भांगरभूंय | प्रतिनिधी
पणजी ः फाटल्या चार वर्सां सावन वेगवेगळ्या कारणांक लागून बंद आशिल्लो डी डी कोसंबी विचार महोत्सव परतून जातलो. कला अकादमी पणजी 24 ते 28 फेब्रुवारी मेरेन हो महोत्सव आयोजीत करतले, अशी म्हायती कला आनी संस्कृती मंत्री गोविंद गावडे हांणी दिली. सोमारा पणजेंत जाल्ले पत्रकार परिशदेंत ते उलयताले. ह्या वेळार संचालक सगुण वेळीप आनी सचीव सुनील अंचिपका हाजीर आशिल्ले.
व्याख्यानमाळेचे 14 वे आवृत्तीचें उक्तावण 24 फेब्रुवारीक सांजवेळा 4.30 वरांचेर मुख्यमंत्री डॉ. प्रमोद सावंत हांचे हस्तुकीं जातलें. उपरांत सांजवेळा 5 वरांचेर मोटिवेशनल स्पीकर गौर गोपाळ दास हांचे ‘नाते संबंद आनी जिवीत’ ह्या विशयाचेर व्याख्यान जातलें. 25 तारखेक लेखिका अलका सरौगी ‘अँड इट सेज, सेव्ह मी फ्रॉम सुसायड’ ह्या विशयाचेर आपले विचार उक्तायतली.
26 फेब्रुवारीक सांजवेळा 5 वरांचेर आदित्य गुप्ता 7 ‘लायफ लेसन फ्रॉम एवरेस्ट’ ह्या विशयाचेर व्याख्यान दितले. 27 फेब्रुवारीक सांजवेळा 5 वरांचेर निवेदिता भिडे ही स्वामी विवेकानंदाच्या विचारांचेर व्याख्यान दितली. 28 तारखेक निवृत्त नौदलाचे कमांडर अभिलाष टॉमी हांचे ‘सेलिंग अराऊंड दि वर्ल्ड’ ह्या विशयाचेर व्याख्यान जातले. 13 वो डी. डी. कोसंबी महोत्सव 2020 त जाल्लो. ते उपरांत कोविड आनी वेंचणूक अशा वेगवेगळ्या कारणांक लागून हो महोत्सव जावंक नाशिल्लो. मेळिल्ले म्हायती प्रमाण, 2020 उपरांत 2022 वर्सा हो महोत्सव आयोजीत केल्लो. पूण, त्या वेळार व्याख्यातांचे निवडी वेल्यान वाद जाल्लो. देखून पुराय व्याख्यानां रद्द जाल्ली. असो वाद परतून जावचो न्हय हे खातीर सरकारान 10 वांगड्यांची निवड समिती तयार केल्ली. वेगवेगळ्या मळां वयले मानेस्त हे समितीचे वांगडी म्हूण काम करताले. अंदूंच्या व्याख्यात्यांची निवड हे समितीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
