पात्र थारलां आनी खास करून बालपात्रां. ह्या नाटकांत भुरग्यांनी ‘व्हड जावन’ भुमिकेक न्याय दिवपाचो यत्न केला. नाटकाची सुरवात मध्य आनी शेवट हाचो विचार केलो जाल्यार खंयच नाटक आडखळिल्लें दिसून येना. खंयच्या नाटकांत कथानकाक मुखार व्हरपाक उजवाड- आवाज येवजणेक आनी वातावरण निर्मितीक प्राधान्य दिवप गरजेचें आसता, पूण नाटकांतल्या वातावरणांत त्या प्रेक्षकाचें मन रमतलें हाची काळजी नाटकाच्या दरेका घटकांत घेतिल्ली जाणवली.
ह्या नाटकांत आपलो स्वताचो अभिनय उत्कृश्ट कसो जातलो हांचो विचार करचे करून बालपात्रांक सांबाळून घेवपी आनी अकादेमीची प्रमाणपत्रां मेळोवपी डॅडी (सुरेल तिळवे), मम्मी (खुशबू कवळेंकार), दुमींग पाय (गुरूदास नायक) आनी लता (मुस्कान कामत) हांचे खास कौतूक तर पुराय प्रेक्षक वर्गाच्या काळजांत वशिल्लो आनी अकादेमी वतीन खास शिफारस जोडिल्लो सलीम (दिव्यांक कामत) हाची खूब- खुब अपुरबाय. त्या भायर सुंदर माचये मांडावळीची तुस्त करीत हे सर्तींत मोहीत विश्वकर्मा आनी उजवाडा येवजणे खातीर सदानंद वळयकराकूय कला अकादेमी वतीन वाव मेळ्ळा.
नाटक बसोवप्यान नाटक माचयेर कशें दिसतलें आनी पळोवप्यां मेरेन कशें पावतलें हाचो अदमास खूब आदीं आयिल्लो आसता आनी आपले येवजणे प्रमाण नाटक सादर करतच संहितेक न्याय दिल्ल्याची खोस नाटककारांक जाता तशीच खोस डॅडी नाटकाच्या दिग्दर्शक आनी दरेका वांगड्याच्या मुखामळार नाटक सोंपतकच पळयिल्ल्याचें हेर प्रेक्षकांबरोबर म्हाकाय समाधान.
सान्वी घनश्याम खांडेपारकार
99230 75337
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
